Өнөөдөр Монгол Улсаас Щвейцарь Улсад суух Онц бөгөөд бүрэн эрхт элчин сайдаар томилогдсон Лувсанцэрэнгийн Оргил Монгол Улсын Ерөнхийлөгч Цахиагийн Элбэгдоржоос Итгэмжлэх жуух бичгээ гардан авлаа.
Швейцарь Улсад суух Онц бөгөөд бүрэн эрхт Элчин сайдаар томилогдсон Л.Оргил нь 1963 онд төрсөн, эхнэр гурван хүүхдийн хамт амьдардаг, 1981-1986 оны хооронд Москвагийн Олон Уллсын харилцааны Институтэд Олон улсын харилцааны мэргэжлээр, 1997-1999 онд АНУ-ын Жорж Вашингтоны Их сургуульд Олон улсын харилцааны магситрын зэргээр тус тус суралцаж төгссөн.
Тэрээр 1985-1986 онд Лондон хот дахь Монгол Улсын ЭСЯ-нд дипломат дадлага хийсэн, 1986-1991 онд Гадаад харилцааны яамны Бодлого төлөвлөлтийн газар Атташе, 1995-1996 онд Вашингтон дахь Монголын ЭСЯ-нд Хоёрдугаар нарийн бичгийн дарга, 1997-1998 онд Тажикстан Улс дахь НҮБ-ийн ажиглагчдын Иргэний асуудал эрхэлсэн ажилтан, 1999-2003 онд “Чингис хаан” экспидикийн Ерөнхий зохицуулагч, 2003-2008 онд “Скайбрайт Интернашионал” компанийн Ерөнхийлөгч, 2008-2009 онд Монгол Улсын Ерөнхийлөгчийн гадаад бодлогын зөвлөх зэрэг ажлуудыг хийж ирсэн. Орос, англи, франц хэлтэй.
Монгол Улс Швейцарь Улстай 1964 онд дипломат харилцаа тогтоосон бөгөөд энэ жил 45 дахь жилтэйгээ золгож байгаа юм. Швейцарь Монгол хоорондын хамтын ажиллагааны нэгэн том хэсэг нь Швейцарын Хөгжлийн хамтын ажиллагааны агентлаг (ШХХАА) юм. Энэхүү агентлаг нь Швейцарын Холбооны Гадаад хэргийн яамны харьяа байгууллага бөгөөд Зүүн Европын орнуудад хэрэгжүүлж буй хөгжлийн хамтын ажиллагаа болон Швейцарын Засгийн газраас бусад орнуудад үзүүлж буй хүмүүнлэгийн тусламжийг хэрэгжүүлдэг. Швейцарын Холбооны Улс хөгжиж буй орнуудад ядуурлыг бууруулах, эдийн засгийн хөгжлийг дэмжих зорилгоор жилд 1.5 тэрбум швейцарь франкийн хөрөнгө оруулалт хийж байна.
Монгол Улсын Ерөнхийлөгч Ц.Элбэгдорж Элчин сайд Л.Оргилд итгэмжлэх жуух бичиг гардуулан амжилт хүсч хэлсэн үгэндээ: Монгол Улс Швейцарь Улс хооронд улс төр, эдийн засгийн уламжлалт таатай харилцаа бий. Юуны түрүүнд Швейцарийн хөгжлийн хамтын ажиллагааны агентлагийн үйл ажиллагааг улам бүр дэмжиж, Швейцарьт Монгол оюутан суралцуулах боломжийг нэмэгдүүлж ажиллах, банк санхүү, өндөр технологийн салбарт хамтын ажиллагаагаа улам өргөжүүлж, Дэлхийн худалдааны байгууллагатай нягт хамтын ажиллагаатай байх зэрэг тодорхой чиглэлүүдэд анхаарлаа хандуулж ажиллахыг онцоллоо.
