Эрхэм хүндэт зочид төлөөлөгчид өө,
Эрхэм хүндэт хатагтай ноёд оо,
Ардчиллын мөн чанар, амин сүнс нь үзэл бодлоо чөлөөтэй илэрхийлэх, эвлэлдэн нэгдэх, хэвлэн нийтлэх эрх чөлөөнөөс эхэлдэг билээ.
Өнөөдөр бид Түүний хамгийн гол шалгуур болсон “дөрөвдэгч засаглал”ын төлөөлөгчид болох хэвлэл мэдээллийн байгууллагын шилдгийн шилдэг бүтээл тодруулах шинэ үеийн “Балдорж” шагналын түүчээг эхлүүлэх гэж байна.
Юуны өмнө Та бид нэгэн эрхэм хүнийг хүндэтгэн дурсахаар цугларсан билээ. Түүний хийж бүтээж, туурвиж ирсэн, түмэн олондоо цогцлоон байгуулж ирсэн бүхэн нь үеийн үед үнэ цэнэтэй учраас түүний алдрыг мөнхлөхөөр чуулаад байна.
Энэ хүн бол Монголын шинэ үеийн сэтгүүл зүйд өөрийн гэсэн дэг сургуулийг үндэслэгч нэрт сэтгүүлч, төр, нийгмийн зүтгэлтэн Цэрэндоржийн Балдорж байлаа.
Ц.Балдорж бол гарамгай сэтгүүлч, нийтлэлч, түүхч, хамт олноо манлайлагч, бас шинийг санаачлагч, эх орноо гэсэн халуун сэтгэлтэй нэгэн байв.
Түүний байгаль дэлхийгээ хайрласан, эх орноо энэрсэн олон арван нийтлэлүүд болон кино, жүжгийн зохиолууд нь Монголын шинэ, хуучин нийгмийн өнгө ялгарсан тусгал болж хойч үеийнхэндээ сургамж өгсөөр ирсэн билээ.
Өдгөө энэхүү түүхэн хүний нэрэмжит “Балдорж” хэмээх Монголын сэтгүүл зүйн шилдгийн шилдэг, онцгой бүтээлд зориулсан шагналын анхны эзэн тодрох гэж байна. Энэ шагналын нэр төр, цар хүрээ нь монголын сэтгүүл зүйг хөгжлийн шинэ шатанд гаргах бодит урам зориг, чанар чансаа болно гэдэг би итгэлтэй байна.
Хагас зуун жилийн тэртээх Монголын хөдөөх талд өсч торнисон балчир хүү, өдгөө 21 дүгээр зууны өндөрлөгөөс эргэн харахад эх орныхоо шинэ үеийн түүхэнд ямар үнэ цэнэтэй хувь нэмэр оруулсныг бид хүндэтгэн дурсч байна. Бидний хүндэтгэл шингэсэн түүний хүсэл тэмүүлэл, эрч хүч дүүрэн бүтээл бүхэн нь өрнөх ирээдүйд улам хол замыг туулан ямагт сайн сайхнаар дурсагдсаар байх бизээ.
Дэлхийд алдартай утга зохиол, сэтгүүл зүйн Пулитзерийн шагналын нэгэн адил Монголын шинэ үеийн сэтгүүл зүйн гэрэлт луужин болсон шинэ өнгө аяс, шинэ тэмүүллийн эхлэл “Балдорж” шагналын ёслолын ажиллагаанд амжилт хүсье.
Энэ нэр хүндтэй шагналыг үүсгэн буй болгож байгаа Балдорж агсны гэр бүл, хань ижил, үр хүүхэд болоод эрхэм дотны андуудад нь талархал илэрхийлье.
Монголын сэтгүүл зүй улам өөдөө байж хүний эрх, эрх чөлөөний дээд үнэлэмж болсон ардчилсан ёсны мөнхийн харуул байх болтугай.
Анхаарал тавьсан та бүхэнд баярлалаа.
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ
