Монгол Улсын Ерөнхийлөгчийн ивээл дор зохион байгуулагдсан “Дуулиан 2020” хөл бөмбөгийн тэмцээний аваргууд тодорлоо
Монгол Улсын Ерөнхийлөгчийн ивээл дор дөрвөн жилийн өмнө эхэлж байсан өсвөрийн хөлбөмбөгчдийн “Дуулиан-2020” заалны хөлбөмбөгийн тэмцээн амжилттай болж өндөрлөлөө.
Тус тэмцээнд Улаанбаатар хотын нийт 63 сургуулийн 241 багийн 3000 гаруй өсвөрийн хөлбөмбөгчид өрсөлдсөн байна.
Энэхүү тэмцээнд 40 гаруй байгууллагууд ивээн тэтгэгчээр оролцсон бөгөөд дэлхийн хамгийн олон хөгжөөн дэмжигчитэй хөлбөмбөгийн спортод монголын ирээдүй болсон хүүхэд, залуучуудыг амжилттай оролцуулах баг тамирчдыг бэлтгэх зорилготой юм.
Тэмцээний 11 насны ангилалд 24 дүгээр сургууль алтан медаль, 6 дугаар сургууль мөнгөн медаль, 2, 5 дугаар сургуулиуд хүрэл медаль тус тус хүртсэн бол 13 насны ангилалд 14 дүгээр сургууль алтан медаль, Оюуны Ундраа цогцолбор сургууль мөнгөн медаль, 10, 20 дугаар сургуулиуд хүрэл медалийг тус тус хүртлээ.
Тэмцээний 15 насны ангилалд 2 дугаар сургууль алтан медаль, 72 дугаар сургууль мөнгөн медаль, 20, 5 дугаар сургуулиуд тус тус хүрэл медалийн эздээр тодров.
Мөн 17 насны ангилалд Оюуны Ундраа цогцолбор сургууль алтан медаль, 1 дүгээр сургууль мөнгөн медаль, 24, 58 дугаар сургуулиуд хүрэл медалийг тус тус хүртэв.
Охидын 13 насны ангилалд 72 дугаар сургууль алтан медаль, 10 дугаар сургууль мөнгөн медаль, Амгалан цогцолбор 58 дугаар сургууль хүрэл медалийн болзлыг тус тус хангасан бол охидын 15 насны ангилалд 16 дугаар сургууль алтан медаль, 10 дугаар сургууль мөнгөн медаль, 2 болон 14 дүгээр сургуулиуд хүрэл медалын болзлыг тус тус хангалаа.
Оюутны ангилалд УБДС алтан медаль, БХИС мөнгөн медаль, УБТДС, ШУТИС хүрэл медалийн эздээр тодорлоо.
Тэмцээний хамгийн сүүлчийн тоглолт болох 11 настай хүүхдүүдийн хөлбөмбөгийн тэмцээнийг үзэж сонирхсон Монгол Улсын Ерөнхийлөгч Ц.Элбэгдорж баг тамирчдад шагнал гардуулж хэлсэн үгэндээ, “Тэмцээнд оролцож байгаа хүүхдүүдийн дундаас Монголоороо овоглосон ирээдүйн Роналдо, Месси, Бекхем, Торрес нар шиг сайн тамирчид төрөн гарна гэдэгт миний бие итгэлтэй байна.Мөн энд хүүхэд, залуучуудыг ивээн тэтгэн оролцуулж байгаа бизнесийнхний дундаас дэлхийд алдартай Челси, Реал Мадрид, Барселона багийн эзэд шиг хүчирхэг, чадалтай багийн эзэд төрөн гарахыг ч үгүйсгэхийн аргагүй. Монгол Улсад хөлбөмбөг эрчимтэй хөгжих үндэс суурь нэгэнт тавигдлаа” хэмээн онцлон хэллээ.
Монгол Улсын Ерөнхийлөгчийн ивээл дор зохион байгуулагдсан “Дуулиан 2020” хөл бөмбөгийн тэмцээний аваргууд тодорлоо
