Монгол Улсын Ерөнхийлөгчийн сонгуулийн дүнг СЕХ-ноос өнөөдөр УИХ-д өргөн мэдүүлэв. УИХ-ын дарга З.Энхболдод СЕХ-ны дарга Ч.Содномцэрэн, нарийн бичгийн дарга Б.Алтанжаргал, Тамгын газрын дарга Д.Баяндүүрэн нар Монгол Улсын Ерөнхийлөгчийн 2013 оны сонгуулийн дүнг өргөн барилаа.
Сонгуулийн дүнг өргөн барьсны дараа СЕХ-ны дарга Ч.Содномцэрэн сэтгүүлчдэд товч мэдээлэл өгөв.
Тэрээр “СЕХ Монгол Улсын Ерөнхийлөгчийн энэ удаагийн сонгуулийг хуульд заасан бүрэн эрхийнхээ хүрээнд амжилттай зохион байгуулж сонгуулийн нэгдсэн дүнг гаргалаа. Сонгуулийн нэгдсэн дүнгээр Монгол Улсын Үндсэн хууль, Монгол Улсын сонгуулийн тухай хуульд заасан шаардлагыг хангаж сонгуульд оролцсон нийт сонгогчдын олонхи болох 622794 сонгогчийн буюу 50,23 хувийн саналыг авсан Ардчилсан намаас нэр дэвшигч Цахиагийн Элбэгдоржийг Монгол Улсын Ерөнхийлөгчөөр сонгогдсон гэж үзэж УИХ-д өргөн мэдүүлэх нь зүйтэй гэсэн шийдвэр гаргалаа. Энэ шийдвэрийг өнөөдөр УИХ-д өргөн мэдүүлж байна.
Сонгууль хуулийн хүрээнд, хүчин төгөлдөр боллоо. Энэ удаагийн сонгуульд онцлог зүйлүүд байсан. Хууль эрх зүйн орчинд 1993 оноос хойш үйлчилж байсан хууль анх удаа өөрчлөгдөж 2012 онд баталсан Монгол Улсын Ерөнхийлөгчийн сонгуулийн тухай хуулийн дагуу сонгуулийг явууллаа. Мөн Сонгуулийн автоматжуулсан системийн тухай хуулиар сонгуулийг зохион байгуулсан. Хөгжлийн бэрхшээлтэй иргэдийг сонгуульд оролцуулах олон арга хэмжээг СЕХ анх удаа авч хэрэгжүүллээ. Саналын хуудсыг анх удаа өнгөт зурагтай хэвлүүлсэн нь бичиг үсэггүй хүмүүс саналаа өгөхөд хялбар болсон.
Автомат машинд зориулсан бар код бүхий өндөр нууцлалтай саналын хуудас хэвлүүлсэн тул хуурамчаар хийх, стандарт бус саналын хуудсаар санал хураалтад оролцох боломжгүй болгосон. Энэ удаагийн сонгуулиар хүчингүй саналын хуудас гараагүй нь нууцлал өндөр байсантай холбоотой” гээд сонгууль зохион байгуулахад оролцсон бүх байгууллага, хүмүүст талархал дэвшүүллээ.
