Монгол Улсын Ерөнхийлөгч Ц.Элбэгдорж Монголын Улаан Загалмайн нийгэмлэгийн 70 жилийн ойн хүндэтгэлийн арга хэмжээнд оролцогчдод хандаж илгээлт гаргалаа.
Илгээлтийг Ерөнхийлөгчийн зөвлөх Ц.Оюунгэрэл уг ёслолын арга хэмжээний үеэр уншиж сонордуулсан юм.
Ерөнхийлөгчийн илгээлтэнд аливаа сайн үйлс, сайхан сэтгэл бодь хүний санаанд анх төрдөг хэмээгээд одоогоос 150 жилийн өмнө нэгэн сайн санаат Швейцарь хүн Итали Улсын нутагт болсон тулалдааны дараа хүмүүс эмнэлгийн тусламж авч чадахгүй байгааг өөрийн нүдээр үзээд “Солфериногийн тулалдаан” хэмээх алдарт номоо бичиж, хүмүүнлэгийн үйлсийг олон улсад хуульчлан бий болгох гарааг тавьсныг бид мэднэ.
МУЗН тэртээ 1939 оны Халх голын дайны эхэнд үүсгэн байгуулагдаж дайнд шархдагсад, олзлогдсон цэргүүдийн амь насыг аврах, эмнэлгийн яаралтай тусламж үзүүлэх зэргээр хүмүүнлэгийн гараагаа эхэлсэн бахдам түүхтэй хамт олон болохыг онцлон тэмдэглэжээ.
Төрийн тэргүүн мөн нийгэмлэгийн үйл ажиллагаа, бүтэц зохион байгуулалтыг олон улсын жишигт хүргэх шинэтгэлийг тал бүрээр дэмжиж, нийгэм, хүний сайн сайхны төлөө олон арван тэрбум төгрөгөөр тооцогдох төсөл, хөтөлбөр хэрэгжүүлж, бодитой дэмжлэг туслалцаа үзүүлсээр ирсэн олон улсын улаан загалмайн хороо, холбоо, донор, үндэсний нийгэмлэгүүд, засгийн газрууд, олон улсын байгууллагууд, манай оронд суугаа Элчин сайдын яамдад Монголын ард түмний нэрийн өмнөөс болон хувиасаа гүн талархал илэрхийлж, цаашдын ажил үйлст нь улам их амжилт хүсч байгаагаа илэрхийлжээ.
