Ц.Элбэгдорж: Би ард түмнийхээ төлөө, Монгол Улсынхаа төлөө өсгөсөн хүү шиг чинь үнэнчээр зүтгэнэ ээ
Монгол Улсын Ерөнхийлөгчийн сонгуулийн урьдчилсан дүн гарч, нэр дэвшигч Цахиагийн Элбэгдорж ялсныг Сонгуулийн ерөнхий хороо өнөө өглөө зарлав.
Монгол Улсын ардчилсан Ерөнхийлөгч Цахиагийн Элбэгдорж төрийн тэргүүний сонгуульд дахин нэр дэвшиж бүтэн сар хийсэн сурталчилгааныхаа хаалтын уулзалтыг өнгөрөгч даваа гарагт зохион байгуулахдаа зургаадугаар сарын 27-ны морин цагт Сүхбаатарын талбайд иргэд сонгогчидтойгоо эргэн уулзаж ялалтын баяраа хуваалцах хүсэлтэй байгаагаа илэрхийлсэн билээ. Түүний дагуу өнөөдөр Сүхбаатарын талбайд сонгогч, дэмжигч түмэн олон маань хуран цуглажээ.
Баяр хөөр дүүрэн хуран цугласан олны өмнө УИХ-ын дарга З.Энхболд, Монгол Улсын Ерөнхий сайд Н.Алтанхуяг, Нийслэлийн Засаг дарга бөгөөд Улаанбаатар хотын захирагч Э.Бат-Үүл нар гарч ирж, ард түмнийхээ сонголтод баярласнаа илэрхийлэв.
Үүний дараа хуран цугласан дэмжигч олныхоо төлөөлөл, мөн нийт иргэд сонгогчдод хандан нэр дэвшигч Цахиагийн Элбэгдорж ялалтын баяраа хуваалцан үг хэллээ. Тэрээр хэлэхдээ “Сайн байцгаана уу? Та бүхний энэ өдрийн түмэн амгаланг айлтгая. Ард түмэндээ баярлалаа. Ээж минь болсон, аав минь болсон ард түмэндээ баярлалаа. Их өвөг дээдэстээ баярлалаа. Хөх мөнгөн тэнгэр, эзэн Чингистээ баярлалаа.
Өнөөдөр хоёр сая есөн зуун мянган Чингис Монголын тал нутагт сэрж байгаа. Баяр хүргэе. Би ард түмнийхээ төлөө, Монгол Улсынхаа төлөө өсгөсөн хүү шиг чинь үнэнчээр зүтгэнэ. Ард иргэддээ эрх чөлөө, аз жаргалыг эдлүүлэхийн төлөө зүтгэнэ. Улс орондоо шударга ёсыг тогтоохын төлөө зүтгэнэ. Улс орныхоо хөгжил дэвшлийг улам эрчимжүүлэхийн төлөө, их бүтээн байгуулалтын төлөө зүтгэх болно.
Ардчиллын буянаар, ард түмнийхээ буянаар Монгол Улсын Ерөнхийлөгчийн энэ удаагийн сонгууль дэлхийн чихийг дэлдийлгэсэн, дэлхийн нүдийг нээсэн сайхан сонгууль боллоо. Ардчиллын буянаар алдартай аварга нэр дэвшлээ. Мөн төрийн тэргүүний сонгуульд анх удаа эмэгтэй хүн нэр дэвшлээ. Би хамт өрсөлдсөн Б.Бат-Эрдэнэ, Н.Удвал нартайгаа хамтран ажиллах болно.
Намайг дэмжиж ажилласан ард түмнийхээ итгэлийг авч, миний өрсөлдөгчдийг дэмжсэн тэр сонгогчдынхоо итгэлийг хүлээж, тэр итгэлийг авахын төлөө улам шургуу ажиллана. Та бүхнийхээ итгэлийг даана аа.
Үнэхээр өнөөдөр сайхан өдөр байна. Би Монгол Улсынхаа нэр хүндийг олон улсад сайнаар авч явж чадна. Үүний төлөө зүтгэнэ гэдгээ та бүхэнд хэлье.
Монголын ард түмний хүсэл мөрөөдлийг, сайн сайхны төлөө өгсөн санал бүхнийг биелүүлэхийн төлөө зүтгэх болно. Аав, ээж минь болсон ард түмэндээ дахин баярлалаа.
Монгол түмний минь буян заяа, хийморь сүлд, ажил үйлс нь үргэлж өөдрөг байх болтугай. Миний Монгол мандтугай. Монгол түмний минь эрх чөлөө, тусгаар тогтнол мандтугай. Монгол Улсын төлөө зүтгэе. Баярлалаа” гэв.
Ц.Элбэгдорж: Би ард түмнийхээ төлөө, Монгол Улсынхаа төлөө өсгөсөн хүү шиг чинь үнэнчээр зүтгэнэ ээ
