Монгол Улсын Ерөнхийлөгч Ц.Элбэгдорж өнөөдөр Эль Кувейт хот дахь Монгол Улсын Элчин сайдын яамны үйл ажиллагаатай танилцлаа. Монгол Улс 2009 оны 11-р сараас Кувейт Улсад Элчин сайдын яам нээн ажиллуулах болсон нь хоёр орны харилцаа, хамтын ажиллагааг өргөжүүлэхэд чухал түлхэц болсон юм. Мөн Улаанбаатар хотноо Кувейт Улсын Элчин сайдын яам 2010 оноос хойш ажиллаж байна.
Хоёр орны хооронд худалдаа эдийн засгийн хэд хэдэн баримт бичиг байгуулагдсан, мөн сүүлийн үед өндөр дээд хэмжээний болон засгийн газрын гишүүд, парламентын гишүүдийн айлчлал тогтмолжиж , Кувейтын талаас хөрөнгө оруулах сонирхол нэмэгдэж, мөн хувийн хэвшлийн салбарт бизнесийн хамтын ажиллагаа яригдаж, боловсрол соёлын салбарт хамтын ажиллагааны эхлэл тавигдаж байгаа энэ цаг үед Элчин сайдын яам нээсэн нь цаг үеэ олсон чухал үйл явдал байсныг Монгол Улсаас Кувейт Улсад суугаа Онц бөгөөд Бүрэн эрхт Элчин сайд К.Сайран онцлов.
Одоогийн байдлаар Монгол Кувейт Улсын иргэд харилцан визтэй зорчиж байна. Тус улсад хоёр оюутан араб хэлний мэргэжлээр суралцаж байна.
Үүгээр Монгол Улсын Ерөнхийлөгч Ц.Элбэгдоржийн Кувейт Улсад хийсэн албан ёсны айлчлал өндөрлөж, Ерөнхийлөгч НҮБ-ын ивээл дэх Соёл Иргэншлийн Холбооны 4-р чуулга уулзалтад оролцохоор Катарын Доха хотыг зорилоо.
Мэдээний том зургийг эндээс татаж авна уу
http://share.gogo.mn/WPR2Km4gcJ84051323515708/2011_12_10.rar
