Зарим түүх, соёлын дурсгалт газруудыг үзэж сонирхов
Монгол, Узбекистан улсууд түүхэн холбоо сүлбээтэй билээ.
Цагаадай хааныг дагаж Дундад Азид ирсэн Монгол аймаг болох Барлас омгийн удирдагчийн хүү Төмөр Дундад Азийн хамгийн том, хамгийн удаан оршин тогтносон эзэнт гүрнийг байгуулсан билээ. Түүхэнд Доголон Төмөр хэмээн алдаршсан энэ хүний нэрээр нэрлэсэн музейг 1996 онд БНУзбекистан Улсын Ерөнхийлөгчийн санаачилагаар Ташкент хотноо барьж байгуулжээ.
Самарканд, өнөөгийн Афганистан, Кавказ, Турк, Иран Ирак, Энэтхэгийг эзлэн авч, асар өргөн уудам газар нутагтай эзэнт гүрнийг байгуулсан Төмөр хаан, Чингисийн үйл хэргийг үргэлжүүлэх тангараг тавьж байжээ.
Доголон Төмөр хаан эзлэн булаах онцгой арга техниктэй, европын ихэнх улсуудтай дипломат харилцаа тогтоосон, анх удаа цэргүүдээ цалинтай болгосон, өөрийн цэргийн жанжин, байлдаан тулааныг дүрслэн харуулсан урлагийн бүтээл бүтээлгэдэг байсан зэргээрээ түүхэнд алдаршин үлджээ.
Энэ бүхнийг харуулсан түүхийн дурсгал, урлагийн бүтээлүүдийг дэлгэн тавьсан Төмөр хааны музей жуулчдын заавал очдог соёлын газар болсон байна.
Монгол Улсын Ерөнхийлөгч 6-р сарын 10-ны өдөр уг музейг үзэж сонирхсон юм.
Дараа нь Ерөнхийлөгч , Дундад Ази дахь мусульман шашны хамгийн том сүм болох Хасты-Имомыг үзлээ.
Уг сүмд, дэлхийн хамгийн эртний Коран судар эх хувиараа хадгалагдаж байна. Манай эриний 7-р зууны үед Коран судрыг 6 хувь бүтээсэн гэдэг бөгөөд, одоогийн байдлаар олдоод байгаа нь 4 ширхэг байгаа юм. Доголон Төмөр хаан уг Коран судрыг Иракаас Самаркандад авчирч байжээ. Харин 1924 оноос эхлэн Ташкент дахь сүмд хадгалагдаж байна.
Орой нь Ерөнхийлөгч , ШХАБ-ын дээд хэмжээний уулзалтад оролцож байгаа Төр засгийн тэргүүнүүдэд зориулсан хүндэтгэлийн концертийг үзэж сонирхлоо.
Зарим түүх, соёлын дурсгалт газруудыг үзэж сонирхов
