Хүндэт зочид оо !
Эрхэмсэг ноёд, хатагтай нар аа!
Эрхэм генерал, офицер, ахлагч нар аа !
Юуны өмнө энд хуран цугласан Та бүхний энэ өдрийн амар амгаланг айлтган мэндчилье.
Монгол Улсын Зэвсэгт хүчний цэргийн алба хаагчид НҮБ-ын мандаттай энхийг сахиулах болон олон улсын бусад ажиллагаанд үүрэг гүйцэтгэж 2002 оноос эхэлснээс хойших хугацаанд өнөөдөр манай гаригийн 4 тивийн 9 улсад манай Зэвсэгт хүчний бие бүрэлдэхүүн, цэргийн ажиглагчид үүргээ нэр төртэй гуйцэтгэж эх орон, төр, ард түмнийхээ нэр хүндийг дэлхийн тавцанд өндөрт өргөн мандуулж яваад Монгол Улсын Ерөнхийлөгч, Зэвсэгт хүчний Ерөнхий командлагчийн хувьд туйлын талархалтай байгаагаа илэрхийлэхэд таатай байна. Энэхүү түүхэн хариуцлагатай үүрэг, энхийг дэмжих үйл ажиллагаа бол Монгол Улс олон улсын хамтын нийгэмлэгийн бүрэн эрхт гишүүнийхээ хувьд өөрийн үүргийг гүйцэтгэхийн зэрэгцээ улс орныхоо аюулгүй байдлыг улс төр, дипломатын аргаар бататган бэхжүүлж байгаагийн хамгийн бодитой илрэл болж байгаа юм.
Өнөөдөр Монгол Улсыг, тэр дундаа эрэлхэг зоригт Монгол цэргийг дэлхий дахин аль хэдийн таньдаг болсон төдийгүй, манай улсын нэр хүнд дэлхийн тавцанд улам бүр өсөн нэмэгдсээр байгааг дэлхийн улс орнуудын Төрийн тэргүүн өндрөөр үнэлсээр байгаад сэтгэл нэн ханамжтай байна.
Энд онцлон өнгөрсөн онд манай улсад айлчилсан НҮБ-ын Ерөнхий нарийн бичгийн дарга Бан Ги Мүн Монгол цэргийн хатуу чанд сахилга, өндөр зохион байгуулалт, үүрэг гүйцэтгэх чадварыг бахархан тэмдэглэж, цаашид бүх талаар дэмжиж ажиллахаа мэдэгдсэн нь олон улсын зүгээс өгч байгаа томоохон үнэлгээ, дүгнэлт бөгөөд манай Зэвсэгт хүчний бие бүрэлдэхүүний байгуулсан гавъяа, эх оронч үзлийн тод үлгэр жишээ болж байна.
Өнгөрсөн хугацаанд Зэвсэгт хүчний цэргийн алба хаагчид "Иракийн эрх чөлөө" ажиллагаанд үүргээ нэр төртэй биелүүлэн дуусгавар болгосны дээр Афганистан Улсад сургалтын хөдөлгөөнт бүлгийг томилон ажиллуулсан ба энэ жилээс эхлэн Чад Улс, Төв Африкийн Бүгд Найрамдах Улсад явагдаж байгаа НҮБ-ын мандаттай MINURCAT энхийг сахиулах ажиллагаа, Афганистан Улсад явагдаж байгаа "Тогтвортой эрх чөлөө" ажиллагаанд цэргийн багаа оролцуулаад байна.
Сьерра Леоне Улсад явагдаж байгаа НҮБ-ын мандаттай энхийг сахиулах ажиллагаанд манай улс 2006 оны нэгдүгээр сараас эхлэн үүрэг гүйцэтгэж ирсэн бөгөөд өнгөрсөн хугацаанд 2000 гаруй цэргийн алба хаагч, түүний дотор Хил хамгаалах Ерөнхий газар, Цагдаа, Шүүхийн шийдвэр гүйцэтгэх ерөнхий газар, Тагнуулын ерөнхий газар, Дотоодын цэргийн алба хаагчид энэ бүрэлдэхүүнд багтсанаараа ихээхэн ач холбогдлоо өгсөн гэж дүгнэж байна.
Ингэснээр Монгол Улсын үндэсний аюулгүй байдлыг хангах тусгайлсан чиг үүрэг бүхий байгууллагуудын хамтын ажиллагааг хөгжүүлэхэд ихээхэн түлхэц өгч, манай цэргийн алба хаагчдын цэргийн хэргийн болон мэргэжлийн ур чадвар, гадаад хэлний мэдлэг дээшлэх, бие бялдар-сэтгэл зүйн бэлтгэлжилт дээшлэх, гадаад орнуудын цэргийн алба хаагчидтай харилцан туршлага солилцох өргөн боломж нээгдэж байгаа юм.
Монгол хүн амны билгээр гэдэг. Сьерра Леон Улсад НҮБ-ын мандаттай энхийг сахиулах ажиллагааны ҮIII ээлжинд үүргээ нэр төртэй гүйцэтгэсэн Та бүхний эхний ээлжийн бүрэлдэхүүн Билгийн тооллын хаврын улирлын сар шинийн нэгний өдөр эх орондоо ирж, эцэг, эх, төрөл садан, гэр бүлийнхэнтэйгээ баяр дүүрэн золгож байсныг миний хувьд сонсоод билэгшээж байсан билээ.
Ингээд өнөөдөр Монгол Улсын Ерөнхийлөгчийн зарлигаар Төрийн дээд одон, медаль хүртсэн Та бүхэнд баяр хүргэж, цаашдын ажил, албанд тань их амжилтыг хүсэн ерөөе !
Мөн цэргийн багийн бие бүрэлдэхүүнтэй сэтгэл, зүрхээрээ хамт байж, сэтгэл санааны гүн дэмжлэг үзүүлж ирсэн эцэг, эх, гэр бүл, үр хүүхдүүдэд аз жаргал, сайн сайхан бүхнийг хүсэн ерөөж, цагаан бар жилдээ аз хиймориор дүүрэн байхын өлзийтэй ерөөлийг дэвшүүлье.
Монгол эх орон минь улам бүр цэцэглэн хөгжиж, өнө эртний түүхтэй Монгол цэргийн сүлд хийморь, гавъяат үйлс үеийн үед бадрах болтугай!
