Бүгд Найрамдах Итали Улсын Ерөнхийлөгчийн урилгаар тус улсад албан ёсоор айлчилж буй Монгол Улсын Ерөнхийлөгч Цахиагийн Элбэгдорж Италийн Депутатуудын танхимын Ерөнхийлөгч Жанфранко Финиг хүлээн авч уулзлаа. Ноён Ж.Фини “Итали Монголын найрсаг харилцааг Таны энэхүү айлчлал улам бүр ойртуулах болно гэдэгт би эргэлзэхгүй байна. Хэдийгээр манай хоёр орон газар нутгийн хувьд хол оршдог, хоёр өөр соёл иргэншил боловч бидэнд хамтын ажиллагаагаа өргөжүүлэх олон учир шалтгаан байгаа.
Холоос ирсэн зочиндоо анхаарал тавьдаг итали уламжлалын дагуу Ерөнхийлөгч Таны айлчлалыг эхэлсэн өдрөөс нь харж уулзахыг хүлээж байлаа. Хүний эрхийг хамгаалах чиглэлээр явуулж буй холч ухаантай бодлого тань олон улсын нэр хүндтэй шагнал хүртсэнд талархал илэрхийлье. Шагнал гардуулахдаа хэлж байсан Таны үгийг сонсоод би бахархаж байлаа. Аливаа лидерийн хувьд хүний эрхийг дээдэлнэ гэдэг хамгийн чухал бодлого юм.
Монгол Улс Азид, бүс нутагтаа ардчиллын үлгэр жишээ болж байгаад мөн талархал илэрхийлж байна.
Айлчлалын дагуу хийж хэрэгжүүлэх олон ажил бий. Хоёр орны засгийн газар, албаны хүмүүс айлчлалын үеэр яригдсан асуудлуудыг ажил хэрэг болгохын төлөө амжилттай хэрэгжүүлнэ гэдэгт итгэж байна” гэлээ.
Ерөнхийлөгч Ц.Элбэгдорж халуун дотноор хүлээн авч байгаа Италийн төр засгийн тэргүүн, ард түмэнд талархаж байгаагаа илэрхийлэв.
Тэрээр хэлэхдээ “Итали Улсад хийж буй айлчлалынхаа хүрээнд Италийн Ерөнхийлөгч Ж.Наполитанотой уулзаж Монгол Италийн харилцаа хамтын ажиллагааг цаашид гүнзгийрүүлэх чиглэлээр санал солилцсон. Яриа хэлэлцээний дүнд сэтгэл хангалуун байна.
Манай хоёр орны харилцаа хамтын ажиллагаа өргөжин хөгжих суурь, боломжууд олон бий гэж Таны хэлсэнтэй би санал нэг байна. Европын Холбооны гишүүн орнуудтай харилцаа, хамтын ажиллагааг хөгжүүлэх нь манай улсын гадаад бодлогын тэргүүлэх чиглэлийн нэг байдаг. Монгол Улс Ромд Элчин сайдын яамаа нээсэн нь харилцааг өргөжүүлэхэд чухал түлхэц болох юм. Түүнчлэн Монгол Улс, Европын Холбооны хооронд “Түншлэл, хамтын ажиллагааны хэлэлцээр” \ТХАХ\-ийг үзэглэсэн, удахгүй гарын үсэг зурахаар төлөвлөж байна. ТХАХ нь хоёр орны хамтын ажиллагаа, ялангуяа эдийн засгийн хамтын ажиллагааг хөгжүүлэх сайхан боломж олгоно гэдэгт итгэлтэй байна.
Аливаа харилцаанд хууль тогтоох байгууллагуудын хамтын ажиллагаа чухал гэдэг нь эргэлзээгүй. Монгол Улсын Их хуралд Монгол Италийн парламентын бүлэг ажилладаг бөгөөд Италийн парламентад итали-монголын парламентын бүлэг байгуулагдвал холбоо тогтоон ажиллах хүсэлтэй байна.
Монгол Улс энэ оны 7-р сараас эхлэн Ардчилсан орнуудын хамтын нийгэмлэгийг даргалах нэр хүндтэй үүргийг хүлээсэн. АОХН-ийн үйл ажиллагаанд Итали Улс идэвхитэй оролцож дэмжиж ирсэн бөгөөд цаашид ч Монгол Улсын зүгээс гарч буй санал санаачилгуудыг дэмжиж ажиллана гэдэгт итгэж байна. Тухайлбал бид ардчиллын боловсролыг түгээх чиглэлээр тодорхой саналуудыг гаргаж, ажил хэрэг болгох яриа хэлцэл эхлээд байна” гэв.
Ноён Ц.Фини, дэлхийн олон улс оронд өрнөж байгаа үйл явц нь ардчиллын боловсрол чухал болохыг нотолж байна гээд энэ чиглэлийн аливаа санаачилгуудыг бүрэн дүүрэн дэмжиж ажиллах болно гэлээ.
Уулзалтын үеэр Монгол Улсын Ерөнхийлөгч Ц.Элбэгдорж, Италийн депутатуудын танхимын Ерөнхийлөгч Ж.Фини нар харилцааг хөгжүүлэх бусад боломжууд, бүс нутгийн болон олон улсын байдлын талаар санал солилцож харилцан ярилцлаа.
Италийн депутатуудын танхимын Ерөнхийлөгч Ж.Фини нь сэтгүүлч мэргэжилтэй, Залуучуудын фронтоос улс төрийн гараагаа эхэлсэн, Ерөнхий сайдын орлогч, Гадаад хэргийн сайдаар ажиллаж байсан туршлагатай улстөрч юм.
