Өнөөдөр Азийн Хөгжлийн Банкны Ерөнхийлөгч ноён Харухико Курода Монгол Улсын Ерөнхийлөгчид бараалхав.
Уулзалтын эхэнд Монгол Улсын Ерөнхийлөгч Монгол Улсын нийгэм эдийн засгийн нөхцөл байдал, дулаарал болон цаг агаарын хуурайшилт хийгээд зарим тулгамдаж буй асуудлуудын талаар танилцуулсан юм. Дараа нь Монгол Улс, Азийн Хөгжлийн Банк хоорондын хамтын ажиллагааны талаар хэлсэн үгэндээ: “Монгол Улс, АХБ-ны хамтын ажиллагаа 1991 хойш өргөжин хөгжиж тус банкнаас үзүүлсэн бүхий л талын туслалцаа нь манай орны нийгэм, эдийн засгийн өөрчлөлт, шинэчлэлд үнэтэй хувь нэмэр оруулж ирсэнд Монгол Улсын нийт ард түмний өмнөөс талархал илэрхийлье.
Монгол Улсын Засгийн газар, АХБ-тай хамтран боловсрол, зам тээвэр, эрүүл мэнд, нийгмийн хамгаалал, хот байгуулалт, хөдөө аж ахуй зэрэг манай улсын бүхий л салбарт олон тооны төсөл, хөтөлбөрийг амжилттай хэрэгжүүлж байна.
Ерөнхийлөгч Курода таны санаачлагаар сүүлийн жилүүдэд АХБ-наас хөгжиж буй гишүүн орнуудад үзүүлэх хөгжлийн албан ёсны тусламжийн хэмжээг, тэр дундаа буцалтгүй тусламжийн хэмжээг нэмэгдүүлж байгааг Монгол Улс өндрөөр үнэлж, талархан хүлээн авч байгаа. Өнгөрсөн онд АХБ-наас Монгол Улсад нийт 90 гаруй сая ам.долларын төсөл хөтөлбөрийг буцалтгүй тусламжаар хэрэгжүүлэхээр шийдвэрлэсэн бол энэ онд манай улсад олгох нийт зээл, тусламжийн 50 орчим хувь буюу 52 орчим сая ам.долларыг буцалтгүй тусламжийн хэлбэрээр олгож байгаад бид баяртай байна” гэж хэлэв.
Мөн Ерөнхийлөгч хэлэхдээ: “Эрхэм ноён Курода 2005 онд АХБ-ны Ерөнхийлөгчөөр сонгогдсоноос хойш бүс нутгийн хамтын ажиллагааг өргөжүүлэн эрчимжүүлэх асуудлыг АХБ-ны үйл ажиллагааны гол зорилт болгон ажиллаж байгааг Монгол Улс талархан хүлээн авч байна. Монгол Улсын зүгээс АХБ-тай хамтын ажиллагаагаа улам эрчимжүүлэх эрмэлзлэлтэй байгаа бөгөөд энэ хүрээнд Монгол Улсын арилжааны банкууд, хувийн хэвшлийг дэмжих чиглэлээр туслалцаа үзүүлбэл талархан хүлээн авах болно” гэж онцлон тэмдэглэв.
Монгол Улсын Ерөнхийлөгч үүний тулд шударга өрсөлдөөн нь эдийн засгийн өсөлтийн нэг гол хүчин зүйл, нийгмийн итгэлцлийн гол суурь бөгөөд энэ нь авилгатай тэмцэхийн нэгэн адил нэн чухал ач холбогдолтой асуудал гэдгийг хэлсэн юм. Монополь болон үгсэн хуйвалдахын эсрэг хуулийг боловсронгуй болгох чиглэлээр АХБ-аас тодорхой туслалцаа шуурхай олгох тал дээр АХБ-ны Ерөнхийлөгчөөс дэмжлэг хүссэн юм.
Мөн уулзалтын үеэр яригдсан нэг чухал асуудал бол төсвийн шинэтгэлийн асуудлын тухай байв. Нэн ялангуяа эрүүл мэнд, боловсрол зэрэг голлох салбаруудад хөтөлбөрт суурилсан төсвийн зарчмыг хэрэглэх нь илүү үр дүнтэй тухай өгүүлээд АХБ-наас Монголын эрүүл мэндийн салбарыг дэмжих 4 дүгээр шатны хөтөлбөрийг боловсруулахдаа энэ талаар тусгаж өгөхийг хүслээ.
Ерөнхийлөгч Ц.Элбэгдорж хэлэхдээ: “Уул уурхайд түшиглэн Монгол Улс ойрын жилүүдэд хариуцлагатай уул уурхайг хөгжүүлэх орон болох боломжтой болж томоохон мөнгөний эх үүсвэрүүд бий болох бөгөөд тэрхүү мөнгийг хэрхэн зүй зохистой ашиглах нь хамгийн чухал” гэдгийг онцлов.
Азийн хөгжлийн банкны Ерөнхийлөгч ноён Харухико Курода Монгол Улсын Ерөнхийлөгчийн саналыг дэмжээд “Монгол Улсын хувьд төсвийн хариуцлагын тухай хуулийн орчныг сайжруулж, Нийгмийн халамжийг эмзэг бүлгийнхэнд түлхүү чиглүүлэн, банкуудад тавих хяналтын системийг боловсронгуй болгож мөн эрх зүйн орчин нийтээр нь илүү үр дүнтэй болгосноор Монгол Улсад хариуцлагатай засаглал бий болох боломжтой” хэмээн хоёр талын үзэж буй санаачлага дээр санал нэгтэй байгаагаа онцлон тэмдэглэв. Мөн Азийн Банкны Ерөнхийлөгч уулзалтын төгсгөлд “Уул уурхайгаас хэт хамааралтай эдийн засаг нь цаашид дэлхийн зах зээлийн үнийн савалгаанд хүчтэй өртөх магадлалтай учраас хариуцлагатай засаглалыг хөгжүүлснээр дээрх бэрхшээлээс урьдчилан сэргийлэх төдийгүй Монгол Улсын хөгжлийн үндэс болох боломжтой”-г онцоллоо.
