Эдийн засгийн сэдвээр өргөн хүрээнд ярилцдаг хамгийн том, хамгийн голлох үүрэгтэй, анхаарал татсан арга хэмжээнүүдийн нэг болох Давосын эдийн засгийн чуулга уулзалт 40 дэх удаагаа зохиогдож байгаа билээ. Дэлхийн лидерүүд, эдийн засагчид, бизнесменүүд, банк санхүүгийн томчуудыг нэг дор цуглуулж чаддаг энэхүү арга хэмжээний амжилт нэгэн хүнтэй салшгүй холбоотой.
Тэр бол Дэлхийн эдийн засгийн чуулга уулзалтыг үндэслэгч, тус байгууллагын дарга , профессор Клаус Шваб юм.
“Гайхалтай санаа гаргаж, түүнийгээ амжилттай хэрэгжүүлсэн Дэлхийн хүн” хэмээн Ерөнхийлөгч Ц.Элбэгдорж түүнтэй уулзахдаа хэллээ. 32 настай байхдаа “Эдийн засгийн менежментийн чуулган” хэмээх төрийн бус байгууллагыг Давос хотноо бүртгүүлж, анхны хуралдаанаа 350 хүнтэй эхлүүлж байсан тэрээр өнөөдөр ч чуулга уулзалтаа гардан зохион байгуулж байна.
Клаус Шваб, 1970 онд Харвардын Их сургууль төгсөн, эх орондоо эргэж ирээд нэгэн их сургуулийн тэнхимийн эрхлэгчтэй хамтран ийм чуулга уулзалт зохион байгуулах санаа гаргаж байснаа дурслаа. Тэрээр, Монгол улсын Ерөнхийлөгчийг энэ жилийн чуулганд урьсан бөгөөд, энэхүү урилгыг хүлээн авч, чуулганд идэвхтэй оролцож, өөрийн санал санаачлагаа дэвшүүлж байгаад нь Ерөнхийлөгчид баяр хүргээд, зарим тодорхой асуудлуудаар хамтран ажиллахыг хүслээ.
Ерөнхийлөгч Ц.Элбэгдорж, Давосын хүрээнд явагддаг бүсийн чуулга уулзалтын ээлжит хуралдааныг Монгол улсад хийх талаар санал тавьсан. Мөн ноён Клаус Швабыг эх орондоо айлчлахыг урив.
