Монгол Улсын Ерөнхийлөгч Ц.Элбэгдорж төрийн аливаа шийдвэрт эрдэмтэд, олон нийтийн санаа бодлыг тусган оновчтой, зөв шийдлийг байнга эрэлхийлж ажиллахыг эрхэмлэж байдаг юм.
Үүний илрэл болгож эдийн засгийн чиглэлээр үйл ажиллагаа явуулдаг Монгол Улсын томоохон Их, дээд сургуулиуд академийн байгууллагуудтай Монгол Улсын эдийн засаг, нийгмийн тулгамдсан асуудлуудаар мэдээлэл солилцох, шинжилгээ судалгаа хийх, санал дүгнэлт гаргах, зөвлөмж боловсруулах, онол практикын хурал зохион байгуулах, мэргэжлийн зөвлөмж, санал дүгнэлт гаргаж холбогдох байгууллагуудад хүргүүлэх, иргэдэд сурталчлан таниулах зэргээр үр дүнтэй хамтран ажиллахыг зорьж байна.
Энэ бүхний эхлэл болгон Монголбанкнаас боловсруулсан “Банкны салбарыг чадавхижуулж, өөрийн хөрөнгөөр дэмжих” хөтөлбөрийн талаар Монголбанк, Сангийн яам, Монголын банкны холбоо, Монгол Улсад үйл ажиллагаа явуулж буй арилжааны банкуудын удирдлага, Их, дээд сургуулиудын багш нарын баг, банкны чиглэлээр судалгаа, эрдэм шинжилгээний ажил туурвидаг эрдэмтэн, судлаачид оролцсон ажил хэрэгч хэлэлцүүлэг 2010 оны 05 дугаар сарын 20-нд болж өнгөрлөө.
Уг хэлэлцүүлэг 60 орчим хүн оролцож Монголын банкны салбарын өнөөгийн байдал, тулгамдаж буй асуудлууд, түүнийг шийдвэрлэх арга замын талаар талууд өргөн хүрээтэй ярилцаж харилцан байр сууриа солилцов.
