Өдөр тутмын “Өнөөдөр” сонин, тухайн онд ажил үйлс, алдар гавъяагаараа монгол түмнээ манлайлсан хүмүүсийг санал асуулгаар тодруулдаг уламжлалтай билээ.
Шороон үхэр жилийн Алдартнуудыг нийгмийн салбар бүрийн төлөөлөл болсон 100 хүний саналаар тодруулахад Монгол Улсын Ерөнхийлөгч Цахиагийн Элбэгдорж тэргүүллээ.
“Хорин жилийн тэртээ ардчилсан хувьсгалыг удирдан манлайлж, түүнийг ялалтанд хүргэхийн төлөө цуцалтгүй тэмцэж яваа эх оронч Таныг, шударга ёсыг тогтоох, алдагдсан эрх , эрх чөлөө, ардчиллын үнэт зүйлсийг эргүүлэн авчирч өгнө гэсэн итгэлээр монголын ард түмэн дөрөв дэх Ерөнхийлөгчөөрөө залсан. Ардчилсан Ерөнхийлөгч маань зөвийг хэвшүүлэхийн төлөө олон чухал санал,санаачилга дэвшүүлж буй. Иргэн хүн төрд үгээ хэлэх Иргэний танхимыг нээж, хүний эрх эрх чөлөөг эрхэмлэсэн манай нийгэмд цаазаар авах ял байж болохгүй гэж үзэж байгаагаа зарласан нь хүний эрхийг дээдлэгч хүн бүрийн төдийгүй, дэлхий нийтийн дэмжлэгийг хүлээж байгаа билээ” хэмээн Өнөөдөр сонин дүгнэжээ.
Хүндэт өргөмжлөлийг гардан авах үеэрээ Ерөнхийлөгч Ц.Элбэгдорж “ Чөлөөт хэвлэлийн манлай болсон “Өнөөдөр” сонины хамт олон баярлалаа. Өнгөрч буй шороон үхэр жилийг шар өнгөтэй гэлцдэг. Үнэхээр ч аваргын түрүү, атрын түрүү гээд бидэнд шар өнгө ээлтэй, амжилт арвинтай жил байлаа. Монголын ард түмэн ирж буй бар жилдээ буян заяа нь өөдрөг, амжилт нь арвин байхын ерөөлийг дэвшүүлье” гэлээ.
Шороон үхэр жилийн бусад алдартнуудаар, Монгол Улсын 25 дахь Ерөнхий сайд Санжаагийн Баяр, Жүдо бөхийн дэлхийн аварга Хашбаатарын Цагаанбаатар, Боксын дэлхийн аварга Пүрэвдоржийн Сэрдамба, Монгол Улсын Ерөнхий сайд Сүхбаатарын Батболд, ДБЭТ-ын дуучин Содномцэрэнгийн Мөнгөнцэцэг, Сүмогийн их аварга Долгорсүрэнгийн Дагвадорж, МУ-ын ЗГ-ын Шадар сайд Миеэгомбын Энхболд, УИХ-ын гишүүн Эрдэнийн Бат-Үүл нар тус тус шалгарчээ.
