ХБНГУ-ын Бундестагийн Хүний Эрхийн Хорооны гишүүн Катрин Вернер Монгол Улсын Ерөнхийлөгч Цахиагийн Элбэгдоржийн шийдвэрийг сайшаан мэдэгдэл хийжээ.
Тэрээр “Нэгдсэн Үндэстний Байгууллага нь цаазаар авах ялыг дэмждэггүй бөгөөд цаазаар авах ял нь хүний нэр төр, жам ёсны эрхэд халдаж байгаа явдал гэж үздэг. Ерөнхийлөгч Ц.Элбэгдорж парламентад хандан цаазаар авах ялыг хүчингүй болгохыг уриалсан нь НҮБ-ын байр суурийг дэмжсэн маш чухал алхам болов.
Өнөөг хүртэл Монгол Улсад 59 гэмт үйлдэлд цаазаар авах ялыг оноох боломжтой. Зүүний нам дэлхий даяар цаазаар авах ялыг хүчингүй болгохыг дахин уриалж байна. Иймд зөвхөн тухайн бүс нутгийн төдийгүй дэлхийн бусад орнууд ч Монгол Улсын сайн жишээг дагаасай” гэжээ.
ХБНГУ-ын Бундестаг-ийн Зүүний намын бүлгийн хэвлэлийн төлөөлөгч мөн 2010 оны 1 дүгээр сарын 14 нд тус орны болон олон улсын хэвлэл мэдээллийнхэнд зориулж мэдэгдэл хийв.
Үүнд: “Монгол Улсын Ерөнхийлөгч Улаанбааатар хотноо, тус улсын парламентад хандаж цаазаар авах ялыг халья гэж уриалсан нь тухайн бүс нутагтаа үлгэр жишээ болохуйц алхам боллоо. Монгол улсын Ерөнхийлөгчийн энэ алхам нь тус улс хүний эрхийг дээдэлж байгаагийн тод илэрхийлэл мөн”- хэмээв.
