Монгол Улсын Ерөнхийлөгч Ц.Элбэгдорж хоёрдугаар сарын 4-нд Дорноговь аймгийн Шүүхийн үйл ажиллагаатай танилцлаа. Тус аймгийн ерөнхий шүүгч Г.Тэгшсуурь “Шүүх эрх мэдлийг гүнзгийрүүлэх ажлын хүрээнд шударга ёс, шударга шүүх гэсэн ойлголтыг ард иргэдэд таниулах, шүүхийг олон нийтэд нээлттэй, ил тод байлгах, ажилдаа хариуцлагатай байх зорилт тавин ажиллаж байна.
Шүүхийн үйл ажиллагааг олон нийтэд ил тод байлгах зорилгоор Замын-Үүд дэх сум дундын шүүх, аймгийн шүүх өөр өөрийн цахим хуудастай болж, мэдээ, мэдээлэл, тайлан, шүүхийн шийдвэр, тогтоолуудыг бүрэн эхээр нь байрлуулж байгаа. Шүүхийн шийдвэр, тогтоол хэрхэн хууль ёсны болоод үндэслэлтэй гарч байгааг иргэд, олон нийт үзэж ойлгох, эрх зүйн мэдлэгээ дээшлүүлэх, шүүгчид шийдвэрээ нягт нямбай боловсруулах, шүүхийн практик судлах зэрэгт энэ нь чухал ач холбогдолтой юм. Тус аймгийн хувьд хилийн томоохон боомттой учир хууль бусаар хил нэвтрэх, эд зүйлсийг нэвтрүүлэх зэрэг хил, гаальтай холбоотой хэргийг бусад аймгаас илүүтэй шийдвэрлэдэг. Гэхдээ эдгээр төрлийн хэрэг сүүлийн жилүүдэд цөөрөх хандлагатай байна. Давж заалдах шатны шүүх жилд 100 орчим хэрэг шийдвэрлэдгийн 70 хувь нь эрүүгийн хэрэг, 30 хувь нь иргэний хэрэг байна. Анхан шатны шүүхээр шийдвэрлэгдсэн хэргийн 30 хувь, иргэний хэргийн шийдвэрийн 4 хувьд хэргийн оролцогчид, зохигчид давж заалдах гомдол гаргаж байна. Захиргааны хэргийн шүүхийн үйл ажиллагаа төлөвшиж, үйлчлүүлэгчдийн тоо өсч байгаа. Захиргааны хэргийн шүүхийн шийдвэрлэсэн хэргийн 30 хувь нь төрийн албан хаагчийн хөдөлмөрийн харилцаатай холбоотой маргаан эзэлж байна” гэж ярив.
Хүн амын бараг 99 хувь хуулиа дагж биелүүлдэг. Тэгэхээр шүүх, прокурор тэр хүмүүсийн эрх ашгийг хамгаалдаг. Хууль зөрчигчдийг шийтгэж байна гэдэг бол иргэдээ хамгаалж буй хэрэг юм. Гол хэрэгжүүлсэн ажил гэвэл шүүхийн шийдвэр нээлттэй боллоо. Өмнө нь шүүхийн шийдвэр төмөр шүүгээнд хадгалагддаг байсан бол одоо вэб сайтад байршуулж, иргэд үздэг, сонирхдог болсон. Нэгэнт шийдвэр ил гараад ирэхээр шүүх, прокурор хийж байгаа зүйлдээ анхааралтай ханддаг. Тэр шийдвэрийг Ерөнхийлөгч ч харж болно. Хуулийн сургуулийн оюутан ч харж болно. Гол нь хэргийн хохирогч, ард иргэд, гэмт хэрэгтэн бүгд харж байдаг. Ингэж харж байгаа болохоор шийдвэр зөв, үндэслэлтэй болж байна. Шүүхийн ажилтнуудыг цаашид дэвшүүлж ажиллуулахад шийдсэн хэргийг нь хардаг. Бусад оронд ч ийм. Бид шүүхийн багц 6 хуулийн төсөл санаачлаад УИХ-д өргөн барчихсан байгаа. Энэ удаагийн УИХ-ыг хэр шударга, сайн ажилласныг эдгээр хуулийн төслийг хэрхэн чанаржуулж батлахаас харах болно. УИХ-ын гишүүн бүхэн авлига, шударга бус, ер нь болохгүй бүтэхгүй байгаа бүх зүйлийг өөрчлье, шүүхэд жинхэнэ шинэчлэл хийе гэж бодож байгаа бол эдгээр хуулийн төслийг батлах ёстой. Ингэсний дараа шүүхийн хэрэглэдэг хуулиудыг өөрчлөнө. Мөн зохион байгуулалтын өөрчлөлт хийнэ гэж Ерөнхийлөгч хэллээ.
Мэдээний том зургуудийг энд дарж татаж авна уу
http://www.president.mn/zamiinuud2012-02-3.zip
