Монгол Улсын Их Хурал 76 гишүүнтэй юм гэсэн. Нам, улс төрийн харъяалал байхгүй иргэдээс ч юм уу сонгогдсон нэг нөхөр байдаг юм байна лээ. Тэр нь би юм шиг байна лээ. Надад төрийн ордон дотор хааяа нэг ганцаардал байдаг, зарим хаалга үүд надад цоожтой юм шиг байдаг. Оръёо гэхээр намын бүлэг хуралдаж байна, нам шийдвэр гаргаж байна, чи цаанаа байж байхгүй юу гэдэг. Ер нь явж явж надад ганцхан нээлттэй байдаг газар нь хоолны газар.
Иргэний танхим нээлтээ хийж байна. Надад орох нэг сайхан өрөөтэй боллоо гэж бодож байна. Би ганцаараа байсан бол өнөөдөр би бүлэгтэй боллоо гэж бодож байна. Нам улс төрийн бүлэг гэж байдаг бол надад иргэдийн, ард түмний, иргэний бүлэг байна. Бүр болохгүй бол би Иргэний танхимын Их хурал дахь төлөөлөл болж бүлгийн дарга нь ч болж болж байна.
Ард түмний дуу хоолой, иргэдийн дуу хоолойг манай парламентын гишүүд, улс төрчид сонсох дургүй ч юмуу, тийм байдал ажиглагддаг. Далан зургаан мундаг мэргэн нөхдүүд бүх юмыг мэддэг, бүх юмыг ойлгодог, үе үед хангамж нь дархлагдаад суучихсан, одоо ч засгийн эрх барьж байгаа ийм л улсууд л даа.
Энэ цонхны цаана болж байгаа процессыг энэ танхим дотор оруулах юмсан гэдэг бодол, хүсэл үнэхээр их төрдөг. Яаж оруулах юм бэ гэдэг учраа олохгүй бас хэсэг хугацаанд явсан. Энэ сууж байгаа Энхболд гишүүн бид хоёр ийм танхимтай болох юмсан гэж хөөцөлдөж үзсэн, хөрөнгө мөнгө босгох гэж үзсэн. Хэцүү юм байна лээ, хаанаас санхүүжих вэ, яаж цалинжуулах вэ, хэнтэй хамтрах вэ, тэгээд яах вэ гэдэг олон олон асуудал гарч ирдэг юм байна.
Манай Ерөнхийлөгч энэ сайхан танхимыг байгуулаад нээлттээ хийж байгаад их талархаж байна. Ард иргэдийн хүсч байсан ийм л зүйлийг өнөөдөр бий болголоо. Үнэхээр нам ч үгүй, бүлэг ч үгүй над шиг хүнд энэ олон найз нөхөдтэй болно гэдэг сайхан байна. Энд дандаа миний найз нар цуглах юм байна. 2,7 сая хүн амтай уулзаж чадахгүйгээс хойш тэр улсуудын төлөөлөл болсон, иргэний нийгмийн байгууллын энэ олон хүмүүс ирж , ард түмэн ингэж хүсч байна, ингэж бодож байна, ингэмээр байна гэдэг тэр мессежийг надад өгөх юм байна. Би Их Хурлын суудал дээрээс ганц муу бие даагч Алтай биш, миний ард түмэн байгаа, Иргэний танхим байгаа, иргэний төлөөлөл байгаа гэдгээр улам илүү чанга дуугарч цээжээ цохих боломж нээгдэж байна гэж бодож байгаа.
Энэ танхим дандаа нээлттэй байгаасай билээ гэж хүсье. Цоож хийсэн байна Ерөнхийлөгч өө, энэ танхимд цоож хэрэггүй, дандаа нээлттэй, дандаа онгорхой, энэ дуу хоолой, иргэдийн үзэл бодлоор дандаа амьсгалж байгаасай гэдгийг хэлэх байна.
Та нар хүсвэл Иргэний танхимын нэрийн өмнөөс Монгол Улсын Их Хуралд дуу хоолой болж ажиллах гэж байгаадаа их баяртай байна. Бид олуулаа боллоо, яасан сайхан юм бэ! Баярлалаа танд.
