Монгол Улсын Ерөнхийлөгчийн зарлигаар Дани Улсын Хернинг хотноо болсон дэлхийн аварга шалгаруулах тэмцээнээс мөнгөн медаль хүртсэн ЦЕГ-ын Биеийн тамир спортын “Хүч” хорооны тамирчин Очирбатын Бурмаа, Монгол Сонсголын бэрхшээлтэй тамирчдын спортын үндэсний хороо /МСБТСҮХ/ -ны тамирчин Дамдины Очбадрал нарыг Монгол Улсын гавъяат тамирчин цолоор,
Данийн Хернинг хотноо болсон 2009 оны ДАШТ-ээс мөнгө, хүрэл медаль хүртэн амжилттай оролцсон тамирчдыг дасгалжуулсан багш Түмэндэмбэрэлийн Сүхбаатарыг Монгол Улсын гавъяат дасгалжуулагч цолоор,
МСБТҮХ-ны Ерөнхийлөгч Бадарчийн Отгонбаярыг Сүхбаатарын одонгоор, Үндэсний шигшээ багийн тамирчин Бадрахын Одончимэг, Хүч спорт хорооны тамирчин Очирбатын Насанбурмаа, МСБТҮХ-ны тамирчин Бадамсамбуугийн Мөнх-Оргил, Баянмөнхийн Наваанжамц, Милхаажавын Ганбат, Ширэндэвийн Батбаатар нарыг Хөдөлмөрийн гавъяаны улаан тугийн одонгоор тус тус шагналаа.
Шагнал гардуулсны дараа Монгол Улсын Ерөнхийлөгч Ц.Элбэгдорж тамирчдад хандаж хэлсэн үгэндээ: “Монгол түмнийхээ баярын магнайг тэнийлгэсэн спортын амжилтуудын буухиаг өртөөлөн чөлөөт бөхийнхөн маань Дани Улсын Хернинг хотод зохиогдсон чөлөөт бөхийн 2009 оны Дэлхийн аварга шалгаруулах тэмцээнд амжилттай оролцоод иржээ. Монголын сонсголын бэрхшээлтэй тамирчид, багш дасгалжуулагчид ч бас дэлхийд дуурсагдах амжилтын эзэд болсоор байна. Та бүхний хөлс хүч, хөдөлмөр зүтгэлээр олж авсан спортын энэхүү амжилт бол спорт сонирхогч хүн бүрийн ялалт бөгөөд Монгол түмний маань үнэт баялаг юм. Та бүхэнд спортын улам илүү амжилт хүсч амьдралд тань сайн сайхан бүхнийг хүсэн ерөөе!” хэмээн онцоллоо.
