Монгол Улсын Ерөнхийлөгч Цахиагийн Элбэгдорж өнөөдөр Канадын Алберта Их сургуулийн профессор, дэлхийн нэрт палеонтологич Филип Кюри, судлаач Эва Копелус нарыг хүлээн авч уулзлаа.
Ерөнхийлөгч Ц.Элбэгдорж монголын говиос олдсон “Тиранозаурус Батаар”-ыг АНУ-д хууль бусаар дуудлага худалдаанд оруулах гэж байх үед дэлхий нийтийн анхаарлыг энэ асуудалд хандуулахад хүчин зүтгэл гаргасанд нь эдгээр эрдэмтдэд талархал илэрхийлэв.
Профессор Ф.Кюри ярихдаа “. Монгол бол динозавр болон палеонтологийн олдвороороо дэлхийд гайхагддаг орон. Гэвч олон жилийн турш энэхүү ховор олдвороо хууль бусаар алддаг байсан нь бидэнд илэрхий байсан. Харин Эрхэм Ерөнхийлөгч та улсынхаа төрийн тэргүүний хувьд палеонтологийн ховор олдвортой холбоотой асуудалд анхаарлаа хандуулж, яаралтай арга хэмжээ авч, хонх дуугаргасанд бид талархаж байна. Батаар-тай холбоотой шуугиан дэгдсэнээр Монгол Улс эдгээр ховор олдвороо хуулиараа хамгаалдаг, энэ талаар олон улсын гэрээ конвенцид нэгдсэн гэдгийг хүмүүс мэддэг боллоо” гэлээ.
Ерөнхийлөгч Ц.Элбэгдорж АНУ-ын Засгийн газар, Олон улсын палеонтологийн холбоо болон эрдэмтэн судлаачид, BBC CNN зэрэг дэлхийн нэр хүндтэй хэвлэл мэдээллийн хэрэгсэл Монголын талд байгааг дурдаад манай засгийн газар, энэ чиглэлийн ажил хариуцдаг хүмүүст том сургамж болсон гэдгийг хэллээ.
Энэ уулзалтын үеэр монголд палеонтологийн музей байгуулах асуудлаар санал солилцлоо. Профессор Ф.Кюри нь дэлхийн хэд хэдэн алдартай музейг байгуулахад хамтран ажилласан, одоо зөвлөхөөр нь ажилладаг туршлагатай судлаач юм.
Монголын динозавртай холбоотой асуудал хуулийн дагуу шийдэгдэж , Батаар эх орондоо ирнэ гэдэгт итгэж байгаагаа Канадын эрдэмтэд энэ уулзалтын үеэр илэрхийллээ.
