2010 оны 5 дугаар сар 9-ний өглөө ОХУ-ын нийслэл Москва хотод Аугаа их Эх орны дайны ялалтын 65 жилийн ойн баярын ёслолын арга хэмжээ эхэллээ.
ОХУ ын Ерөнхийлөгч Д.А.Медведев Кремлийн ордны 2-р хаалгаар хүндэт зочдоо угтан мэндчилсний дараа, зочид төлөөлөгчид, ахмад дайчид Улаан талбайд суудлаа эзлэв.
1918 оноос хойш оросын түүхэнд хамгийн их бүрэлдэхүүнтэй, хамгийн өргөн хүрээг хамарсан дөрвөн том жагсаалын нэг хэмээн түүхэнд үлдэж байгаа Ялалтын 65 жилийн ойн баярын Цэргийн ёслолын жагсаал эхэллээ.
Кремлийн цаг арвантаа цохиход, ОХУ-ын Төрийн хүндэт харуулын дарга, хурандаа Максим Малаховоор удирдуулсан хүндэт харуулын цэргүүд ОХУ-ын төрийн далбааг Улаан Талбайд залан оруулж ирлээ. 65 жилийн өмнө Рейхстагийн орой дээр мандуулж, Дэлхийн 2-р дайн холбоотны ялалтаар дуусч байгааг зарлаж байсан Оросын далбаа өнөөдөр ийнхүү Аугаа их Ялалтын 65 жилийн ойн цэргийн ёслолын жагсаалын эхэнд Улаан талбайд хүндэтгэлтэйгээр орж ирлээ.
Москвагийн цэргийн хүрээний командлагч, хурандаа генерал Валерий Герасимов ОХУ-ын Батлан хамгаалахын сайд Анатолий Сердюковт рапорт өгсний дараа, Батлан хамгаалахын сайд ялалтын баярт бэлэн жагссан цэргүүдтэй мэндчилэн, баяр хүргэлээ.
Дараа нь ОХУ-ын Ерөнхийлөгч Д.А.Медведев үг хэлэв.
“Энэ дайн биднийг хүчтэй, эв нэгдэлтэй үндэстэн болгосон юм.. Ахмадууд маань бидэнд амь насаараа эрх чөлөөг олж өгсөн бөгөөд, энэ бол бидний хамгийн гол үнэт зүйл билээ. Цаг хугацаа хүчтэй ч, хүний ой ухаан түүнээс хүчтэй юм. Бид фронтод амиа алдсан эр цэргүүдээ, эрчүүдээ орлон үйлдвэрт хүнд хүчир ажил хийж, бүхнээ фронтод зориулж байсан эмэгтэйчүүдээ, бас насандаа баймааргүй эр зориг гаргаж, их үүрэг хүлээж байсан хүүхдүүдээ мартахгүй” гэлээ.
Ийнхүү ОХУ-ын Ерөнхийлөгчийг үг хэлсний дараа, Оросын Төрийн дуулал эгшиглэж цэргийн ёслолын жагсаал эхлэв.
Уламжлал ёсоор цэргийн ёслолын жагсаал гурван хэсгээс бүрдсэн бөгөөд, жагсаалын эхэнд явган цэргийн марш орж ирлээ. Дайны эхний өдрөөс эхлэн эх орноо хамгаалан тулалдсан арим дивизүүд, цэргийн сургуулийнхан, хилийн болон дотоодын цэргийнхэн жагслаа. Дэлхийн 2-р дайнд Зөвлөлтийн холбоотнууд болж оролцсон АНУ, Их Британи, Франц, Польш болон хуучин ЗХУ-ын бүрэлдэхүүнд байсан тусгаар улсуудын орнуудын цэргийн хүрээнийхнээс бүрдсэн нийт 10.5 мянган цэрэг энэхүү сүрт жагсаалд хөл тавилаа.
Дараа нь жагсаалын 2-р хэсэг болох зэвсэг техникийн хэсэг Улаан талбайд орж ирсэн бөгөөд, нийт 161 зэвсэг техник оролцсон юм.
Жагсаалын сэтгэл хөдөлгөм бас нэгэн үйл явдал болох агаарын цэргийн хүчнийхний үзүүлбэрт нийт 127 онгоц оролцож, Москвагийн тэнгэрт Оросын Төрийн далбааг үзүүлж, “65” гэсэн бичгээр утаан хөшиг татууллаа.
Цэргийн ёслолын жагсаал алдарт “День Победы” дуугаар өндөрлөлөө.
Дараа нь улс орны Төрийн тэргүүнүүд Александровский цэцэрлэгт хүрээлэн дэх Нэр нь үл мэдэгдэх цэргийн хөшөөнд цэцэг өргөж, дурсгалын зургаа татуулсан юм.
Дайнд онцгой гавъяа байгуулсан ахмад дайчид, цэргийн зүтгэлтнүүдэд зориулсан хүндэтгэлийн зоогт мөн Төрийн тэргүүнүүд оролцов.
