Монгол Улсын Эрхэм хүндэт Ерөнхийлөгч өө,
Эрхэм хатагтай, ноёд оо,
Та бүхэнд энэ өдрийн мэндийг дэвшүүлье.
Монгол Улсын Ерөнхийлөгчийн дэргэд ажиллах Иргэний танхим нээлтээ хийж байгаа явдалд Монгол Улсын Их Хурлын нэрийн өмнөөс болон хувиасаа баяр хүргэж байгааг минь хүлээн авна уу.
Төрийн бодлого тодорхойлох, хууль тогтоомжийг боловсруулж батлахад ард иргэд анхнаас нь оролцож хуулийг амьдрах, хэрэгжих чадвартай болгох, үндэслэл бүхий шийдвэр гаргахад ардчилсан төрийн нэгэн шинж оршдог билээ.
Монгол Улсын Ерөнхийлөгч нь хууль санаачлагч нэгэн субьект болохын хувьд улс орны өмнө тулгамдсан асуудлуудаар хууль санаачилж, төрийн бодлого боловсруулахад иргэдийн дуу хоолойг сонсч, оролцоог нь зохих түвшинд хангаж ажиллахаар санаачлага гарган, өөрийн дэргэд ийм бүтэц бий болгож байгаа нь Монгол Улсын төрийн албаны хувьд үнэхээр шинэ алхам болж байна.
Иргэд, олон нийтийн санаа бодлыг сонсч, хууль тогтоол, төрийн бодлогод саналыг нь тусгах чиглэлээр УИХ ч мөн тодорхой алхмуудыг хийж, шаардлагатай эрх зүйн орчинг бүрдүүлэхэд анхаарч ажиллаж байгаа.
Эхний шатанд УИХ-ын байнгын хороодын түвшинд тодорхой асуудлаар нээлттэй хэлэлцүүлэг, дэд хороодын түвшинд нээлттэй сонсгол хийх асуудлыг хуульчлан зохицуулж, ажил хэрэг болгож байгааг Та бүхэн харж байгаа. Ерөнхийлөгч ч манай саяханы явуулсан Нээлттэй сонсголын тухай хэлсэн үгэндээ дурьдсан. Цаашид УИХ энэ талаар бодитой ажил хийхээр төлөвлөж байгааг энэ дашрамд Иргэний танхимын индрээс хэлэх нь зүйтэй болов уу хэмээн бодож байна.
УИХ ингэж ажиллахдаа Үндсэн хуулиар хууль тогтоогчдод олгосон эрх, хариуцлагын хүрээнд төрийн дээд эрх барих, хэрэгжүүлэх бусад субьект байгууллагуудынхаа үйл ажиллагаатай давхцуулалгүйгээр ажиллахын зэрэгцээ, УИХ-ын гишүүдээр дамжуулан иргэдийн хүсэл эрмэлзэл, дуу хоолой, байр суурийг шийдвэртэй тусгах үндсэн үүргээ тууштай хэрэгжүүлэх зарчмыг барьж ажиллаж байна.
Нөгөө талаар иргэд бодлого боловсруулах, шийдвэр гаргахад хуульд заасан эрх үүргийнхээ хүрээнд илүү бодитой мэдлэг, мэдээлэлтэй оролцох, ардчилалын нийтээр хүлээн зөвшөөрөгдсөн соёлд суралцахад ч гэсэн Иргэний танхим, түүнтэй ижил төстэй үйл ажиллагаа явуулдаг байгууллагуудын үүрэг хариуцлага нэн чухал юм. Эцсийн дүндээ энэ нь манай залуу ардчилалыг бэхжүүлэх, ардчилалыг хэлбэрээс нь агуулгад жинхэнэ утгаар нь шилжүүлж төлөвшүүлэхэд тодорхой хувь нэмэр оруулсан алхам болно хэмээн үзэж байна.
Ерөнхийлөгч мөн өөрийн үгэндээ дурьдсны адил, өнгөрөгч 20 жилийн хугацаанд бидний анхаарлаасаа хамгийн хол байлгасан, эсвэл зориуд анхаарал тавихгүй байсан нэгэн зүйл бол ардчилсан нийгмийн иргэдийн ардчилалын соёл юм. Иргэний танхим, УИХ дээр явуулж буй нээлттэй хэлэлцүүлэг, нээлттэй сонсголууд нь Монгол Улсын иргэд ардчилалын соёлд суралцаж, төлөвшиж, төрийн бодлого шийдвэрт хариуцлагатай оролцох нөхцлийг бүрдүүлнэ гэж үзэж байна.
Өнгөрсөн жилүүдэд бид тодорхой хэмжээгээр мэргэжлийн улс төрчдийг бий болгожээ. Зарим нь өөрсдийгөө мэргэжлийн улс төрчид гэж боддог, зарим нь бол үнэхээр мэргэжлийн улс төрчид. Харин одоо бид ардчилсан нийгмийн мэргэжлийн иргэд буюу “мэргэжлийн ардчилсан иргэд”-ийг бий болгож, сэтгэлгээний өөрчлөлт хийх хамгийн том зорилттой болоод байна. Энэ нь миний өмнө дурьдсанчлан, ардчилалыг хэлбэрээс агуулга руу жинхэнэ утгаар нь шилжүүлэх ажилд юун түрүүнд тавигдаж буй зорилт бөгөөд энэ зорилтод хүрэхэд өнөөдөр шинээр байгуулагдан, үүд хаалгаа нээж буй Иргэний танхим чухал үүрэг гүйцэтгэнэ гэж бодож байна.
Иргэний танхимаас гарч буй санал зөвлөмжүүд зөвхөн Ерөнхийлөгчийн хууль санаачлах боловсруулах ажилд бус, УИХ, Засгийн газрыг үйл ажиллагаагаа явуулахад бодитой хувь нэмэр, хөрс суурь болно гэж бодож байна.
Эцэст нь хэлэхэд, энэ танхим, энэ индэр эхнээсээ өндөр нэр хүндтэй байгаасай хэмээн хүсч байна. Анхаарал тавьсан та бүхэнд баярлалаа.
Иргэний Танхимын цаашдын ажилд өндөр амжилт хүсье.
