"Эрүүгийн хуульд нэмэлт, өөрчлөлт оруулах тухай" хуулийн төсөл
"ЭРҮҮГИЙН ХУУЛЬД НЭМЭЛТ, ӨӨРЧЛӨЛТ ОРУУЛАХ ТУХАЙ" ХУУЛИЙН ТӨСЛИЙН ТАНИЛЦУУЛГА
2010.02.25
2005 оны 10 дугаар сарын 5-ны өдрийн хуулиар соёрхон баталсан “Авилгалын эсрэг Нэгдсэн Үндэстний Байгууллагын конвенц”-д Монгол Улсын “Эрүүгийн хууль”-ийг нийцүүлэх, авлигын гэмт хэргээс урьдчилан сэргийлэх, таслан зогсоох, энэ төрлийн гэмт хэрэгтэй хийх тэмцлийг эрчимжүүлэх зорилгоор Монгол Улсын Ерөнхийлөгчөөс санаачилж “Эрүүгийн хуульд нэмэлт, өөрчлөлт оруулах тухай” энэхүү хуулийн төслийг боловсруулав.
Авлигын гэмт хэрэгт хүлээлгэх хариуцлага хөнгөн, энэ төрлийн гэмт хэргийн дийлэнх хэсэг нь гэмт хэргийн хөнгөн, хүндэвтэр ангилалд хамаарч байгаагаас энэ төрлийн гэмт хэрэгтэй тэмцэх хуулийн байгууллагын үйл ажиллагаа хязгаарлагдмал болж, нийгмийн хор аюул нь өсөн нэмэгдэж, ард түмний дургүйцлийг төрүүлж байна.
Тухайлбал, Эрүүгийн хуулийн 145/бусдын эд хөрөнгийг хулгайлах/, 146/бусдын эд хөрөнгийг булаах/, 148/бусдын эд хөрөнгийг залилан мэхлэж авах/, 150/бусдын эд хөрөнгийг завших, үрэгдүүлэх/ дугаар зүйлүүдэд онц их хэмжээгээр буюу хүндрүүлэх бүрэлдэхүүнтэй заасан гэмт хэргийг үйлдсэн этгээдэд 15 жил хүртэл хорих ял оногдуулахаар заасан боловч албан тушаалаа урвуулах, хэтрүүлэх, төсвийн хөрөнгийг зориулалтын бусаар зарцуулж онц их хэмжээтэй хохирол учруулсан гэмт хэрэг үйлдсэн албан тушаалтан этгээдэд 5 жил хүртэл хорих ял оногдуулж байхаар хуульчилсан байна. Өөрөөр хэлбэл гэмт хэргийн улмаас үүссэн хохирол нь адил хэмжээтэй байхад гэмт хэрэг үйлдсэн албан тушаалтанд харьцангуй бага, хөнгөн ял оногдуулахаар “Эрүүгийн хууль”-д заасан байна. Түүнчлэн бусдын эд хөрөнгийг хулгайлах, булаах, залилан мэхлэж авах, завших, үрэгдүүлэх гэмт хэрэг үйлдэж, онц их хэмжээний хохирол учруулсан гэмт хэргийг хүнд, онц хүнд гэмт хэргийн ангилалд, харин албан тушаалтны үйлдсэн их, онц их хэмжээний хохирол учруулсан гэмт хэргийг хүндэвтэр гэмт хэргийн ангилалд хамааруулах байдлаар хуульчлан тогтоосон нь “Үндсэн хууль”-д заасан “хууль шүүхийн өмнө эрх тэгш” байх зарчим зөрчигдөж, нийгмийн шударга ёс алдагдахад хүргэж байна.
Энэхүү зөрчилтэй байдлыг арилгах зорилгоор авлигын гэмт хэргийн зүйл хэсэгт хүндрүүлэх бүрэлдэхүүн нэмж, албан тушаалтанд оногдуулах эрүүгийн хариуцлагыг нэмэгдүүлж, эдгээр гэмт хэргийг “Эрүүгийн хууль”-д заасан “хүнд гэмт хэрэг” гэсэн ангилалд хамааруулж байхаар төслийг боловсрууллаа.
Эрүүгийн хариуцлагыг нэмэгдүүлэх аргачлалыг боловсруулахдаа “Эрүүгийн хууль”-ийн ялын талаархи ерөнхий ангийн заалт, тусгай ангид заасан өмчийн эсрэг адил төстэй гэмт хэрэгт оногдуулах ялын бодлоготой харилцан уялдаатай, нийцтэй байх зарчмыг баримталсан болно. Өөрөөр хэлбэл авлигын гэмт хэргийн үндсэн бүрэлдэхүүнд өөрчлөлт оруулж, хөнгөн, хүндэвтэр, хүнд гэсэн ангилалд багтааж, гэмт хэргийн бүрэлдэхүүний хувьд субьектээрээ ялгаатай өмчийн эсрэг бусад гэмт хэрэгт оногдуулах ял шийтгэлтэй адил байхаар дүйцүүлэн тооцож төслийг боловсруулсан болно.
Энэхүү төсөлд Эрүүгийн хуулийн холбогдох зүйл, хэсэгт дараахь агуулгатай нэмэлт, өөрчлөлт оруулахаар тусгаж, Улсын Их Хуралд өргөн мэдүүлж байна.
1. Эрүүгийн хуулийн Ерөнхий ангийн 46 дугаар зүйлийн 46.1.2 дахь хэсэг, 48 дугаар зүйлд заасан “тодорхой албан тушаал эрхлэх, үйл ажиллагаа явуулах эрхийг хасах” гэснийг “албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах” болгон өөрчлөн найруулж, хариуцлагыг нэмэгдүүлэн, нэгээс арван жил хүртэл хугацаагаар албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах нэмэгдэл ялыг шүүх оногдуулж байхаар хуульчлан оруулав.
2. Эрүүгийн хуулийн 70 дугаар зүйлийн 70.2 дахь хэсэгт авлига өгөх, авлига зуучлах гэмт хэрэг үйлдсэн этгээд сайн дураараа хэргээ илчилж ирсэн, хэрэг бүртгэх, мөрдөн байцаах, прокурор, шүүхийн байгууллага, албан тушаалтанд мэдэгдсэн нь өс хонзон, шунахай сэдэлт агуулаагүй бол түүнийг эрүүгийн хариуцлагаас чөлөөлдөг байхаар нэмэлт оруулж тусгав. Мөн хуулийн энэхүү шинэ заалттай уялдаатайгаар, хүнийг гэмт хэрэг үйлдсэн гэж зориуд худал мэдээлсэн болон шунахайн болон хувийн бусад сэдэлтээр үйлдсэн, эсхүл хүнийг хүнд буюу онц хүнд гэмт хэрэгт холбогдуулж буюу яллах нотлох баримтыг хуурамчаар бүрдүүлж худал мэдээлсэн гэмт хэргийн /Эрүүгийн хуулийн 252 дугаар зүйл/ хариуцлагыг нэмэгдүүлэхээр тусгалаа.
3. Эрүүгийн хуулийн 74 дүгээр зүйлийн 74.4 дэх хэсэгт “Цаазаар авах ял шийтгүүлж уучлагдсан, онц аюултай гэмт хэрэгтнээр тооцогдсон, түүнчлэн гэмт хэрэг үйлдэж учруулсан хохирлоо санаатайгаар нөхөн төлөөгүй, энэ хуулийн тусгай ангид заасан авлигын гэмт хэргийн бүлэгт хамаарах хүндэвтэр, хүнд, онц хүнд гэмт хэрэгт шийтгэгдсэн этгээдэд ял эдлэхээс хугацаанаас өмнө тэнсэн суллах журмыг хэрэглэхгүй” байхаар, 77 дугаар зүйлийн 77.3 дахь хэсэгт “...авлигын гэмт хэргийн бүлэгт хамаарах гэмт хэрэгт шийтгэгдсэн этгээдэд өршөөл үзүүлэхийг хориглоно” гэж нэмэлт орууллаа.
4. Эрүүгийн хуулийн “Өмчлөх эрхийн эсрэг гэмт хэрэг”-ийн бүлэгт хамаарах 150 дугаар зүйлийн нэрийг “Бусдын эд хөрөнгийг завших, үрэгдүүлэх, бусад аргаар зориулалтын бусаар зарцуулах” болгон өөрчилж, хүндрүүлэх бүрэлдэхүүнтэй 150.4 дэх хэсгийг нэмэн оруулж, хүлээлгэх эрүүгийн хариуцлагыг нэмэгдүүлэн өөрчлөн найрууллаа.
5. Эрүүгийн хуулийн “Албан тушаалын гэмт хэрэг” гэсэн хорин наймдугаар бүлгийн нэрийг “Авлигын гэмт хэрэг” болгон өөрчлөв.
6. Төрийн албан тушаалтан албаны бүрэн эрх, албан тушаалын байдлаа урвуулан ашиглаж хувьдаа болон бусдад давуу байдал олгосны улмаас төр, хуулийн этгээд, хувь хүний эрх, хууль ёсны ашиг сонирхлыг зөрчсөн гэмт үйлдлийг нарийвчлан томъёолж, хүндрүүлэх бүрэлдэхүүнийг нэмэн тусгаж, оногдуулах ялын хэмжээг нэмэгдүүллээ. Мөн Монгол Улсын Их Хурлын 2002 оны 73 дугаар тогтоолыг үндэслэн “албан тушаалтан болон төрийн өндөр албан тушаалтан” гэдэг ойлголтод чухам ямар хүмүүс хамаарахыг тодорхой нэг мөр болгох тайлбар хийлээ.
7. “Авилгалын эсрэг Нэгдсэн Үндэстний Байгууллагын конвенц”-ийн 16 дугаар зүйлд нийцүүлж, гадаадын төрийн албан тушаалтан болон олон улсын байгууллагын албан тушаалтан авилга авах /268 дугаар зүйл/, тэдэнд авлига өгөх /269 дүгээр зүйл/ үйлдлийг шинээр гэмт хэрэгт тооцож байхаар тусгав.
8. “Авилгалын эсрэг Нэгдсэн Үндэстний Байгууллагын конвенц”-ийн 20 дугаар зүйлд нийцүүлж, хууль бусаар хөрөнгөжих үйлдлийг шинээр гэмт хэрэгт тооцож байхаар тусгав.
9. Төрийн болон төрийн бус байгууллага, аж ахуйн нэгжийн албан тушаалтан албаны бүрэн эрх, албан тушаалын байдлаа урвуулах, хэтрүүлэх, албан хаагч хууран мэхлэх, албан тушаалтан албан үүрэгтээ хайнга хандах гэмт хэргүүдийн бүрэлдэхүүнд өөрчлөлт оруулж, хүлээлгэх эрүүгийн хариуцлагыг нэмэгдүүлэхээр төсөлд тусгав.
10. Авлигын гэмт хэргийн бүрэлдэхүүн хэсэг “Мөнгө угаах” гэмт хэргийг Эрүүгийн хуулийн 1661 дугаар зүйл буюу “Аж ахуйн гэмт хэрэг”-ийн бүлэгт хамааруулсныг 2701 дүгээр зүйл болгон өөрчлөн найруулав.
11. Төсвийн болон бусад хөрөнгийг зориулалтын бусаар зарцуулах гэмт хэрэгт хүлээлгэх эрүүгийн хариуцлагыг нэмэгдүүлэхээр тусгав.
--------------------000---------------------
Төсөл
ЭРҮҮГИЙН ХУУЛЬД НЭМЭЛТ ӨӨРЧЛӨЛТ ОРУУЛАХ ТУХАЙ ХУУЛИЙН ТӨСЛИЙН ҮЗЭЛ БАРИМТЛАЛ
НЭГ. ХУУЛИЙН ТӨСӨЛ БОЛОВСРУУЛАХ БОЛСОН ҮНДЭСЛЭЛ, ШААРДЛАГА
Монгол Улсын Их Хурлын “Монгол Улсын хууль тогтоомжийг 2012 он хүртэл боловсронгуй болгох Үндсэн чиглэл батлах тухай” 2009 оны 38 дугаар тогтоолын хавсралтад “Төрийн албанд иргэдийн итгэх итгэлийг дээшлүүлэх, авлигыг арилгах, албан хаагчийн үйл ажиллагааг ил тод болгож хувийн ашиг сонирхлын зөрчлөөс ангид байлгах эрх зүйн орчныг бүрдүүлэх” чиглэлээр хуулийн төслийг Монгол Улсын Ерөнхийлөгчөөс санаачлан оруулахаар тусгасан байна. Мөн “Авилгалын эсрэг Нэгдсэн Үндэстний Байгууллагын конвенц”-ийг Монгол Улсын Их Хурал соёрхон баталснаар уг конвенцийн 4 дүгээр зүйлийн 1 дэх хэсэгт “Оролцогч улсууд бүрэн эрхт тэгш байдал болон улсын нутаг дэвсгэрийн бүрэн бүтэн байдал, бусад улсын дотоод хэрэгт үл оролцох зарчмын дагуу энэхүү конвенцоор хүлээсэн үүргээ биелүүлнэ” гэж заасны дагуу үндэсний хууль тогтоомжоо түүнд нийцүүлэн өөрчлөх үүргийг хүлээх болсон. Конвенцийн энэ заалтын дагуу Монгол Улсын хүлээсэн үүргийг хэрэгжүүлэх боломж нөхцлийг хангах, Улсын Их Хурлын 2009 оны 38 дугаар тогтоолыг хэрэгжүүлэн, эрх зүйн салбарын шинэтгэлийн талаархи төрийн бодлогыг залгамжлан үргэлжлүүлэх, түүнчлэн авлигын гэмт хэргүүдэд хүлээлгэх эрүүгийн хариуцлагыг нэмэгдүүлэх хэрэгцээ, шаардлага нь “Эрүүгийн хуульд нэмэлт, өөрчлөлт оруулах тухай” хуулийн төслийг боловсруулах гол үндэслэл болж байна.
Энэхүү хуулийн төслийг боловсруулахдаа дараахь үзэл баримтлалыг удирдлага болгов. Үүнд:
1. Монгол Улсын Их Хурал соёрхон баталсан “Авилгалын эсрэг Нэгдсэн Үндэстний Байгууллагын конвенц”-д заасан ёсоор “Эрүүгийн хууль”-ийн холбогдох заалтуудыг уг конвенцид нийцүүлэх;
2. Авлигын шинжтэй зарим гэмт хэргийн бүрэлдэхүүнд өөрчлөлт оруулж, эрүүгийн хариуцлагыг нэмэгдүүлж, холбогдох адил төстэй бусад гэмт хэрэгт оногдуулах хариуцлагатай адилтгах;
3. Авлигын гэмт хэрэгтэй тэмцэх үйл ажиллагааны цогц байдлыг хангахын тулд дагалдах бусад хуульд нэмэлт, өөрчлөлт оруулах;
ХОЁР. ХУУЛИЙН ТӨСЛИЙН БҮТЭЦ, ЗОХИЦУУЛАХ ХАРИЛЦАА, ХАМРАХ ХҮРЭЭ
Энэхүү хуулийн төсөл нь 4 зүйлтэй байна. Төсөл дараахь харилцааг зохицуулна.
1. “Эрүүгийн хууль”-ийн ерөнхий ангийн эрүүгийн хариуцлагын зорилго, төрөл бүлэгт авлигын гэмт хэрэг үйлдсэн этгээдийг эрүүгийн хариуцлагаас чөлөөлөх эсэхтэй холбогдох асуудлаар тодорхой заалтуудыг нэмж тусгав.
Тухайлбал: Эрүүгийн хуулийн 70 дугаар зүйлд 70.2, 77 дугаар зүйлд 77.3 дахь хэсгийг нэмж, 252 дугаар зүйл, 74 дүгээр зүйлийн 74.4 дэх хэсэгт өөрчлөлт оруулав.
2. Албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах ялыг шинэчлэн найруулж, ялыг нэмэгдүүлэх бодлого баримтлав.
Тухайлбал: Эрүүгийн хуулийн 46 дугаар зүйл, 48 дугаар зүйлүүд.
3. Авлигын үйлдлийг шинээр гэмт хэрэгт тооцохоор “Эрүүгийн хууль”-д нэмэлт оруулсан.
Тухайлбал: Эрүүгийн хуулийн 270 дугаар зүйлд “2702 дугаар зүйл. Хууль бусаар хөрөнгөжих”
4. Авлигын зарим гэмт хэргийн бүрэлдэхүүн, тайлбарт өөрчлөлт оруулсан.
Тухайлбал: Эрүүгийн хуулийн 268, 269, 270, 1661 дугаар зүйлүүд.
5. Авлигын зарим гэмт хэргийн бүрэлдэхүүнд өөрчлөлт оруулж, хүлээлгэх эрүүгийн хариуцлагыг нэмэгдүүлсэн.
Тухайлбал Эрүүгийн хуулийн 263, 264, 265, 266, 271 дүгээр зүйлүүд
ГУРАВ. ХУУЛИЙН ТӨСӨЛ БАТЛАГДСАНЫ ДАРАА ҮҮСЧ БОЛОХ НИЙГЭМ, ЭДИЙН ЗАСАГ, ХУУЛЬ ЗҮЙН ҮР ДАГАВАР, ТЭДГЭЭРИЙГ ШИЙДВЭРЛЭХ ТАЛААР АВЧ ХЭРЭГЖҮҮЛЭХ АРГА ХЭМЖЭЭНИЙ САНАЛ
Энэхүү хуулийн төсөл батлагдсанаар Монгол Улс олон улсын гэрээний дагуу Нэгдсэн Үндэстний Байгууллагын өмнө хүлээсэн үүргээ биелүүлж, авлигын гэмт хэрэгтэй хийх тэмцлийн үйл ажиллагаа эрчимжинэ.
ДӨРӨВ. ХУУЛИЙГ ХЭРЭГЖҮҮЛЭХТЭЙ ХОЛБОГДОН ЦААШИД ШИНЭЭР БОЛОВСРУУЛАХ БУЮУ НЭМЭЛТ, ӨӨРЧЛӨЛТ ОРУУЛАХ, ХҮЧИНГҮЙ БОЛГОХ ХУУЛИЙН ТАЛААР
Энэхүү хуулийн төслийг дагалдуулан Төрийн албаны тухай хууль, Эрүүгийн байцаан шийтгэх хуульд нэмэлт, өөрчлөлт оруулах төслүүдийг боловсруулна.
--------------------000---------------------
Төсөл
МОНГОЛ УЛСЫН ХУУЛЬ
"ЭРҮҮГИЙН ХУУЛЬД НЭМЭЛТ, ӨӨРЧЛӨЛТ
ОРУУЛАХ ТУХАЙ"
1 дүгээр зүйл.Эрүүгийн хуульд дор дурдсан агуулгатай дараахь зүйл, хэсгийг нэмсүгэй.
1/ 70 дугаар зүйлийн 70.2 дахь хэсэгт:
70.2. Авлига өгөх, авлига зуучлах гэмт хэрэг үйлдсэн этгээд сайн дураараа хэргээ илчилж ирсэн, хэрэг бүртгэх, мөрдөн байцаах, прокурор, шүүхийн байгууллага, албан тушаалтанд мэдэгдсэн нь өс хонзон, шунахай сэдэлт агуулаагүй бол түүнийг эрүүгийн хариуцлагаас чөлөөлнө.
2/ 77 дугаар зүйлийн 77.3 дахь хэсэгт:
77.3. Энэ хуулийн тусгай ангийн авлигын гэмт хэргийн бүлэгт хамаарах гэмт хэрэгт шийтгэгдсэн этгээдэд өршөөл үзүүлэхийг хориглоно.
3/ 150 дугаар зүйлийн 150.4 дэх хэсэгт:
150.4.Энэ хэргийн улмаас онц их хэмжээний хохирол учирсан болхууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг арван жил хүртэл хугацаагаар хасч, арваас дээш арван таван жил хүртэл хугацаагаар хорих ял шийтгэнэ.
4/ 263 дугаар зүйлийн 263.3, 263.4 дэх хэсэгт:
263.3.Энэ хэргийг давтан буюу бүлэглэж үйлдсэн, уг хэргийн улмаас бусдад их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг найман жил хүртэл хугацаагаар хасч, таваас дээш найман жил хүртэл хугацаагаар хорих ял шийтгэнэ.
263.4.Энэ хэргийг төрийн өндөр албан тушаалтан үйлдсэн эсхүл хүнд хор уршиг учирсан, энэ хэргийн улмаас бусдад онц их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг арван жил хүртэл хугацаагаар хасч, арваас дээш арван таван жил хүртэл хугацаагаар хорих ял шийтгэнэ.
5/ 264 дүгээр зүйлийн 264.3 дахь хэсэгт:
264.3.Энэ хэргийг төрийн өндөр албан тушаалтан үйлдсэн эсхүл хүнд хор уршиг учирсан, энэ хэргийн улмаас онц их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг найман жил хүртэл хугацаагаар хасч, таваас дээш арван жил хүртэл хугацаагаар хорих ял шийтгэнэ.
6/ 265 дугаар зүйлийн 265.3 дахь хэсэгт:
265.3.Энэ хэргийн улмаас онц их хэмжээний хохирол учирсан, авлигын гэмт хэрэгт урьд шийтгэгдэж байсан этгээд үйлдсэн бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг арван жил хүртэл хугацаагаар хасч, таваас дээш арван жил хүртэл хугацаагаар хорих ял шийтгэнэ.
7/ 266 дугаар зүйлийн 266.3 дахь хэсэгт:
266.3.Энэ хэргийн улмаас онц их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг найман жил хүртэл хугацаагаар хасч, таваас дээш арван жил хүртэл хугацаагаар хорих ял шийтгэнэ.
8/ 2701 дугаар зүйлийн 2701.1 дэх хэсэгт:
2701 дүгээр зүйл. Мөнгө угаах
2701.1. Гэмт хэрэг үйлдэж олсон эд хөрөнгө гэдгийг мэдсээр байж түүний гарал үүслийг нуун далдалж уг эд хөрөнгийг эзэмших, ашиглах, захиран зарцуулах эрхээ хууль ёсны болгох зорилгоор хүлээн авсан, хадгалсан, ашигласан, шилжүүлсэн, хувиргасан, бусад байдлаар эргэлтэнд оруулсан бол албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ.
2701.2.Энэ хэргийг давтан буюу бүлэглэж, эсхүл албан тушаалын байдлаа ашиглаж үйлдсэн, түүчлэн их хэмжээний орлого олсон бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ.
2701.3.Энэ хэргийг зохион байгуулалттай бүлэг, гэмт бүлэглэл үйлдсэн, эсхүл онц их хэмжээний орлого олсон бол эд хөрөнгийг хурааж, арваас дээш арван таван жил хүртэл хугацаагаар хорих ял шийтгэнэ.
9/ 2702 дугаар зүйлд:
2702. дүгээр зүйл. Хууль бусаар хөрөнгөжих
2702.1. Албан тушаалтан болон албан тушаалаас огцорсон, чөлөөлөгдсөн, өөрчлөгдсөн, халагдсан этгээд хууль бусаар их хэмжээний хөрөнгө, орлого олсон бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг нь таваас дээш найман жил хүртэл хугацаагаар хасч, хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох эсхүл гурван жил хүртэл хугацаагаар хорих ял шийтгэнэ.
2702.2. Энэ гэмт хэргээс онц их хэмжээний орлого олсон, эсхүл төрийн өндөр албан тушаалтан болон уг албан тушаалыг хашиж байсан этгээд үйлдсэн бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг наймаас дээш арван жил хүртэл хугацаагаар хасч, хөдөлмөрийн хөлсний доод хэмжээг хоёр зуун тавин нэгээс таван зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас дээш найман жил хүртэл хугацаагаар хорих ял шийтгэнэ.
10/ 271 дүгээр зүйлийн 271.2 дахь хэсэгт:
271.2. Энэ гэмт хэргийг албан тушаалтан үйлдсэн, хэргийн улмаас хүний эрх, эрх чөлөө зөрчигдсөн, хохирол учирсан бол албан тушаал эрхлэх, мэргэжлийн болон тодорхой үйл ажиллагаа явуулах эрхийг гурваас дээш таван жил хүртэл хугацаагаар хасч, хөдөлмөрийн хөлсний доод хэмжээг хоёр зуун нэгээс гурван зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас зургаан сар хүртэл хугацаагаар баривчлах, эсхүл хоёроос дээш таван жил хүртэл хугацаагаар хорих ял шийтгэнэ.
2 дугаар зүйл. Эрүүгийн хуулийнзаримбүлэг, зүйл, хэсгийгдор дурдсанаар өөрчлөн найруулсугай.
1/ 46 дугаар зүйлийн 46.1.2 дахь заалтыг:
46.1.2. албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах;
2/ 46 дугаар зүйлийн 46.2 дахь хэсгийг:
46.2.Торгох, албадан ажил хийлгэх, баривчлах, хорих, цаазаар авах ялыг үндсэн ялын чанартай, албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах ялыг үндсэн ба нэмэгдэл ялын чанартай, эд хөрөнгө хураах ялыг зөвхөн нэмэгдэл ялын чанартай хэрэглэнэ.
3/ 48 дугаар зүйлийг:
48 дугаар зүйл. Албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах
48.1.Гэмт хэрэг үйлдсэн этгээдийн албан тушаал эрхлэх, мэргэжлийн болон тодорхой үйл ажиллагаа явуулах эрхийг энэ хуулийн тусгай ангид заасан тохиолдолд нэгээс арван жил хүртэл хугацаагаар хязгаарлахыг албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах ял гэнэ.
48.2. Албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах ялыг баривчлах, хорих ялд нэмэгдэл ялын чанартай оногдуулсан бол хугацааг нь үндсэн ялыг эдэлж дууссан үеэс эхлэн тоолох ба хорих ялыг тэнссэн бол хугацааг нь шүүхийн шийтгэх тогтоол хүчин төгөлдөр болсон үеэс эхлэн тоолно.
48.3. Албан тушаал эрхлэх, мэргэжлийн болон тодорхой үйл ажиллагаа явуулах эрхийг хасах ялыг торгох, албадан ажил хийлгэх ялд нэмэгдэл ялын чанартай оногдуулсан бол хугацааг нь шүүхийн шийтгэх тогтоол хүчин төгөлдөр болсон үеэс эхлэн тоолно.
4/ 74 дүгээр зүйлийн 74.4 дэх хэсгийг:
74.4.Цаазаар авах ял шийтгүүлж уучлагдсан, онц аюултай гэмт хэрэгтнээр тооцогдсон, түүнчлэн гэмт хэрэг үйлдэж учруулсан хохирлоо санаатайгаар нөхөн төлөөгүй, энэ хуулийн тусгай ангид заасан авлигын гэмт хэргийн бүлэгт хамаарах гэмт хэрэгт шийтгэгдсэн этгээдэд ял эдлэхээс хугацаанаас өмнө тэнсэн суллах журмыг хэрэглэхгүй.
5/ 77 дугаар зүйлийн 77.2 дахь хэсгийг:
77.2. Уучлал үзүүлэх тухай Монгол Улсын Ерөнхийлөгчийн зарлигаар ялтанг ял эдлэхээс хэсэгчлэн болон бүрэн чөлөөлж болно. Уучлал үзүүлэхийг хүссэн хүсэлтийг ялтан өөрөө буюу хууль ёсны төлөөлөгч нь гаргана.
6/ 252 дугаар зүйлийг:
252 дугаар зүйл. Зориуд худал мэдээлэх
252.1.Хүнийг гэмт хэрэг үйлдсэн гэж зориуд худал мэдээлсэн бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ял шийтгэнэ.
252.2.Энэ хэргийг шунахайн болон хувийн бусад сэдэлтээр үйлдсэн, эсхүл хүнийг хүнд буюу онц хүнд гэмт хэрэгт холбогдуулж буюу яллах нотлох баримтыг хуурамчаар бүрдүүлж худал мэдээлсэн бол хоёроос дээш таван жил хүртэл хугацаагаар хорих ял шийтгэнэ.
7/ 150 дугаар зүйлийг:
150 дугаар зүйл. Бусдын эд хөрөнгийг завших, үрэгдүүлэх, бусад аргаар зориулалтын бусаар зарцуулах
150.1.Аж ахуйн нэгж, байгууллага, иргэдийн өмчийг итгэмжлэгдэн хариуцсан этгээд завшсан буюу үрэгдүүлсэн, бусад аргаар зориулалтын бусаар зарцуулсны улмаас бага бус хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг гурван жил хүртэл хугацаагаар хасч, хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
150.2.Энэ хэргийн улмаас үлэмж хэмжээний хохирол учирсан болхууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хоёроос таван жил хүртэл хугацаагаар хорих ял шийтгэнэ.
150.3.Энэ хэргийн улмаас их хэмжээний хохирол учирсан болхууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг найман жил хүртэл хугацаагаар хасч, таваас дээш арван жил хүртэл хугацаагаар хорих ял шийтгэнэ.
8/ ХОРИН НАЙМДУГААР БҮЛЭГ:
“АВЛИГЫН ГЭМТ ХЭРЭГ”
9/ 263 дугаар зүйлийг:
263 дугаар зүйл. Төрийн албан тушаалтан албаны бүрэн эрх, албан тушаалын байдлаа урвуулах
263.1.Төрийн албан тушаалтан албаны бүрэн эрх, албан тушаалын байдлаа урвуулан ашиглаж хувьдаа болон бусдад давуу байдал олгосны улмаас төр, хуулийн этгээд, хувь хүний эрх, хууль ёсны ашиг сонирхлыг зөрчсөн бол албан тушаал эрхлэх, мэргэжлийн болон тодорхой үйл ажиллагаа явуулах эрхийг гурван жил хүртэл хугацаагаар хасч, хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
263.2. Энэ хэргийн улмаас бусдад үлэмж хэмжээний хохирол учирсан болхууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хоёроос таван жил хүртэл хугацаагаар хорих ял шийтгэнэ.
Тайлбар:
1. Энэ бүлэгт дурдсан “Төрийн албан тушаалтан” гэдэгт Төрийн албаны тухай хуулийн 5 дугаар зүйлийн 5.1-д заасан албан тушаал эрхэлж буй тангараг өргөсөн албан хаагчийг хамааруулан ойлгоно.
2. “Төрийн өндөр албан тушаалтан” гэдэгт Улсын Их Хурлын 2002 оны 11 дүгээр сарын 08-ны өдрийн “Төрийн өндөр албан тушаалтны зэрэг зиндаа, түүнтэй адилтгах төрийн албан тушаалтны зэрэглэлийг шинэчлэн тогтоох тухай” 73 дугаар тогтоолд заасан албан тушаал эрхэлж буй этгээдийг хамааруулан ойлгоно.
10/ 264 дүгээр зүйлийг:
264 дүгээр зүйл. Төрийн албан тушаалтан бүрэн эрх, албан тушаалын байдлаа хэтрүүлэх
264.1.Төрийн албан тушаалтан албан үүргийн хувьд хуулиар олгогдсон эрх хэмжээгээ хэтрүүлснээс төр, хувь хүн, хуулийн этгээдийн эрх, хууль ёсны ашиг сонирхлыг зөрчсөн эсхүл үлэмж хэмжээний хохирол учруулсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг гурван жил хүртэл хугацаагаар хасч, хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
264.2.Энэ хэргийг давтан буюу бүлэглэж, эсхүл хүч хэрэглэж буюу хүч хэрэглэхээр заналхийлж үйлдсэн, түүнчлэн энэ хэргийн улмаас их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хоёроос дээш таван жил хүртэл хугацаагаар хорих ял шийтгэнэ.
11/ 265 дугаар зүйлийг:
265 дугаар зүйл. Төрийн бус байгууллага, аж ахуйн нэгжийн албан тушаалтан бүрэн эрхээ урвуулах
265.1.Төрийн бус байгууллага, аж ахуйн нэгжийн албан тушаалтан хувьдаа болон бусдад давуу байдал тогтоох, ашиг хонжоо олох зорилгоор хууль тогтоомж, дүрмээр олгогдсон албан тушаалын бүрэн эрхээ урвуулан ашигласны улмаас төр, хувь хүн, хуулийн этгээдийн эрх, хууль ёсны ашиг сонирхлыг зөрчсөн эсхүл үлэмж хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг гурван жил хүртэл хугацаагаар хасч, хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
265.2.Энэ хэргийг давтан үйлдсэн, эсхүл их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хоёроос дээш таван жил хүртэл хугацаагаар хорих ял шийтгэнэ.
12/ 266 дугаар зүйлийг:
266 дугаар зүйл. Төрийн бус байгууллага, аж ахуйн нэгжийн албан тушаалтан бүрэн эрхээ хэтрүүлэх
266.1.Төрийн бус байгууллага, аж ахуйн нэгжийн албан тушаалтан албан үүргийн хувьд хууль тогтоомж, дүрмээр олгогдсон бүрэн эрхээ хэтрүүлсний улмаас төр, хувь хүн, хуулийн этгээдийн эрх, хууль ёсны ашиг сонирхлыг зөрчсөн, эсхүл үлэмж хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг хоёр жил хүртэл хугацаагаар хасч, хөдөлмөрийн хөлсний доод хэмжээг тавиас нэг зуун хорин тав дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
266.2.Энэ хэргийг давтан үйлдсэн, түүнчлэн энэ хэргийн улмаас их хэмжээний хохирол учирсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг хоёроос дээш таван жил хүртэл хугацаагаар хасч, хөдөлмөрийн хөлсний доод хэмжээг нэг зуун хорин таваас хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл хоёроос дээш таван жил хүртэл хугацаагаар хорих ял шийтгэнэ.
13/ 268 дугаар зүйлийг:
268 дугаар зүйл. Авлига авах
268.1.Албан тушаалтан, гадаадын төрийн албан тушаалтан эсхүл олон улсын байгууллагын албан тушаалтан бусдад давуу байдал олгох зорилгоор албаны үүргээ хэрэгжүүлэх, эсхүл хэрэгжүүлэхгүй байхаар урьдчилан амлах буюу амлахгүйгээр өөрөө эсхүл бусдаар дамжуулан авлига өгөхийг бусдаас шаардсан, авлига авсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, найман жил хүртэл хугацаагаар хорих ял шийтгэнэ.
268.2.Энэ хэргийг төрийн өндөр албан тушаалтан үйлдсэн, хясан боогдуулах замаар, эсхүл давтан буюу урьд авлигын хэрэгт шийтгүүлсэн этгээд, түүнчлэн зохион байгуулалттай бүлэг, гэмт бүлэглэл үйлдсэн, эсхүл их буюу онц их хэмжээний авлига авсан бол хууль бусаар олсон эд хөрөнгийг хурааж, албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, наймаас дээш арван таван жил хүртэл хугацаагаар хорих ял шийтгэнэ.
14/ 269 дүгээр зүйлийг:
269 дүгээр зүйл. Авлига өгөх
269.1.Албан тушаалтанд өөрөө буюу бусдаар дамжуулж авлига өгсөн бол хоёроос дээш таван жил хүртэл хугацаагаар хорих ял шийтгэнэ.
269.2.Энэ хэргийг давтан, эсхүл авлигын хэрэгт урьд ял шийтгүүлсэн этгээд, түүнчлэн зохион байгуулалттай бүлэг, гэмт бүлэглэл үйлдсэн, гадаадын төрийн албан тушаалтан эсхүл олон улсын байгууллагын албан тушаалтанд өгсөн эсхүл их буюу онц их хэмжээний авлига өгсөн бол таваас дээш арван жил хүртэл хугацаагаар хорих ял шийтгэнэ.
15/ 270 дугаар зүйлийг:
270 дугаар зүйл. Авлига зуучлах
270.1.Авлига зуучилсан бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
270.2.Энэ хэргийг давтан, эсхүл авлигын хэрэгт урьд ял шийтгүүлсэн этгээд, түүнчлэн албан тушаалынхаа байдлыг ашиглаж үйлдсэн, эсхүл их буюу онц их хэмжээний авлига зуучилсан бол албан тушаал эрхлэх, мэргэжлийн болон тодорхой үйл ажиллагаа явуулах эрхийг таван жил хүртэл хугацаагаар хасч, хоёроос дээш таван жил хүртэл хугацаагаар хорих ял шийтгэнэ.
16/ 271 дүгээр зүйлийг:
271 дүгээр зүйл. Албан хаагч хууран мэхлэх
271.1.Албан хаагч баримт бичигт зориуд худал мэдээ оруулсан, худал бичсэн, засвар оруулсан, түүнчлэн баримт бичгийг зориуд хуурамчаар үйлдсэн бол албан тушаал эрхлэх, мэргэжлийн болон тодорхой үйл ажиллагаа явуулах эрхийг гурван жил хугацаагаар хасч, хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорих ял шийтгэнэ.
Тайлбар: Албан хаагч гэдгийг Төрийн албаны тухай хуулийн 11 дүгээр зүйлд зааснаар ойлгоно.
17/ 272 дугаар зүйлийг:
272 дугаар зүйл. Албан тушаалтан албан үүрэгтээ хайнга хандах
272.1.Албан тушаалтан хууль тогтоомж, түүний дагуу гарсан дүрэм, журмаар тодорхойлогдсон албан үүргээ биелүүлээгүй буюу зохих ёсоор биелүүлээгүйгээс бага бус хэмжээний хохирол учирсан бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах, хоёр жил хүртэл хугацаагаар хорихял шийтгэнэ.
272.2.Энэ хэргийн улмаас хүнд хор уршиг учирсан бол албан тушаал эрхлэх, мэргэжлийн болон тодорхой үйл ажиллагаа явуулах эрхийг гурваас дээш таван жил хүртэл хугацаагаар хасч,хоёроос дээш таванжил хүртэл хугацаагаар хорих ял шийтгэнэ.
18/ 273 дугаар зүйлийг:
273 дугаар зүйл. Төрийн өмч, төсвийн хөрөнгийг зориулалтын бусаар зарцуулах
273.1.Төсөв захирагч төрийн өмч, төсвийн хөрөнгийг:
273.1.1. зориулалтын бусаар зарцуулсан;
273.1.2. зах зээлийн дунджаас дээгүүр үнээр эд хөрөнгө худалдан авсан;
273.1.3. нөөцлөх нэрээр хэрэгцээнээс илүү хэмжээгээр бараа бүтээгдэхүүн худалдан авч, мөнгөний эргэлтийг саатуулсан;
273.1.4. зохиомол хомсдол бий болгох замаар бараа бүтээгдэхүүн бэлтгэн нийлүүлэх үнийг зориудаар өсгөсөн;
273.1.5. төрийн өмчийн болон төсөвт байгууллагын эд хөрөнгийг зах зээлийн дунджаас доогуур үнээр борлуулсан;
273.1.6.улсын төсвийн болон өөрийн хөрөнгө оруулалтаар баригдаж байгаа барилга байгууламж, тоног төхөөрөмжийн угсралтад шаардлага хангаагүй бараа бүтээгдэхүүн ашиглах замаар төсөвт өртгийг бүрдүүлж хөрөнгө завшсанаас үлэмж хэмжээний хохирол учирсан бол хууль бусаар олсон эд хөрөнгийг хурааж, тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч, хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас зургаан сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэнэ.
273.2.Энэ хэргийн улмаас их буюу онц их хэмжээний хохирол учирсан бол хууль бусаар олсон эд хөрөнгийг хурааж, тодорхой албан тушаал эрхлэх, үйл ажиллагаа явуулах эрхийг арван жил хүртэл хугацаагаар хасч, таваас дээш арван таван жил хүртэл хугацаагаар хорих ял шийтгэнэ.
3 дугаар зүйл. Эрүүгийн хуулийн 1661 дүгээр зүйл, хэсгийг хүчингүй болсонд тооцсугай.
4дүгээр зүйл. Энэ хуулийг 20...оны … дугаар сарын …-ны өдрөөс эхлэн дагаж мөрдөнө.
--------------------000---------------------
Төсөл
МОНГОЛ УЛСЫН ХУУЛЬ
"ЭРҮҮГИЙН БАЙЦААН ШИЙТГЭХ ХУУЛЬД НЭМЭЛТ, ӨӨРЧЛӨЛТ
ОРУУЛАХ ТУХАЙ"
1 дүгээр зүйл. Эрүүгийн байцаан шийтгэх хуулийн 27 дугаар зүйлийн 27.3 дахь хэсгийн “263.2.” гэсний дараа “, 263.3.” гэж, “264.2.” гэсний дараа “,264.3.” гэж, “265” гэсний дараа “.2., 265.3.” гэж, “266.2.” гэсний дараа “, 266.3.” гэж, “270.2./Хээл хахууль зуучлах/,” гэсний дараа “,2701/Мөнгө угаах/, 2702/Хууль бусаар хөрөнгөжих/” гэж тус тус нэмсүгэй.
2 дугаар зүйл. Эрүүгийн байцаан шийтгэх хуулийн 27 дугаар зүйлийн 27.3 дахь хэсгийн “268/Хээл хахууль авах/”гэснийг “268/Авлига авах/”, “269/Хээл хахууль өгөх/” гэснийг “269/Авилга өгөх/”, “270.2./Хээл хахууль зуучлах/” гэснийг “270.2./Авлига зуучлах/”, “273.2./Төсвийн хөрөнгийг зориулалтын бусаар зарцуулах/” гэснийг “273/Төрийн өмч, төсвийн хөрөнгийг зориулалтын бусаар зарцуулах/” гэж өөрчилсүгэй.
3дугаар зүйл.Эрүүгийн байцаан шийтгэх хуулийн 26 дугаар зүйлийн 26.2 дахь хэсгийн “273.1./Төсвийн хөрөнгийг зориулалтын бусаар зарцуулах /”гэснийг, 27 дугаар зүйлийн 27.3 дахь хэсгийн “273.2.” гэсний “.2.” гэснийг тус тус хассугай.
3дугаар зүйл. Энэ хуулийг 20...оны … дугаар сарын …-ны өдрөөс эхлэн дагаж мөрдөнө.
--------------------000---------------------
Төсөл
МОНГОЛ УЛСЫН ХУУЛЬ
"ТӨРИЙН АЛБАНЫ ТУХАЙ ХУУЛЬД НЭМЭЛТ, ӨӨРЧЛӨЛТ
ОРУУЛАХ ТУХАЙ"
1 дүгээр зүйл. Төрийн албаны тухай хуулийн 16 дугаар зүйлийн 16.2 дахь хэсэгт 16.2.5 дахь заалтыг нэмсүгэй.
16.2.5. Эрүүгийн хуулийн “Авлиглын гэмт хэрэг” бүлэгт хамаарах гэмт хэрэг үйлдэж, шүүхээр ял шийтгүүлсэн этгээдийн ялгүй болох хугацаа дууссанч төрийн албанд авч ажиллуулахыг хориглоно.
2дүгээр зүйл. Энэ хуулийг 20...оны … дугаар сарын …-ны өдрөөс эхлэн дагаж мөрдөнө.
--------------------000---------------------
"Эрүүгийн хуульд нэмэлт, өөрчлөлт оруулах тухай" хуулийн төсөл
