Бүгд Найрамдах Польш Улсаас Монгол Улсад суух Онц бөгөөд Бүрэн эрхт Элчин сайд ноён Тадеуш Хомицки өнөөдөр Монгол Улсын Ерөнхийлөгч Ц.Элбэгдоржид итгэмжлэх жуух бичгээ өргөн барив.
Итгэмжлэх жуух бичгээ өргөн барьсны дараа Монгол Улсын Ерөнхийлөгч Ц.Элбэгдорж Элчин сайд Т.Хомицкиг хүлээн авч уулзсан бөгөөд тэрээр, “Монгол, Польш улсууд түүхэн урт удаан хугацаанд харилцаа, холбоотой байсан. Энэ жил дипломат харилцаа тогтоосны 60 жил тохиож буй түүхэн жил. Бидний хоёр талын харилцаа, хамтын ажиллагаа улам бүр өргөжин тэлэх учиртай. Польш Улс бол Европын Холбооны идэвхитэй гишүүн орон бөгөөд олон улсын харилцаан дахь Монголын чухал түнш орон юм” гэлээ.
Элчин сайд ноён Т.Хомицки хэлэхдээ “Манай хоёр ард түмэн олон жилийн уламжлалт, найрсаг харилцаатай улс юм. Одоогоор Зүүн Европ, тэр дундаа Польш Улс ч эдийн засаг, улс төрийн шилжилтийг туулж байна. Бид танай улстай харилцах харилцаагаа өргөжүүлж, шинэ шатанд гаргаж ажиллана гэдэгт итгэлтэй байна. Бид боловсрол, шинжлэх ухааны салбарт хамтран ажиллаж ирсэн уламжлалаа үргэлжлүүлж, оюутан сургах, эрдэмтэд солилцоход цаашид анхаарах болно. Эдийн засгийн харилцааг өргөжүүлэх боломжтой хэмээн үзэж байна. Тухайлбал, уул уурхайн салбарт хамтран ажиллах боломжтой. Нүүрсний уурхайн ашиглалт, үнэлгээ гаргах зэрэгт польшийн компаниуд тэргүүлэх эгнээнд явдаг” хэмээн Элчин сайд онцлон тэмдэглэв.
Польш Улс нь Улаанбаатар дахь ЭСЯ-аа эдийн засгийн хэмнэлтийн бодлогын улмаас хаасан бөгөөд одоогоор Улаанбаатар хотноо нэгэн монгол иргэнийг ажиллуулдаг байна. Элчин сайд Т.Хомицки Варшавын их сургууль болон Оксфорд, Флоренцийн их сургуульд суралцсан, 1992 оноос Польшийн ГХЯ-нд ажиллаж буй мэргэжлийн дипломат ажээ. Тэрээр өмнө нь Сөүлд Элчин сайдаар ажиллаж, мөн ГХЯ-ны Азийн газрын захирлаар ажиллаж байсан Азийн чиглэлийн мэргэжилтэн бөгөөд мөн Польшийн ГХЯ-ны Экспортын бодлогын газрын дарга, Польшийн хөрөнгө оруулалтын хороонд Гадаад хэргийн сайдын төлөөлөгчөөр ажиллаж байсан байна.
