Монгол Улсын Ерөнхийлөгчийн санаачилсан Шүүхийн тухай хуульд нэмэлт, өөрчлөлт оруулах тухай хуулийн төслийг УИХ-ын дарга Д.Дэмбэрэлд Ерөнхийлөгчийн Тамгын газрын дарга Д.Дорлигжав, Хуулийн бодлогын зөвлөх Г.Ганзориг нар өргөн барилаа.
Хуулийн төсөлд Шүүхийн ерөнхий зөвлөл, Шүүхийн мэргэшлийн болон Сахилгын хорооны бүрэлдэхүүн бие даан, хараат бусаар ажиллах, улмаар мэргэжлийн байх нөхцлийг хангах, Шүүгчдийн зөвлөлийг ерөнхий шүүгч нараас бүрдүүлж байсныг өөрчилж, Шүүгчдийн зөвлөлгөөнөөс сонгож байгуулах журмыг санал болгожээ.
Түүнчлэн бүх шатны шүүхийн ерөнхий шүүгч нар, шүүгчид холбогдуулан сахилгын хэрэг үүсгэх, мэргэшлийн хороонд шилжүүлэх хүсэлт тавих зэргээр шүүгчийн хараат бус байдалд сөргөөр нөлөөлж байсан заалтыг хүчингүй болгохоор төсөлд тусгажээ.
Мөн Улсын дээд шүүхийн ерөнхий шүүгч Шүүхийн ерөнхий зөвлөлийн даргын албан тушаалыг хавсран гүйцэтгэж байсныг өөрчилж, Шүүхийн ерөнхий зөвлөлийн даргын албан тушаалыг байнгын орон тооны болгож, Ерөнхийлөгчөөс шууд томилж байхаар төсөлд санал болгосон байна.
