Монгол Улс, ОХУ-ын хамтарсан тактик-тусгай бэлтгэлийн “Дархан-2” сургуулийн хаалтын ажиллагаан дээр Монгол Улсын Ерөнхийлөгч, Зэвсэгт Хүчний Ерөнхий Командлагч Ц.Элбэгдоржийн хэлсэн үг

2009 оны 09-р сарын 10-нд Бусдад түгээх

Эрхэм хүндэт зочид оо! Монгол Улс, ОХУ-ын хамтарсан “Дархан-2” сургалт, дадлагад оролцсон эрхэм генерал, офицер, ахлагч, дайчид аа! Эрхэм нөхөд өө! Та бүхний энэ өдрийн түмэн амгаланг айлтган мэндчилье. Өнө удаан жилийн буурал түүхтэй, мөнхийн хөрш Монгол Улс, ОХУ-ын найрамдал нөхөрлөл, харилцан ашигтай хамтын ажиллагаа улс төр, нийгэм, эдийн засаг төдийгүй батлан хамгаалах чиглэлээр өргөжин хөгжиж байна. Монгол, Оросын ард түмэн эрх чөлөө, тусгаар тогтнолын төлөө тэмцлийн шуурган галд ч, энх цагийн бүтээн багйуулалт, өнөө цагийн ардчилал, зах зээл, нийгмийн дэвшлийн төлөө ямагт хамт явсаар ирсэн, өнөөдөр ч хамт байна. Сүүлийн жилүүдэд хоёр орны төрийн тэргүүнүүд болон төр, засгийн дээд хэмжээний харилцан айлчлал, тэдгээрийн явцад хийсэн гэрээ, хэлэлцээрүүд амжилттай хэрэгжиж, тэр бүхэн Монгол Улсын нийгэм, эдийн засгийн хөгжил, шинэчлэл өөрчлөлтөд үнэтэй хувь нэмэр оруулж байгаад Төрийн тэргүүний хувьд талархалтай байгаагаа илэрхийлье. Энэ бүхний тод жишээ бол ОХУ-ын Ерөнхийлөгч Димитрий Медведев Халхын голын байлдааны ялалтын 70 жилийн ойн үеэр Монгол улсад айлчилж, хоёр орны Зэвсэгт хүчнүүдийн энхийг дэмжих ажиллагаанд оролцох болон олон талт үүрэг гүйцэтгэх чадавхийг нэмэгдүүлэх зорилго бүхий “Дархан-2” сургалт, дадлагын явцтай биечлэн танилцсан явдал юм. Энэхүү хамтарсан сургалт, дадлага нь Монголын Зэвсэгт хүчний энхийг дэмжих ажиллагаанд оролцох зэвсэглэл, техникийн бэлэн байдал, үүрэг гүйцэтгэх чадварыг дээшлүүлэхэд чухал ач холбогдолтой арга хэмжээ болсон гэж үзэж байна. Түүнчлэн “Зэвсэгт хүчний байгуулалтыг 2015 он хүртэл хөгжүүлэх хөтөлбөр”-т зэвсэглэл, техникийг шинэчлэн сайжруулах талаар дэвшүүлсэн зорилго, зорилтыг хэрэгжүүлэхэд чухал алхам боллоо. Цаашид ийм бодитой, олон талт хамтын ажиллагааг хөгжүүлэх бүхий л санал, санаачилгыг тууштай дэмжин ажиллахаа Зэвсэгт хүчний Ерөнхий командлагчийн хувьд энэ мөчид илэрхийлж байна. Монгол улс, ОХУ-ын ард түмнүүдийн найрамдал, Зэвсэгт хүчнүүдийн дайчин нөхөрлөл улам бэхжин хөгжих болтугай!