ТАЙМ сэтгүүлийн 2009 оны “Байгаль орчны салбарын Баатар”, онцлох хүнээр тодорсон Түвд гаралтай Австралийн иргэн Доржээ Сан өнөөдөр Монгол Улсын Ерөнхийлөгчид бараалхлаа.
Монгол Улсын Ерөнхийлөгч түүнийг хүлээн авч уулзахдаа байгаль орчин, экологийн тэнцвэртэй байдлын төлөө дэлхийн хэмжээний томоохон санаачлага дэвшүүлэн хэрэгжүүлж буйд нь баяр хүргэж амжилт хүсээд Монгол Улс дахь экологийн нөхцөл байдал, зарим бэрхшээлүүдийг шийдэх арга замын тухай санал солилцов.
Уулзалтын үеэр Ерөнхийлөгч, саяхан болсон Копенхагены бага хурлын талаар дурьдаад, “Монголчууд бол байгальд ээлтэй амьдардаг ард түмэн, гэвч сүүлийн үед цаг уурын өөрчлөлтийн хор уршигт ихээр нэрвэгдэж байгаа улс. Гэхдээ бидэнд дэлхийн дулаарлыг бууруулахад идэвхитэй оролцох боломж бий” гэв.
Монгол Улс хөгжиж буй орнуудад тулгарч буй уур амьсгалын өөрчлөлтөөс үүдсэн байгаль, цаг уурын сөрөг нөлөөллүүд, түүний дотор цөлжилтийн хор уршгийг дэлхий нийтэд түлхүү ойлгуулах үүднээс Засгийн газрын хуралдаанаа Говийн элсэн дунд зохион байгуулах болсныг Ерөнхийлөгч онцолж байв.
Ноён Доржээ Сан олон улсын хэмжээнд явуулж буй идэвхитэй үйл ажиллагаа, хүрсэн ололтынхоо талаар Ерөнхийлөгчид товч танилцуулаад Монгол орны өмнө тулгамдаж буй асуудлуудыг шийдвэрлэхэд туслалцаа үзүүлэх эрмэлзэлтэй байгаагаа илэрхийллээ.
