Монгол Улсын Ерөнхийлөгч Ц.Элбэгдорж Франц Улсад суух Элчин сайд Ш.Алтангэрэлд Итгэмжлэх жуух бичиг гардуулан, манай улстай олон жилийн найрсаг сайн харилцаатай, эртний соёлтой тус улсад эх орноо төлөөлөх хүндтэй албанд томилогдсонд нь баяр хүргэсэн юм.
Ерөнхийлөгч, Элчин сайдад хандан тус улсад манай орныг сонирхдог, талархан дэмждэг, хамтран ажилладаг байгууллага, хувь хүмүүсийн хүрээг тэлэх, тэдний дэмжлэг туслалцааг авч ажиллахыг зөвлөлөө.
Мөн Парис хотноо барладаг, Монгол Улсын эдийн засгийн чадавхи, зээлжих зэрэглэл зэрэг чухал үнэлгээг гаргадаг байгууллага болох Эдийн Засгийн Хамтын Ажиллагааны Хөгжлийн Байгууллага /OECD/ болон ЮНЕСКО-той нягт хамтран ажиллах хэрэгтэйг анхааруулав.
Манай улсын хувьд малчдын орлого болон экспортыг нэмэгдүүлэхэд малыг эрүүлжүүлэх, мах, арьс ширний чанарыг сайжруулах, стандартжуулах асуудал чухал байгаа. Иймд Парист байгаа Дэлхийн Малын Эрүүл Мэндийн Байгууллагатай хамтран ажиллах асуудлыг онцгой анхаарч, энэ чиглэлд ойрын хугацаанд ахиц гаргахад анхаарч ажиллахыг зөвлөсөн юм.
Үүнээс гадна Парис хотод төвтэй Дэлхийн Аялал Жуулчлалын Байгууллага, мөн хавсран суугаа орнууд болох Испани, Португаль, Монако зэрэг орнуудтай хамтран ажиллаж хилийн чанадад суугаа монгол иргэдийнхээ хууль ёсны эрх ашгийг хамгаалан, дэмжлэг туслалцаа үзүүлж Европын холбооны гишүүн улсууд дахь өөрийн иргэдээ мэдээллээр хангах талаар анхааран ажиллахыг захив.
