Милан хотыг дэлхий нийтийн анхаарлын төвд байлгадаг нэгэн чухал зүйл бол тус хотын хөлбөмбөгийн алдарт багууд юм. Тэдгээрийн нэг болох “Интер Милан” клубт Монгол Улсын Ерөнхийлөгч Ц.Элбэгдорж өнөөдөр зочлов. “Интер Милан” багийн Ерөнхийлөгч ноён Массима Моратти Ерөнхийлөгчийг угтан авч, клубээ танилцуулав.
“Манай клубт хүндтэй зочид олон ирдэг ч олон улсын тавцанд нэр хүндтэй, спортод хайртай Ерөнхийлөгч Та бидний хувьд онцгой зочин юм. Таныг “Интер Милан”-ы “шүтэн бишрэгч” гэж би мэднэ.
Өнгөрсөн жил Ерөнхийлөгч та Олон улсын хөлбөмбөгийн холбоо FIFA-д зочилж, хөлбөмбөгийг өөрийн оронд хөгжүүлэх талаар сонирхолтой саналууд тавьсныг би санаж байна” гэж ноён М.Моратти ярилаа.
Ерөнхийлөгч Ц.Элбэгдорж клубын удирлагуудад хандан, монголын айлчлалын бүрэлдэхүүнийг хүндэтгэн хүлээж авч байгаад нь талархал илэрхийлээд, хамтын ажиллагааны талаар тодорхой саналууд тавив.
Тухайлбал, дасгалжуулагч, тоглогчдыг Монголд урьж авчрах, залуучууд хүүхдүүдийн хөлбөмбөгөөр хичээллэх урам зоригийг дэмжих, хөлбөмбөгийн сургууль байгуулах, “Интер Кампус” төслийг Монголд хэрэгжүүлэх хүсэлтийг тавилаа.
Ноён Моратти , Ерөнхийлөгч Ц.Элбэгдоржийн саналуудыг бүрэн дэмжиж байгаагаа илэрхийлээд, “Интер Кампус” төслийг монголд хэрэгжүүлэхээ амлав. Энэ амлалт ажил хэрэг болох эхлэл газар дээрээ тавигдаж, охин Карлотта Моратти нь төслийг хэрэгжүүлэх судалгааг ойрын үед эхлүүлэхээ мэдэгдлээ. “Интер Кампус” бол багачуудыг хөлбөмбөгөөр хичээллэх боломж нөхцөлийг хангаж өгдөг төсөл бөгөөд дэлхийн 24 оронд хэрэгжиж байна.
“Бид энэ төслийг хэрэгжүүлснээр аваргуудыг хайдаггүй. Харин спортоор дамжуулж нийгмийн сайн сайхныг бүтээхэд оролцож байгаа юм. Хүүхдэд тоглох эрхийг өгч, амар тайван, зорилготой, учир утгатай амьдрах хүслийг өгөх нь бидний зорилго” гэж хатагтай К.Моратти хэлэв.
Өдгөө Европын Холбооны хамгийн хүчирхэг лигүүдийн нэг болох Сери А-ийн гол төлөөлөгчдийн нэг болох тус клуб 100 жилийн түүхэндээ 18 удаа Италийн аварга, 5 удаа Италийн цомын эзэн, 7 удаа Италийн супер цомын эзэн 3 удаа Европын аварга, 3 удаа дэлхийн аварга болж байжээ.
Спорт зөвхөн спорт төдийгүй хүн төрөлхтөнийг холбох гүүр, энхтайвны төлөөх тэмүүлэл, амар тайван амьдрал, тухай цаг үеийнхээ түүх болдгийг “Интер Милан”-ы жишээ харуулж байна.
Энэхүү уулзалтад “Интер Милан” клубын дэд Ерөнхийлөгч Ангеломарио Моратти, гүйцэтгэх захирал Э.Паолилло, дэд ерөнхий захирал С. Филүччи, “Inter Brand” хариуцсан захирал А.Скорза, худалдаа хариуцсан захирал М.Д.Виво, “Inter Futura”-ийн захирал К.Моратти, багийн тоглогч Диего Форлан, Франческо Толдо, Филиппе Күтино нар байлцлаа.
“Интер Милан” клубын Ерөнхийлөгч ноён Массима Моратти Ерөнхийлөгч Ц.Элбэгдоржид 10 дугаартай хар хөх өнгийн хослолыг дурсгал болгон хадгалууллаа.
