Монгол Улсын Ерөнхийлөгчийн урилгаар “Тайм” сэтгүүлийн “2009 оны Байгаль орчны баатар” буюу байгаль орчны салбар дахь оны онцлох хүнээр тодорсон, тус чиглэлээр олон улсад томоохон үйл ажиллагааг удирдан зохион байгуулж буй Түвд гаралтай Австралийн иргэн Доржээ Сан манай улсад ажиллаж байна.
Түүний тэргүүлдэг “Carbon Conservation” хэмээх олон улсын төрийн бус байгууллага нь хөгжиж буй орнуудын эрчимтэй өсч буй эдийн засаг, уул уурхайн салбарын хөгжилтэй байгаль орчны хамгааллын асуудлыг хэрхэн уялдуулах, ой мод, усны хомсдол, агаарын бохирдол зэрэг асуудлыг шийдвэрлэх санхүүжилтийн эх үүсвэрийг хэрхэн бий болгох чиглэлээр тэдгээрийн засгийн газруудтай хамтран ажилладаг юм.
Доржээ Сан Монгол Улсын Ерөнхийлөгчийн зөвлөхүүд болон байгаль хамгааллын чиглэлээр үйл ажиллагаа явуулдаг монголын төрийн бус байгууллагуудын төлөөлөгчидтэй уулзаж монголын эко брэндийг дэлхийд хэрхэн таниулж сурталчилж болох тухай өөрийн байр сууриа танилцуулсан юм.
Тухайлбал Монгол оронд нүүрлээд буй цөлжилтийн бодит аюул, түүнийг багасгах арга зам болон олон улсын байгууллагуудтай хэрхэн хамтарч ажиллаж болох талаар саналаа хэллээ.
Доржээ Сан ирэх долоо хоногийн даваа гарагт Монгол Улсын Ерөнхийлөгч Ц.Элбэгдоржид бараалхаж дээрх асуудлаар харилцан санал солилцох юм.
