"Амжилтын төлөө хамтдаа", Ийм нэртэй нэгэн төрийн бус байгууллага байгуулагджээ. Санаачлагчид нь МУ-ын гавьяат тамирчин Б.Наранбаатар, МУ-ын Хөдөлмөрийн баатар Э.Бадар-Ууган, МУ-ын Хөдөлмөрийн баатар Х.Цагаанбаатар, сэтгүүлч С.Бадамгарав нар юм байна. Тэд өнөөдөр Монгол Улсын Ерөнхийлөгч Ц.Элбэгдоржтой уулзлаа.
Тив, дэлхийн болон олимпийн олон шинэ аваргуудыг төрүүлэхэд дэмжлэг үзүүлэх нь энэ байгууллагын гол зорилго гэдгийг тамирчид уулзалтын эхэнд хэлээд, төрөөс спортын салбарын төлөө явуулж байгаа бодлогод оруулах өөрчлөлтийн талаар санал бодлоо ярьцгаалаа.
“Тамирчид олимпод орох эрхээ авахын тулд олон тэмцээн уралдаануудад урьдчилж оролцдог. Гэтэл төсөвт зөвхөн олимпийн зардалыг суулгаж өгдөг, бусад тэмцээн уралдаанд орох мөнгө байдаггүй. Ингээд олимпод амжилттай оролцох итгэл найдваргүй явсаар байгаад тэмцээндээ ордог. Энэ байдлыг харгалзаж, олимпийн маргаашнаас л сэтгэл санаа амар тайван, өндөр итгэлтэй бэлтгэлдээ гарах нөхцөл бололцоог хангахад төсөв батлагчид анхаарах хэрэгтэй байна” гэж гавьяат тамирчин Б.Наранбаатар ярилаа. Сүүлийн жилүүдэд олимп, тэмцээн уралдаанд оролцох төсөв зардал хасагдаж иржээ.
Олимп, тив, дэлхийд амжилт үзүүлсэн тамирчдаа Төр нь тэтгэж, амьдралын баталгаагий нь хангадаг байх талаар мөн бусад тодорхой саналуудыг Х.Цагаанбаатар, Э.Бадар-Ууган нар хэлэв.
“Амжилтын төлөө хамтдаа” ТББ-ынхан ойрын ирээдүйд залуу тамирчдын чуулга уулзалт зохион байгуулах, хойч ирээдүйн төлөвшил хүмүүжлийн суурь болсон нийтийн биеийн тамирын талаар сурталчилгаа, уулзалт лекц зэрэг олныг хамарсан арга хэмжээ зохион байгуулахаар төлөвлөж байгаагаа Ерөнхийлөгчид танилцуулсан.
Ерөнхийлөгч, биеийн тамир спортын талаар баримталж байгаа бодлогынхоо талаар танилцуулж, тамирчдын эрх ашгийг хамгаалах, нийгмийн баталгааг хангах талаар тамирчидтай санал солилцлоо.
