Монгол Улсын Ерөнхийлөгч өө,
УИХ болон ЗГ-ын гишүүд ээ,
Хүндэт зочид оо,
Монгол Улсын Ерөнхийлөгч өөрийн гаргах бодлого, шийдвэрийн төслөө олон нийтээр нээлттэй хэлэлцүүлэх зорилгоор Иргэний танхим байгуулж ажиллуулах болсонд нэн баяртай байна. Энэхүү Иргэний танхим иргэд үндсэн хуулиар олгогдсон төрийг удирдах хэрэгт оролцох эрхээ бүтээлчээр эдлэхэд үнэтэй хувь нэмэр оруулах нь дамжиггүй.
Хүний суурь эрхийн нэг болох улс төрийн эрхэнд төрийн бодлого боловсруулах, түүний хэрэгжилтэд хяналт тавих эрх нь сонгох сонгогдох эрхийн нэгэн адил чухал байр суурь эзэлдэг. Өөрөөр хэлбэл, иргэдийн оролцоо нь төлөөллийн ардчиллын нэн чухал, салшгүй бүрэлдэхүүн хэсэг, ардчиллын тулгуур зарчим юм. Ийм ч учраас 1992 оны ардчилсан үндсэн хуульд “Иргэд шууд буюу төлөөллийн байгууллагаараа дамжуулан төрийг удирдах хэрэгт оролцох эрхтэй” хэмээн заасан байдаг.
Харин өнөөдрийг хүртэл төрийн бодлого боловсруулах үйл явцад иргэдийн оролцоог хангах тогтмол үйл ажиллагаатай, албан ёсны, нээлттэй суваг манай төрд байгаагүй. Ийм суваг иргэд, иргэний нийгэмд үгүйлэгдсээр ирсэн. Нээлттэй сонсгол нь төрийн ил тод байдлыг хангаж, ашиг сонирхлыг нь хөндсөн аливаа асуудлаар иргэд байр суурь, үзэл бодлоо илэрхийлэн оролцох боломж олгодог үйл явц юм.
Өнөөдөр нээлтээ хийж байгаа Иргэний танхимын бий болгож буй энэхүү сайхан боломжийг иргэд, иргэний нийгмийн байгууллагууд бүрэн дүүрэн ашиглаж, энэ танхимд болж байх нээлттэй хэлэлцүүлэгт бүтээлчээр оролцоно гэдэгт найдаж байна.
Бодлого боловсруулах үйл явцад иргэдийн бүтээлч оролцоо нэмэгдсэнээр төрийн бодлого нийтийн эрх ашигт илүүтэй нийцэж, тэр хэрээр олон нийтийн дэмжлэг хүлээж, тогтвортой хэрэгжиж, улс орны хөгжил дэвшилд үнэтэй хувь нэмэр оруулах нэг үндэс бүрэлдэнэ. Нээлттэй сонсголд хэрхэн бэлтгэж оролцох талаар Нээлттэй Нийгэм Форум иргэдэд зориулсан гарын авлага хэвлэн гаргасныг энэ дашрамд дуулгахад таатай байна.
Иргэний танхимын үйл ажиллагаанд өндөр амжилт хүсье.
Төрийн бодлого мэргэн байх болтугай.
