МОНГОЛ УЛСЫН ЕРӨНХИЙЛӨГЧ Ц. ЭЛБЭГДОРЖИЙН АЛТАНХӨХИЙ ХАЙРХАНЫ ТӨРИЙН ТАХИЛГЫН ЁСЛОЛ ДЭЭР ХЭЛСЭН ҮГ
Алтан Хөхий хайрханы тэнгэрийг тайх төрийн ёслол 2013 оны долдугаар сарын 2-нд Ховд аймагт боллоо. Уг ёслол дээр Монгол Улсын Ерөнхийлөгч Ц.Элбэгдорж үг хэллээ. Тэрээр хэлсэн үгэндээ
“Хөхий хайрханы тэнгэрийг тайх төрийн ёслолд хүрэлцэн ирсэн ард иргэд ээ,
Өлзий учрал бүрдсэн энэ сайхан өдөр Алтан хөхий хайрханы тахилгат их овоон дээрээс Монгол түмнийхээ амар амгаланг айлтган мэндчилье.
Тэнгэр газар тэтгэж, нар хур тэгширч, хүн зон баясаж, наадам хаяанд ирсэн, найртай сайхан энэ өдөр Та бид эх болсон газар орныхоо уул, усны эзэн онгод, лус савдгийг урин залж, дуудан ирүүлээд идээ ундаа, таваг тахилаа өргөж, хүсэл сэтгэл, даатгал айлтгалаа өчиж, төр түмэн хүндэтгэл, ёслолоо үйлдэж буй нь юутай бахархал вэ.
Ховд нутаг бол өндөр сүрлэг уулс, өнгө алагласан нурууд, хүн, мал, зэрлэг ан амьтдын идээшиж дассан үзэсгэлэнт газар төдийгүй, нүүдлийн соёл иргэншлийн арвин баялаг түүхийн өлгий нутаг гэдгээрээ алдартай газар билээ.
Байгаль дэлхий, газар устайгаа хүмүүн ёсоор харилцах Ховдчуудын онцгой хүндэтгэлт ёс заншлын нэг бол үеэс үед уламжилж ирсэн энэхүү Алтан хөхий минь хэмээн сүслэх ард олны шүтлэг бишрэлийн ариун ёсон, түүний тахилга тайллагын зан үйл билээ.
Хүн байгалийн хүйн холбоо, шүтэн барилдлагын оньс нь чухамхүү энэ болой. Эртнээс үүнийг ухааран ойлгосон өвөг дээдэс маань эцэг тэнгэрээ сүслэж, эх байгалиа хамгаалж, мянга мянган жилээр орчлон ертөнц, орон дэлхийтэйгээ зохицон аж төрсөөр өнөөг хүрч иржээ.
Эрхэм хүндэт иргэдээ,
Монголчууд бид уул, усны эзэн лус савдгийг аргадан тахиж нөхөрлөвөөс нас дэлгэр, идээ ундаа элбэг арвин, ажил үйлсэд ач тустай хэмээн үздэг. Тэнгэр хангай дэлэгнэж хур бороогоо хайрлан, газрын цангааг тайлсан нь тал нутагт зуншлага ирж хүн, малын амьдрах орчинд таатай нөлөө үзүүлж байна.
Ховдчууд Та бүхэн өнгөрсөн онд нөр их хөдөлмөр, хичээл зүтгэлээр мал сүргээ урьд оныхоос 15,1 хувиар буюу 267 мянган толгойгоор өсгөж хоёр сая гаруй мал тоолуулан улс орныхоо хөгжил дэвшилд бахархам хувь нэмэр оруулсан байна.
Байгаль дэлхийгээ хайрлан хамгаалах үзэл санаа, хүн төрөлхтөн нэгдмэл хувь заяатай, нэгэн эх дэлхийтэй гэдгээ ухааран ойлгох явдал улам бүр өргөжсөөр байна. Байгаль дэлхийгээ хамгаалахад иргэний оролцоо зайлшгүй хэрэгтэй.
Монгол Улсын Төрийн тэргүүн би эртнээс нааш эв найртай идээшин амьдарсаар ирсэн баруун монголчуудынхаа омог сүрийг тэтгэж, Монгол Улсын төлөө зүтгэе гэсэн их урам зоригийг минь улам бадрааж байхыг байгаль эхийн хүү - Алтан хөхий хайрханыхаа цэлмэг хөх тэнгэрт сүсэглэн даатгаж байна.
Үзэсгэлэн төгөлдөр онгон байгальтай, үе дамжсан уламжлалт соёл, ёс заншилтай,арвин баялаг түүх шашдиртай, олон зуун жил ашиглах эрдэс баялагтай монгол эх орныхоо төр засаг, ард түмэнтэйгээ болон уламжлалт шашин, сүсэгтэн олонтойгоо шударга ёсыг бэхжүүлж, тогтвортой сайн сайхан амьдрал, хөгжил дэвшилд хүрэхийн төлөө хамтран ажиллаж ихийг бүтээнэ гэдэгт итгэлтэй байна.
Хэдхэн хоногийн өмнө Монгол Улсын Ерөнхийлөгчийн ээлжит сонгууль амжилттай болж өнгөрлөө. Монголын ард түмэн энэ сонголтоороо ардчиллыг улам баталгаажууллаа. Ард түмэндээ гүн талархал илэрхийлье.
Ард иргэд ээ,
Улс хотлоороо хоног тоолж, жил тойрон хүлээдэг, Монгол түмэнд маань баяр цэнгэл бэлэглэн, хийж бүтээхийн эрч хүч, хийморь зоригийг нэмдэг Үндэсний их баяр наадам удахгүй болно.
Төрийн тахилгат Алтан хөхий хайрханы гэгээн тэнгэр түмэн олныг минь ивээж, түүхт их улсын минь төрийн мэргэн бодлого, түмний хичээл зүтгэлээр уугуул нутаг усны сав, шимийн жам ёс зохилдон, улс Монгол, ард иргэдийн аж амьдрал өөдлөн дэвжих болтугай.
Хурай, Хурай, Хурай” гэлээ.
2013. 07. 02
МОНГОЛ УЛСЫН ЕРӨНХИЙЛӨГЧ Ц. ЭЛБЭГДОРЖИЙН АЛТАНХӨХИЙ ХАЙРХАНЫ ТӨРИЙН ТАХИЛГЫН ЁСЛОЛ ДЭЭР ХЭЛСЭН ҮГ
