Монгол Улсын Ерөнхийлөгч Ц.Элбэгдорж Улсын Их Хурлын чуулганд цаазаар авах ялыг түдгэлзүүлэх тухай үг хэлсэнтэй холбогдуулж НҮБ-ын Монгол Улс дахь Суурин төлөөлөгчийн газраас 2010 оны нэгдүгээр сарын 18-нд мэдэгдэл гаргажээ.
Тус мэдэгдэлд,
“Монгол Улс цаазаар авах ялын эсрэг мораториум зарлаж, тус ялыг бүрмөсөн халах явдалд бодитой алхам хийснийг НҮБ талархан хүлээн авлаа. НҮБ нь тус ялыг халах бодлогыг тууштай дэмждэг билээ. 2007 онд НҮБ нь Ерөнхий Ассамблейн чуулганаараа тус ялыг дэлхий даяараа халах уриалгыг дэвшүүлсэн юм.
Энэхүү мэдэгдэлд цаазаар авах ялыг устгах зорилгоор мораториум зарласан орнуудыг тус ялыг бүр мөсөн халах шийдвэр гаргаж, цаазаар авах ял шийтгэгдсэн хүмүүсийн эрхийг хамгаалахыг уриалж байна.
Мөн цаазаар авах ялыг халсан орнуудыг энэхүү ял шийтгэлийг хууль эрх зүйн тогтолцоондоо дахин оруулахгүй байхыг уриалж байгаа юм.
2007 оны нэгдүгээр сарын 11-нд НҮБ-ын Ерөнхий Нарийн Бичгийн Дарга Бан Ги Мүн Цаазаар авах ялыг устгах зорилго бүхий олон улсын санаачилгууд нэмэгдэж буйг онцлон тэмдэглээд, энэхүү үйл ажиллагааг сайшааж байгаагаа илэрхийлсэн билээ.
1998 оны Олон Улсын Иргэний болон Улс Төрийн Эрхийн Амлалтын гэрээнд нэмэгдэн орсон Цаазаар авах ялын сайн дурын протоколын 20 жилийн ойгоор, НҮБ-ын Хүний Эрхийн Дээд Коммиссар Нави Пиллэй хэлэхдээ: “Цаазаар авах ялыг халах нь нарийн төвөгтэй алхам юм. Энэхүү сайн дурын протоколд гарын үсэг зурах нь улс орнуудын хувьд бүх нийтийн өргөн хэлэлцүүлгийн үр дүнд шийдвэрлэх асуудал байдаг. Дээрхи шийдэлд хүрээгүй улсуудыг сайн дурын протоколд гарын үсэг зурж, цаазаар авах ялыг усгах зорилтыг тавин моратариум зарлахыг зөвлөж байна” гэж дурьдсан байдаг.
Монгол Улс 2010 оны нэгдүгээр сарын 14-нд цаазаар авах ялыг устгах зорилгоор мораториум зарласныг НҮБ сайшаан хүлээж авч байгаа бөгөөд олон улсын хүний эрхийн хэм хэмжээнд нэгдэн, ирээдүйд энэхүү ялыг бүрмөсөн халахыг дэмжиж байна” гэжээ.
