Бүгд Найрамдах Узбекистан Улсад ирэв
ШХАБ-ын дээд хэмжээний уулзалтанд оролцохоор БНУзбекистан Улсанд хүрэлцэн ирсэн Монгол Улсын Ерөнхийлөгч Ц.Элбэгдоржийг тус улсын Ерөнхий сайд Мирзияев Шавкад угтан авлаа.
Монгол Улсын Ерөнхийлөгч, ШХАБ-ын дээд хэмжээний уулзалтанд орох урилгыг хүлээн авч Ташкент хотноо ирсэнд талархаж байгаагаа Ерөнхий сайд хэлээд, улсынхаа хөгжил цэцэглэлтийн тухай товчхон танилцуулж, хоёр орны харилцааг хөгжүүлэх асуудлаар санал бодлоо ярилаа.
Узбекистан бол 27 сая хүн амтай, байгалийн баялаг арвинтай, хөрс шороо нь үржил шимтэй, хөвөнгийн тариалалт худалдаа, байгалийн хий, газрын тосны олборлолт, хөдөө аж ахуйн бүтээгдэхүүн үйлдвэрлэл хөгжсөн. Хүнсний бүтээгдэхүүн бараг импортолдоггүй бөгөөд, хүн амаа хэрэгцээт хүнсээр бүрэн хангадаг улс юм. Хөвөн, үр тариа, нэхмэл эдлэл, автомашин тус улсын экспортын гол бүтээгдэхүүн болж байна. Газар тариалангийн бодлогод өөрчлөлт оруулж, газрыг фермерүүдэд удаан хугацаагаар түрээслүүлдэг болсноос хойш тариалангийн төрөл зүйл олширч , хүмүүсийн орлого нэмэгдэх болжээ.
Эрчим хүчний хувьд гаднаас бүрэн хараат байдлыг халах бодлогыг амжилттай хэрэгжүүлж томоохон цогцолборуудыг барих болсон байна.
Ерөнхий сайд Мирзияев Шавкад, манай хоёр улс аялал жуулчлал, хөдөө аж ахуйн салбарт хамтын ажиллагааг хөгжүүлэх боломж байгаа тухай санал бодлоо хэлж байлаа.
Ерөнхийлөгч Ц.Элбэгдорж найрсгаар угтан авч байгаад талархлаа илэрхийлээд, түүхийн сэжмээр холбогдсон эртний холбоог тасалдуулахгүйгээр харилцаагаа хөгжүүлж, шинэ шинэ боломж давуу талуудаа ашиглан хамтран ажиллах тухай ярив.
Бүгд Найрамдах Узбекистан Улсад ирэв
