JCI Монголын эрхэм хүндэт залуус аа,
Эрхэмсэг, ноёд хатагтай нар аа
Та бүхэнд энэ өдрийн мэндийг хүргэе.
Монгол орон эрх чөлөөт хөгжлийн замд жолоогоо чиглүүлээд 20 дахь жилийнхээ нүүрийг үзэж байна. Бартаатай, ээдрээтэй олон замаар туулсан ч ардчилсан үзэл баримтлал, зах зээлийн нээлттэй хөгжлийн зүгт эргэлт буцалтгүйгээр жолоо чиглүүлснийг цаг хугацаа аажим хэдий ч нотолсоор байна. Төр нь хүнээ дардаггүй, ард иргэд нь төрөө царайчилдаггүй, хэн хийсэн нь, хэн бодож сэтгэсэн нь өөрийн амьдралдаа сүүн зам татуулдаг шударга тогтолцоо бүхий ардчилсан нийгмийн суурийг тавьж, хүнлэг энэрэнгүй иргэний нийгмийг бүтээхээр хүн бүр дор бүрнээ зүтгэж байна.
Нийгмийн тэргүүлэх хүч нь залуу, эрч хүчтэй, өөртөө итгэлтэй, өмнөө тавьсан зорилготой залуу иргэд байдаг. Тэд л нийгэмд эерэг өөрчлөлтийг авч ирж, тэд л нийгмийн зүтгүүр болж, тэд л улс оронд баялгийг бүтээж, эдийн засагт түлхэц өгч, өөрчлөлт шинэчлэлийг бий болгож байдаг. Цаг хугацаа, хүрээлэн буй орчин хүний нийгмийг өөрчлөгдөхийг, өөрчлөлтөд дасан зохицож, түүнээс түрүүлэхийг шаардаж байдаг.
Та нар бол өөрчлөлтийг авч ирэх итгэл найдварын нэг хэсэг нь. Өнөөдрөөс 20 жилийн өмнө ардчилсан хувьсгалыг эхлүүлсэн залуус ч та нар шиг итгэлийн галыг зүрхэндээ цохилуулж, ирээдүйд сайн сайхан цаг ирнэ гэдэгт найдаж байсан учраас асуудал бэрхшээлээс няцалгүйгээр нийгэмд том өөрчлөлтийг авч ирсэн юм.
Эрхэм JC-чүүд ээ,
Боловсрол, түүнд суурилсан итгэл, итгэлдээ оч нэмэх зориг та нарт бий. Та нарт итгэж, та нараас илүү ихийг хүсэж буй олон мянган хүмүүс бий.
Хөгжлийн асуудлууд өнөөдөр улс үндэстнээс халин гарч, хавтгайршиж буй дэлхий ертөнцийн асуудал болж, эх дэлхий дээр оршин амьдарч буй иргэд нь нэгэн нарны доор амьдарч буй утгаараа нийтлэг хүсэл эрмэлзэлтэй болж, харилцан туслалцаж, хамтран шийдвэрлэж, дайнгүй энх, ялгамжгүй шударга, өлсгөлөнгүй жаргалтай, өвчин зовлонгүй байхыг бие биедээ хүсэх боллоо.
JCI бол залуусыг нэгтгэн, тэдний зориг эрмэлзлэлийг өөрчлөлтийн зүг чиглүүлэхээр байгуулагдсан дэлхийн манлайлагч залуусын шилдэг байгууллага юм. Монголын иргэн Батын төлөө Америк Жонн санаа тавьж, Ирак, Афканистан, Африкийн ард түмний энхийн манаанд Монгол хүү зориг зүрхээ зориулж байна. Та нар бол дэлхийн иргэд, дэлхийн боловсролыг эзэмшсэн залуу иргэд. Та нарын асуудал – дэлхийн асуудал. Тиймээс илүү өргөн харж, илүү том сэтгэх боломж та бүхэнд нээлттэй байна. Өрөөлийг бус өөрийгөө өрсөлдөгчөөрөө сонгож, өчигдрөөсөө өнөөдөр нь илүү байхаар суралцаж буй та бүхний зорилго чинь том, арга чинь энэрэнгүй, үйлс чинь бүтэмжтэй, үр дүн нь агуу байхыг хүсэн ерөөе.
Монгол Улсын Ерөнхийлөгч
Цахиагийн ЭЛБЭГДОРЖ
