Оюутан залуучууд аа,
Та бүхэнд Монголын оюутны өдрийг тохиолдуулан аз жаргал, сайн сайхан,сурлагын өндөр амжилт хүсэн ерөөж мэндчилье.
Ирж яваа цаг Та бүхнээс шудрага өрсөлдөөнийг ялан дийлэх замаар боломж бүхнээс зохистой сонголт хийж, хувь өөртөө, улс эх орондоо цаашлаад дэлхийн сайн сайханд хувь нэмрээ оруулж ажиллаж амьдрах өргөн дардан замыг санал болгож байна.
Ийм учраас эрдэм номд шамдаж, тодорхой шинжлэх ухаанд амжилттай мэргэшиж, хүн төрөлхтний нийтлэг соёл, амьд байгальд ээлтэй хөгжлийг цогцлоохын төлөө өөрийгөө бэлтгэхэд одооноос чадал хүч, бололцоогоо дайчилж ажиллахыг онцлон захиж хэлье.
Оюутан Та бүхэн сурах, амьдрах орчиноо улам сайжраасай, сургалт, дотуур байрны төлбөр боломжийн хэмжээнд байгаасай, хичээлийн бус цагаар хөдөлмөр эрхлэх бололцоо нэмэгдээсэй, оюутанд үзүүлэх төрийн ивээл, хөнгөлөлт үйлчилгээ бэхжээсэй, бидний эрүүл мэндийн төлөө илүү анхаарал тавиасай гэж хүсч байдаг нь Төрийн тэргүүн миний бодол санаанд байнга хадаатай явдаг билээ. Та бүхний хүсэл мөрөөдлийг биелүүлэхэд дорвитой шинэчлэл хийх хэрэгтэй байна.
Оюутны нийгмийн баталгаа, сургалтын тэтгэлэгийн асуудал, түүний санхүүжилтийг зөв, ирээдүйтэй, сайн систем болгон төлөвшүүлэхийн тулд өргөн хэлэлцүүлэг, судалгаа хийж, олон улсын сургамж туршлага дээр үндэслэн эрх зүй, санхүүжилтийн баталгаатай орчин бий болгохоор Монгол Улсын Ерөнхийлөгч захирамж гарган ажлын хэсэг байгуулаад ажиллаж байна.
Боловсрол бүх шатандаа нийгмийн амин чухал салбаруудын нэгэн адил шудрага ёсны үлгэр дуурайлал, ардчилсан хэм хэмжээний загвар байх ёстойг би давтан хэлье. Оюутан та бүхэн шударга үнэний дуу хоолой байх ёстой. Сурлагын чанар, сургуулиудын менежмент, хөгжлийн асуудал сайжрахад Та бүхний дуу хоолой чухал юм.
Сайхан Монгол орны маань ирээдүй Та бүхний гарт байна. Ирээдүй хэмээх өнгөлөг сайхан хотхонд шинжлэх ухаан, технологи, мэдээллийн асар их хурдац, өрсөлдөөн дунд амьдрахад хэрэгцээтэй мэдлэг, чадвар, дадал олж авахын төлөө хичээж чармайж ажиллацгаая.
Та бүхний эрдэм номын ариун үйлс өлзийтэй байх болтугай.
Монгол Улсын Ерөнхийлөгч
Цахиагийн ЭЛБЭГДОРЖ
