Монгол Улсын Ерөнхийлөгч Ц.Элбэгдорж Катар Улсын Эрхэм дээд Эмир Шейх Хамад Бин Халифа Аль-Танитай Доха хот дахь Эмирийн ордонд уулзлаа. Эмир Шейх Хамад Бин Халифа Аль-Тани нь Катарын газрын тос, байгалийн хийн орлогыг үр ашигтай ашиглах, улс орноо хөгжүүлэхэд онцгой анхаарч, бас залуучуудын боловсрол, спортыг дэмждэг юм. Эмир өөрийн ивээлдээ Азийн тоглолт, Ази болон дэлхийн залуучуудын хөлбөмбөгийн аварга шалгаруулах тэмцээн зэргийг амжилттай зохион байгуулсан билээ.
Ерөнхийлөгч Ц.Элбэгдорж байгалийн баялгийн орлогоо зөв зохистой зарцуулж сүүлийн 15 жилийн дотор бүс нутагтаа тэргүүлэгч улс болж хөгжиж чадсан Катарын туршлага нь Монгол Улсын хувьд үлгэр жишээ болохуйц юм гэдгийг дурьдаад, хоёр тал хөрөнгө оруулалтын салбарт харилцан ашигтай хамтран ажиллах талаар ярилцав. Ялангуяа сэргээгдэх эрчим хүч, дэд бүтцийн салбар, мөн спортын болон мэдээллийн салбаруудад хамтран ажиллах боломжтой талаар санал солилцлоо.
Катар Улсын Эрхэм дээд Эмир Шейх Хамад Бин Халифа Аль-Тани Катарын санхүүгийн боломжийг ашиглаж, харилцан ашигтай байх зарчмаар дэд бүтэц, эрчим хүчний бие даасан байдлыг хангах, мөн бусад салбарт хамтрахад бэлэн байгаагаа илэрхийлсэн юм. Мөн “Техник, эдийн засгийн үндэслэлийг олон улсын түвшинд хийсэн төслүүдэд бид хөрөнгө оруулахад бэлэн” гэв.
Тэрээр цааш нь “ Та 2050 оны дэлхийн хөлбөмбөгийн аварга шалгаруулах тэмцээнийг эх орондоо зохион байгуулах мөрөөдөлтэй байгаагаа илэрхийлсэн. Энэ бол сайхан эрмэлзэл. Бид 2022 оны дэлхийн аварга шалгаруулах тэмцээнийг зохион байгуулна. Цаашдаа олимпийн наадмыг Катарт зохион байгуулах бодолтой байгаа. Энэ нь спортоор дамжуулж иргэндээ болон улс орондоо оруулж байгаа том хөрөнгө оруулалт” гэлээ.
Катар нь зөвхөн спортын төдийгүй бусад олон улс болон бүс нутгийн арга хэмжээнүүдийг өндөр хэмжээнд зохион байгуулж, энэ чиглэлээр амжилтад хүрч байгаа. НҮБ-ын Соёл иргэншлийн холбооны чуулга уулзалтын үеэр л гэхэд Олон улсын номын үзэсгэлэн яармаг, Хууль эрхзүй болон авилгын асуудлаархи олон улсын хурал зэрэг хэд хэдэн арга хэмжээ зэрэг зохион байгуулж байсан юм.
Ерөнхийлөгч Ц.Элбэгдорж Катар Улсын Эрхэм дээд Эмир Шейх Хамад Бин Халифа Аль-Таниг Монгол Улсад айлчлахыг урив.
Мэдээний том зургийг энд дарж татаж авна уу.
http://share.gogo.mn/kvNg96wrl319221323669241/2011_12_12zurag.zip
