Хийж бүтээснийг тань үнэлж, ирээдүйд өрнөөн цогцлоох зорилгод тань улам их амжилт ерөөе
Монгол Улсын Ерөнхийлөгчийн зарлигаар Үндэсний сэтгүүл зүй үүссэний 100 жилийн ой, Олон улсын эмэгтэйчүүдийн эрхийг хамгаалах өдөр,Монгол цэргийн өдөр, Казак түмний Наурыз хаврын баярыг тохиолдуулан эрүүл мэнд, эдийн засаг, боловсрол, соёл, шинжлэх ухаан, батлан хамгаалах, сэтгүүл зүйн салбарт олон жил үр бүтээлтэй ажилласан зарим хүнийг Монгол Улсын төрийн одон, медалиар шагналаа.
Монгол Улсын Ерөнхийлөгч шагнал хүртэгсдэд хандан үг хэлэхдээ “Өнөөдөр өрнөн тохиож буй Казах түмний маань “Шинэ эхлэл” буюу Наурызын баяр болон энэ гуравдугаар сард тохиосон Монгол Улсад сэтгүүл зүйн салбар үүсч хөгжсөний 100 жилийн ой, Зэвсэгт хүчний 92 жилийн ой болоод Олон улсын эмэгтэйчүүдийн эрхийг хамгаалах өдрийг тус тус тохиолдуулан хөдөлмөр зүтгэл, гэгээн үйлсээрээ онцгойрон байгаа эгэл иргэддээ шагнал гардууллаа.
Хөх тэнгэрт нь хүрэн бүргэд хальсан, хүн зон нь ажилч хичээнгүй, домборын эгшигтэй Казах түмэн бол Монгол түүхийн нэгэн эрдэнэ, бас Монголын маргаашийн нэгэн тод өнгө юм. Энэ өдөр Наурызын баяраа тэмдэглэж буй нийт Казах түмэндээ чин сэтгэлийн баярын мэндчилгээ дэвшүүлье.
Монгол төрийн тэгш ой 2222 жилийн тоолол тохиож, хаврын урь ирж, малчны хотонд төлийн дуу цангинаж байгаа энэ мөчид Монгол төрийн их шүтээн Есөн хөлт цагаан тугийнхаа өмнө шагнал гардан авч буй Та бүхэнд болон нийт иргэддээ баяр хүргэе.
Өнөөдөр энэ танхимд шагнал гардан авсан эмч, донор, цэцэрлэгийн багш, сэтгүүлч, цахилгаанчин, дуу оруулагч, ахмад тээвэрчин гээд хөдөө аж ахуй, анагаах ухаан, барилга бүтээн байгуулалт, арми, кино урлагийн салбарт он удаан жил ажилласан иргэддээ баяр хүргэж, хэд хэдэн хүний гавъяа зүтгэлийг дуръя.
Ардын эмч цол хүртсэн Ануарын Нота бол 44 жил эрүүл мэндийн салбарт ажилласан байна. Энэ хугацаанд 13 мянга гаруй хүнд мэс засал хийсэн, бараг хагас сая хүнийг үзэж зөвлөгөө өгсөн, манай эрүүл мэндийн салбарын гайхамшигт алтан гартнуудын нэг юм.
Мөн Шударга журам медаль хүртсэн Доржийн Бум-Эрдэнэ гэхэд сүүлийн 13 жилд 133 удаа сайн дураараа цусаа донор юм. Тэрээр 54 литр цусаа өгч хүн ардынхаа эрүүл мэндийг хамгаалах эгэл үйлст их гавъяа байгуулсан хүн юм.
СаяЖүгдэрийн Дарамсүрэн Гавъяат жүжигчинцол хүртлээ. Энэ хүн бол Монголын болон гадаадын 7000 гаруй кинонд мэргэжлийн өндөр төвшинд дуу оруулсан, 300 гаруй баримтат киноны тайлбарыг уншсан, Монголын уран сайхны 163 киноны дуу, чимээний чимэглэл хийсэн, нэг үгээр хэлбэл кино урлагийн арын фронтод олон жил тасралтгүй зүтгэсэн сайхан уран бүтээлч юм.
Таукейн Султангуайг онцолж хэлэхийг хүсч байна.Төрийн болон төрийн бус байгууллагад 46 жил тасралтгүй ажиллаж байгаа манай төр, нийгмийн нэртэй зүтгэлтэн. Түүнээс гадна роман, тууж, жүжиг, өгүүллэгийн чансаатай зохиолууд бичсэн, мөн монгол казак хэл дээр олон зохиол орчуулж гаргасан соёлын зүтгэлтэн хүн гэдгийг хэлье.
Ийнхүү олон олон баяр давхацсан, ирэх цагийн өнгө наашилсан энэ өдрүүдэд салбар салбартаа гялалзсан амжилтын эзэд болсон иргэддээ шагнал гардуулж, хийж бүтээснийг тань шударгаар үнэлж, ирээдүйд хийх, бүтээх, өрнөөн цогцлоох зорилгод тань улам их амжилтыг хүсэн ерөөе.
Та бүхэндээ дахин баяр хүргэе” гэлээ.
Хийж бүтээснийг тань үнэлж, ирээдүйд өрнөөн цогцлоох зорилгод тань улам их амжилт ерөөе
