Бээжин хот

Эрхэмсэг ноён Дарга аа,

Монгол Улс, Бүгд Найрамдах Хятад Ард Улсын хооронд дипломат харилцаа тогтоосны 60 жилийн ойн баярыг тохиолдуулан Монголын ард түмний өмнөөс болон хувиасаа Танд, Танаар уламжлан найрсаг Хятадын ард түмэнд чин сэтгэлийн халуун баяр хүргэе.

Манай хоёр улсын хооронд дипломат харилцаа тогтоосноос хойшхи 60 жилийн хугацаанд хоёр улсын харилцаа, хамтын ажиллагаа түүхэн сорилтыг амжилттай даван туулж, Дарга Таны 2003 онд Монгол Улсад хийсэн төрийн айлчлалын үеэр тохиролцсоны дагуу эдүгээ Монгол Улс, БНХАУ-ын сайн хөршийн харилцан итгэсэн түншлэлийн харилцааны түвшинд хүрч, улс төр, эдийн засаг, соёл, боловсрол, эрүүл мэнд, батлан хамгаалах, хүмүүнлэгийн зэрэг бүхий л салбарыг хамарч шинэ агуулга хэлбэрээр баяжин улам өргөжин хөгжиж байгаад сэтгэл нэн ханамжтай байна.

Ялангуяа, энэ 2009 онд энэхүү тэмдэглэлт ойг тохиолдуулан хоёр талаасаа бүхий л жилийн туршид олон төрлийн өргөн хүрээтэй арга хэмжээг амжилттай зохион байгуулсаар байна. Ийм төрлийн арга хэмжээг зөвхөн энэ ойн хүрээнд төдийгүй цаашид ч уламжлал болгон зохион байгуулах нь хоёр ард түмний найрамдал, хамтын ажиллагаа, харилцан ойлголцлыг шинэ жаранд бэхжүүлэн хөгжүүлэхэд чухал хувь нэмэр оруулна гэдэгт итгэл төгс байна.

Энэ ялдамд, Эрхэм хүндэт Дарга Танд эрүүл энх, сайн сайхан, найрамдалт Хятадын ард түмэнд хөгжил цэцэглэлийг ерөөе.



 

ЦАХИАГИЙН ЭЛБЭГДОРЖ