Говь-Алтай аймгийн Засаг дарга Г.Бямбажав Монгол Улсын Ерөнхийлөгчид бараалхаж, хаваржилт, цаг үеийн байдлын талаар мэдээллэв.
3 жил дараалан зуд болж, газрын гарц муу байсан Говь-Алтай аймагт энэ жил их хэмжээний цас орж, байгалийн гамшиг болсон билээ. Нэг үгээр бол өвлийг хүндхэн давсан.
“Өнгөрсөн өвөл, аймгийн нийт мал сүргийн гуравны нэг нь хорогдож, 29 тэрбум төгрөгийн хохирол учраад байна. Малынхаа 90-ээс дээш хувийг алдсан айл өрх 1600 байгаа. Эдгээр айл өрхийг тус бүр 70-100 толгой малтай болгоход нийт 4.5 тэрбум төгрөг шаардлагатай гэсэн тооцоог бид хийсэн. Засгийн газар, нутгийн зөвлөл, аж ахуйн нэгжүүд, сайн санаат хүмүүсийн тусламжаар бид малгүй болсон айл өрхүүдийн 60-70 хувийг малжуулах боломж харагдаж байгаа” гэж Засаг дарга Г.Бямбажав ярилаа.
Тэрээр , Монгол Улсын Ерөнхийлөгчид, хүнд хэцүү цаг үед өвөлжилтийн байдалтай газар дээр нь танилцаж, малчдыг сэтгэл санаагаар дэмжин, аймгийн удирдлага болон иргэдээс тавьсан асуудлуудыг цаг алдалгүй Засгийн Газрын хуралдаанд оруулж, чиглэл өгч, хэрэгжилтэнд нь анхаарал тавьж ажилласанд талархал илэрхийллээ.
Говь-Алтай аймгийн Засаг Дарга, энэ өвлөөс цөөнгүй сургамж үлдлээ гээд, зарим тодорхой асуудлуудыг танилцууллаа. Тухайлбал, бүх нийтээрээ өвөлжилтийн бэлтгэл ажлыг оны эхнээс хийж хэвших, орон нутгийн эрх мэдэлд тодорхой хэмжээний хөрөнгийн эх үүсвэр байлгах, багуудыг холбоожуулахад онцгой анхаарах зэрэг асуудлуудыг ярив. Аймгийн хэмжээнд хамгийн тулгамдсан асуудлуудын нэг болох ажлын байр нэмэгдүүлэх, иргэдийн амьжиргааны түвшинг дээшлүүлэх, цэвэр усны хангамж, гар аргаар алт олборлогчдыг цэгцлэх зэрэг асуудлуудаар Ерөнхийлөгч , Засаг даргатай санал солилцож ярилцлаа.
Ерөнхийлөгч, дараагийн өвлөөс урьтаж, хийх ажил, шийдвэрлэх асуудал цөөнгүй байгааг дахин сануулаад, тодорхой зарим асуудлуудаар чиглэл өглөө. Тухайлбал, Говь-Алтай аймгийн Дарви сумын улсын тэргүүний хоёр хоршооны туршлагыг аймгийн хэмжээнд төдийгүй, баруун бүс нутагт нэвтрүүлж, малчдыг хоршиж ажиллахыг дэмжихийг аймгийн Засаг даргад чиглэл болголоо.
“Хүнд хэцүү өвлийг хамгийн хохирол багатай давж гарсан нь Говь-Алтай аймгийн Дарви сумын хоршооны гишүүн -малчин өрхүүд байна. Малчид хоршиж ажиллаж, зэх зээлд оролцож, өвлийн бэлтгэлээ хийдэг энэ туршлагыг нэвтрүүлэх талаар Хүнс хөдөө аж ахуй, Хөнгөн үйлдвэрийн яамны албаны хүмүүс болон аймгийн удирдлага хамтран анхаарч, семинар, үзүүлэх сургалт зохион байгуулж, хэвлэл мэдээллийн хэрэгсээр өргөн сурталчлах хэрэгтэй” гэж Ерөнхийлөгч хэлэв.
Уулзалтын үеэр мөн, Засаг дарга Г.Бямбажав энэ оны 7-р сард болох Говь-Алтай аймгийн 70 жилийн ойн талаар мэдээлэл өглөө.
