Монгол Улсын Ерөнхийлөгч Бурхан багшийн Их Дүйчин өдрийн ёслолд оролцов
Билгийн тооллын XVII жарны тийн урвагч хэмээгч цагаан бар жилийн зуны эхэн сарын шинийн 15-ны өдөр тохиож буй Бурхан багшийн Их дүйчин өдрийн буян номын ёслолын ажиллагаа энэ өдөр Монголын бурхан шашинтны төв Гандантэгчинлэн хийдэд өргөн дэлгэр болж байна.
Монгол Улсын Ерөнхийлөгч Ц.Элбэгдорж уг арга хэмжээний нээлтийн ёслол дээр сүсэгтэн олон, нийт ард түмэндээ хандаж үг хэлсэн бөгөөд дараа нь IX Богд Жэвзүндамба, Их хамба Д.Чойжамц нарын хамтаар Мэгжид Жанрайсиг шүтээн, Дүйнхор дацанд Бурхан багшийн “ринсрэлд” (бурхан багшийн чандраас залсан эрдэнийн үрэл) хүндэтгэл үзүүлсэн юм.
Уг арга хэмжээний нээлтийн ёслол дээр Монгол Улсын Ерөнхийлөгч хэлсэн үгэндээ, “Бурхан багшийн их дүйчэн өдрийг тэмдэглэх нь зөвхөн шашин номын зан үйл, хүрээ хийдийнхний ажил хэрэг төдий биш, манай нийт иргэд, үндэстний сэтгэл санааны ариусал, гэгээрэл, эв нэгдлийн өдөр байж, эрдэм номын баяр болж өргөжих ёстой.
Энэ бол “төр нь шашнаа хүндэтгэж, шашин нь төрөө дээдлэх” Монгол Улсын Үндсэн хуулийн үзэл санаа, зарчим хэрэгжиж буйн баталгаа юм.
...Манай монголчууд Буддын шашныг монгол хүн бүрийн сайхан сэтгэл, холч ухааны эх ундарга гэж хүндэтгэж ирсэн билээ. Эх орны хөгжил хүнээс, хүний хөгжил зөв сэтгэлээс эхтэй. Үүнд Монголын уламжлалт шашин, буддын гүн ухаан өөрийн үр шимээ өгсөн гэж хэлэх бүрэн үндэстэй.
Монголын ирээдүйд мэдлэг боловсролтой иргэнээс гадна зөв ухамсартай, зөв сэтгэлтэй хүн хэрэгтэй” хэмээн онцолсон юм.
Мөн хүндэтгэлийн арга хэмжээний үеэр IX Богд Жэвзүндамба Монголынхоо сүсэгтэн олонд хандаж айлдвар буулгасан юм. Тэрээр айлдвартаа, “Бурханы шашин нь энэрэл нигүүлсэл дээр суурилдаг онцлог ялгаатай ажгуу. Би амьдралын явцдаа энэрэл нигүүлслийг хөгжүүлснээр дотоод сэтгэлийн амар амгаланг олж болдгийг, муу үйлээс зовлонгийн үр дагавар гардгийг ухаарч мэдсэн. Иймд өчүүхэн гэлгүй бусдад хорлолтой муу үйлийг тэвчин асрал нигүүлслийн сэтгэлийг бий болгоорой.
Хүмүүс бид дотооддоо эв түнжинтэй байваас хамтын хүчээр нийгэм, улс орноо хөгжүүлж чадна. Үүнийг заавал хууль болон хүчээр зохицуулах ч шаардлага үгүй, лам хувраг ч болох албагүй, эгэл жирийн нэгэн байхад л хангалттай.
Залуу үе орчин цагийн мэдлэг болвсролыг эзэмших нь маш чухал. Дээрхийн Гэгээнтэн XIV Далай лам залуу үеийнхний боловсролд ихээхэн анхаарлаа хандуулдаг билээ. Монгол Улс ч гэсэн энэ талыг анхаарч байгаарай хэмээн хүсэж байна. Залуучууд та бүхэн ч орчин цагт боловсролыг дээдлэхийн зэрэгцээ үндэсний ёс заншил, уламжлалт өв соёлоо бүү мартаарай. Энэ бол бид бүхнийг хэн байх, ямар үндэстэн байхыг илэрхийлнэ. Мөн ачлалт аав ээж, амгалан жаргалангийн өлгий болсон эх орныхоо төлөө хичээнгүйлэн зүтгээрэй” хэмээн эрхэм сургаалиа хайрлалаа.
