Монгол Улс НҮБ-д гишүүнээр элссэний 50 жилийн ойд зориулсан үндэсний бага хуралд оролцогчдод
Монгол Улс НҮБ-д гишүүнээр элссэний түүхт 50 жилийн ойг тохиолдуулан олон улсын нэр хүнд бүхий эл байгууллагатай харилцах, хамтран ажиллах эрхэм үйлст оюун ухаан, хүч чадлаа дайчлан оролцож ирсэн болон эдүгээ хүчин зүтгэж буй нийт хүмүүст чин сэтгэлийн баяр хүргэж, цаашдын ажил үйлсэд нь өндөр амжилт, амьдралд нь аз жаргал, эрүүл энхийг хүсэн ерөөе.
Өнгөрсөн ХХ зуун Монгол Улсын түүхэнд олон чухал үйл явдлаар дүүрэн зуун байлаа. Одоогоос яг нэгэн зууны тэртээ 1911 онд Монголчууд бид тусгаар тогтнолоо сэргээн тунхаглаж, 1921 онд Ардын засгийн газрыг байгуулж, 1961 онд НҮБ-ын бүрэн эрхт гишүүн болж олон улсын хамтын нийгэмлэг дэх хууль ёсны байр сууриа эзэлсэн түүхтэй. 1990 онд ардчилсан хувьсгалыг тайван замаар хийж ардчилал, зах зээлийн тогтоолцоонд амжилттай шилжсэн билээ.
Дэлхийн улс түмэн хойч үеийнхнээ дайны аюулаас ангижруулах, хүний эрх, шударга ёсыг сахин хамгаалах, нийгмийн дэвшлийг урагшлуулах, амьдралын түвшинг сайжруулахад тус дөхөм үзүүлэх зорилгын үүднээс хүчин чармайлтаа нэгтгэн зүтгэхээр шийдвэрлэж 1946 онд НҮБ-ыг үүсгэн байгуулсан. Энэхүү эрхэм үйл хэрэгт Монгол Улс эхнээс нь оролцох хүсэл эрмэлзэлтэй байсан бөгөөд НҮБ-ын гишүүн болох өргөдлөө анх 1946 оны 6 дугаар сарын 24-нд албан ёсоор гаргасан байна. Гэвч НҮБ-д элсэх зам манай улсын хувьд дардан шулуун байсангүй. Бүхэл бүтэн 15 жилийн туршид үзэл суртлын сөргөлдөөн, хүйтэн дайны хатуу уур амьсгалыг даван туулж, тууштай тэмцэж ирсний дүнд 1961 оны 10 дугаар сарын 27-нд Монгол Улс НҮБ-ын 101 дэх гишүүн болсон юм.
Тухайн үед НҮБ-ын гишүүн байсан 100 орчим улс орон бүгд Монгол Улсын төлөө саналаа өгсөн нь манай улсын тусгаар тогтнолыг хүлээн зөвшөөрсөн хэрэг байлаа. Манай орны хувьд энэ бол улс төр, дипломатын үнэлж баршгүй том амжилт, тусгаар тогтнолын улс төрийн чухал баталгаа мөн. Улмаар олон улсын хэмжээнд байр сууриа бэхжүүлэх, гадаад бодлогын үйл ажиллагаагаа өргөжүүлэн идэвхжүүлэх боломж нээгдсэн юм. Монгол Улстай дипломат харилцаа тогтоох эрмэлзэл, эрх зүйн үндэс, улс төрийн орчин эрс өөрчлөгдөж, 1961 онд манай улс ердөө 19 улстай дипломат харилцаатай байсан бол эдүгээ 155 улстай дипломат харилцаа тогтоогоод байна. Мөн олон улсын болон бүс нутгийн засгийн газар хоорондын 60 гаруй байгууллагын гишүүн болж, олон улсын 240 орчим гэрээ, конвенцид нэгдэн орсон нь дэлхий ертөнцөд манай улсын эзэлж буй орон зай, хүлээсэн үүрэг өргөн болсныг гэрчилнэ.
Монгол Улс дэлхийн нэр хүндтэй эл байгууллагад бүрэн эрхт гишүүнээр элссэн нь НҮБ-ын эрхэм зорилт, зарчмуудыг хэрэгжүүлэхийн төлөө олон улсын хамтын нийгэмлэгээс тавьж буй хүчин чармайлтад хувь нэмрээ оруулах үүд хаалгыг нээж өгсөн юм. Сүүлийн жилүүдэд манай Зэвсэгт хүчнийхэн НҮБ-ын энхийг сахиулах үйл ажиллагаанд оролцож, хүлээсэн үүргээ нэр төртэй биелүүлж байгааг энд онцлон тэмдэглэхэд таатай байна.
Өнгөрсөн хугацаанд Монгол Улсын зүгээс энх тайвныг бэхжүүлэх, зэвсэг хураах, олон улсын хэлэлцээний үндсэн зарчмуудыг тогтоох, бүх нийтийн боловсролыг дэмжих, хөдөөгийн эмэгтэйчүүдийн аж байдлыг сайжруулах, нийгмийн хөгжилд хоршооллын үүрэг ролийг нэмэгдүүлэх, далайд гарцгүй хөгжиж буй орны хүндрэл бэрхшээлийг даван туулах зэрэг олон асуудлыг санаачилж НҮБ-ын Ерөнхий Ассамблейгаар батлуулсны сацуу тэдгээрийг хэрэгжүүлэх чиглэлд НҮБ болон бусад гишүүн орнуудтай идэвхтэй хамтран ажиллаж байна. Саяхан манай Засгийн газар НҮБ-тай хамтран Далайд гарцгүй хөгжиж байгаа орнуудын Олон улсын судалгааны төвийг үүсгэн байгуулах Олон талт хэлэлцээрийг батлах асуудлыг хэлэлцэж дэмжсэн шийдвэр гаргасан ба энэ төв нь Улаанбаатарт байгуулагдах олон улсын засгийн газар хоорондын анхны байгууллага болохын хувьд онцгой ач холбогдолтой юм. Монгол, НҮБ-ын харилцаа, хамтын ажиллагаа жилээс жилд олон чухал арга хэмжээгээр өргөжин бэхжиж ирлээ.
Монгол Улсын хөгжилд НҮБ-ын тусламж, дэмжлэг ихээхэн тус нэмэр болж ирснийг онцлон тэмдэглэх ёстой. Эдийн засгийн туслалцаа авч эхэлсэн 1963 оноос хойш НҮБ-аас манай улсад багагүй хэмжээний хөрөнгө санхүүгийн буцалтгүй тусламж үзүүлсний сацуу тоогоор үнэлэшгүй мэдлэг, туршлага, хамтын ажиллагааны боломж, чадавхийг монголчууд бидэнд бий болгож өгсөн билээ. НҮБ-ын зүгээс улс орондоо хүмүүнлэг, энэрэнгүй, ардчилсан нийгэм байгуулах Монголын ард түмний хүсэл эрмэлзлийг цаашид ч идэвхтэй дэмжиж, үр өгөөжтэй хамтран ажиллана гэдэгт эргэлзэхгүй байна.
Монгол Улс ч, НҮБ ч өөрчлөгдөн шинэчлэгдэж байгаа өнөө үед манай улс НҮБ-ын үйл ажиллагаанд илүү идэвхтэй оролцох, үр өгөөжтэй хамтран ажиллах арга замыг эрэлхийлэх нь нэн чухал шаардлагатай байгаа бөгөөд энэ чухал үйлсэд өнөөдрийн бага хурал хувь нэмрээ оруулна гэдэгт итгэлтэй байна.
Бага хурлын ажиллагаанд амжилт хүсье.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 10 дугаар сарын 27-ны өдөр
