Монгол Улсын мал аж ахуйн салбарыг ашигтай орлоготой салбар болгох нь Дэлхийн мал амьтны эрүүл мэндийн байгууллагад хүлээн зөвшөөрөгдөхөөс шууд хамаараад байна. Учир нь гэвэл аливаа улс орны мал нь өвчингүй, түүнээс бэлтгэсэн мах нь эрүүл хүнс болохыг дээрхи байгууллагын эксперт хүлээн зөвшөөрсний дараа дэлхийн улс орнууд тухайн орноос мал, мах, махан бүтээгдэхүүн импортлох боломжтой болдог аж.
Монгол Улс жилдээ 100 мянга гаруй тонн богийн мах, 50 мянга гаруй тонн бодын мах экспортлож 4300 тэрбум төгрөгийн буюу монгол хүн бүрт 160 мянган төгрөг ногдохоор борлуулалт хийх боломтой юм.
Өнөөдрийн байдлаар Монгол мал эрүүл гэдгээ Дэлхийн мал амьтны эрүүл мэндийн байгууллага болон улс орнуудын өмнө нотлож чадахгүй байгаагаас экспортод гаргаж байгаа мах, олж буй ашиг орлого боломжит хэмжээнээс даруй 10-15 дахин бага, энэ хэмжээгээр малчин өрхийн орлого бага, бүтээгдэхүүний үнэ унасаар байна.
Монгол Улсын Ерөнхийлөгч Ц.Элбэгдорж малчдын орлогыг нэмэгдүүлэх гол эх үүсвэр болсон мах экспортлох асуудлыг эрчимжүүлэхэд анхаарлаа чиглүүлэн ажиллаж байна. Ерөнхийлөгчийн Тамгын газраас 2009 оны 9-р сард махны экспортод яагаад ахиц гарахгүй байгаа талаар салбарын яам, агентлагийн удирдлагатай уулзаж ярилцаж тодорхой үүрэг, чиглэл өгсөний дээр 2009 оны 12-р сард Дэлхийн мал амьтны эрүүл мэндийн байгуулагын захирал ноён Бернард Валлатад захидал илгээсэн нь Монгол төрийн тэргүүн тус байгууллагад хандсан анхны ажил хэрэгч үйл явдал болсон байна.
ДМАЭМБ-ийн захирал ноён Б.Валлат Монгол Улсын Ерөнхийлөгчид ирүүлсэн хариу захидалдаа "Таны 12-р сарын 4-ний өдрийн М.Батчимэгээр шууд хүргүүлсэн захидлыг хүлээж авсан нь миний хувьд нэр төр, алдар хүндийн хэрэг юм. ДМАЭМБ нь шинжээчдийн шилдэг багийг Монгол Улсад илгээж Таны анхаарлаа хандуулаад байгаа Монголын мал эмнэлгийн албыг олон улсын стандартыг хангуулах, малыг эрүүлжүүлэх, монголын мал, мах, махан бүтээгдэхүүнийг олон улсын зах зээл дээр гарах боломжийг нэмэгдүүлэх зэрэг асуудлыг шийдвэрлүүлэхэд тус дэмжлэг үзүүлэхээр хичээж байна." гэжээ.
Монгол Улсын Ерөнхийлөгч Ц.Элбэгдорж 2009 оны намар Ерөнхийлөгчийн Тамгын газраараа дамжуулан мах экспортыг нэмэгдүүлэх талаар салбарын яам, агентлагт өгсөн чиглэлийн үр дүнтэй танилцах, ДМАЭТБ-ын захирлаас хариу захидал ирүүлсэнтэй холбогдуулж ЕТГ болон ХХААХҮЯ, холбогдох агентлагийн удирдлагууд уулзаж цаашид Монголын төрөөс мал эрүүлжүүлэх, мах махан бүтээгдэхүүний гадаад зах зээлд нэвтрэх чадварыг нэмэгдүүлэх талаар үйл ажиллагаагаа нэгтгэх, хамтран ажиллах төлөвлөгөө гарган ажиллахыг чиглэл болгосон байна.
