2009 оны 12 дугаар сар 18-ны өдөр Данийн нийслэл Копенгаген хот дахь “Белла Центр”-т Уур амьсгалын өөрчлөлтийн асуудлаарх НҮБ-ын Суурь конвенцийн талуудын 15-р бага хурлын өндөр түвшний бүгд хуралдаан эхлэв.
Хуралдааны эхэнд Мексик улсын Ерөнхийлөгч Филипп Калдерон үг хэлсэн бол, түүний дараа Австралийн Ерөнхий сайд Кевин Рад, Их Британий Ерөнхий сайд Г.Браун болон Грек, Албани улсуудын Ерөнхий сайд нар мөн нар үг хэлэв. МУ-ын Ерөнхийлөгч эдгээр төр засгийн тэргүүнүүдийн дараа, жагсаалтын 12-рт үг хэлсэн бөгөөд томоохон орнуудын төр засгийн тэргүүнүүдтэй нэгэн цагт үг хэлсэн нь хуралд оролцогчдын болон дэлхийн хэвлэл мэдээллийн хэрэгслийн анхаарлын төвд байлаа.
Мөн энэ өдөр Бразилийн Ерөнхийлөгч Лула да Силва, БНСУ-ын Ерөнхийлөгч Ли Мён Бак, Испанийн Ерөнхий сайд Хосе Луис Запатеро, Францын Ерөнхийлөгч Н.Саркози, ХБНГУ-ын канцлер А.Меркель, БНТУ-ын Ерөнхийлөгч А.Гул болон бусад олон орны төр засгийн тэргүүнүүд үг хэллээ.
Ийнхүү дэлхийн 130 гаруй орны Төр засгийн тэргүүн нарын оролцсон өндөр түвшний хуралдааны эхний өдөр анхаарал татсан сонирхолтой үйл явдал, үг илтгэлээр дүүрэн байлаа.
Хурлын эргэн тойронд, тохиролцоонд хүрэх чиглэлээр дипломат үйл ажиллагаа өргөн хүрээнд явагдаж байна. Ийм чиглэлийн уулзалт яриануудад ЕХ-ны лидеүүд болон Австралийн Ерөнхий сайд К.Рад нар тэргүүлэх үүрэг гүйцэтгэж байв.
Хуралдааныг ажиглаж байгаа тоймч, сэтгүүлчид болон судлаачид мэргэжлийн хүмүүсийн дунд АНУ болон БНХАУ-ын байр суурь хатуу байгаагаас хэлэлцээрт төдийлөн ахиц гарахгүй байна гэх таамаг яриа үүсч байна. АНУ-ын Ерөнхийлөгч Б.Обама маргааш буюу 18-ны өдөр Копенгаген хотод ирнэ. Харин БНХАУ-ын Ерөнхий сайд В.Жибао хуралдаанд оролцож, байр сууриа илэрхийлэхээр Копенгаген хотод ирсэн байна.
Үдээс хойшхи хуралдааны үеэр, найдвар төрүүлсэн шийдвэр гарч магадгүй тухай дуулдаж эхэллээ. ЕХ-ны улсууд уур амьсгалын өөрчлөлтийн эсрэг хүлэмжийн хийг бууруулх амлалтаа 30 хувь хүргэхэд бэлэн байгаагаа илэрхийлж, АНУ, БНХАУ-ын талаас мөн илүү хэмжээний буулт амлалт авахыг уриалж байлаа.
Хөгжиж байгаа улсуудыг нэгтгэсэн “77”-ийн гэгдэх бүлэг зохион байгуулалтын хувьд тийм ч сайнгүй байгаа гэж ажиглагчид дүгнэж байна.
Ийнхүү амаргүй нөхцөл байдал дунд болж байгаа яриа хэлэлцээр, уулзалт мэтгэлцээнүүд үргэлжилж, дэлхийн удирдагчид нэгэн хүсэл зоригоор шийдвэр гаргаж чадах эсэхийг хүн төрөлхтөн ажин хүлээж байгаа нөхцөлд Монгол Улсын Ерөнхийлөгч уур амьсгалын өөрчлөлтийн эсрэг тэмцэхэд боломж бололцоогоо дайчлахад бэлэн байгаагаа илэрхийлээ.
