Эрхэм хүндэт профессор, багш, ажилтан, сонсогч, магистрант, докторант Та бүхэнд Монгол Улсад төр, аж ахуйн мэргэшсэн удирдах ажилтан бэлтгэх сургууль үндэслэн байгуулагдсаны 85 жилийн ойг тохиолдуулан чин сэтгэлийн халуун баяр хүргэж, сургалт, эрдэм судлал, ажил бүтээлийн өндөр амжилт хүсэн ерөөе.
Монгол Улсын анхдугаар Үндсэн хуулийг баталж, Бүгд Найрамдах Улсаа зарлан тунхаглаж байсан тэртээх 1924 онд түр сургалтын хэлбэрээр үндэс суурь нь тавигдсан Удирдлагын Академи өдгөө 85 жилийнхээ ойгоо тэмдэглэж байгаа нь манай орны төр, нийгэм, бизнесийн амьдралд томоохон тэмдэглэлт үйл явдал болж байна.
Тус сургуулийн нэр, зорилго, чиглэл, сургалтын агуулга, хэлбэр улс орны нийгмийн байгууллын шинж чанар, хөгжлийн онцлогийг тусган өөрчлөгдөж ирсэн хэдий ч өнгөрсөн 85 жилд үндэсний удирдах боловсон хүчин бэлтгэх эрхэм үйлсэд оруулсан хувь нэмрийг Монгол Улсын засаг, төр өндөр үнэлж байдаг билээ. Манай орны үе үеийн нэр хүндтэй эрдэмтэд тус сургуульд багшилж, төгсөгчид нь эх орныхоо өнцөг булан бүрт үр бүтээлтэй ажиллаж, олон түмнийг бүтээн байгуулалт, шинэ амьдралд оройлон манлайлж ирснийг тэмдэглэн хэлэхэд таатай байна.
Монгол оронд өрнөсөн өөрчлөлт, шинэчлэлийг гүнзгийрүүлэн хөгжүүлж, хөгжил дэвшлийн шинэ өндөрлөгт хүрэхэд төр, захиргааны болон бизнесийн бүх шатны удирдах ажилтны мэдлэг, чадвар, гүйцэтгэх үүрэг, хүлээх хариуцлага нэн их бөгөөд тэдэнд тавигдах шаардлага ч шинэчлэгдэж байна. Эдүгээ цаг үе удирдах ажилтнуудаас үндэсний ухамсар, эх оронч сэтгэлгээ, эдийн засаг, менежментийн өргөн мэдлэг, зоримог санаачилга, шинийг хурдан мэдэрч хэрэгжүүлэх чадварыг шаардаж байна. Түүнчлэн хүнийг мэдрэх, хүнтэй ажиллах, хүний төлөө тавих анхаарал халамжаа өндөржүүлэх хэрэгтэй байна. Даяаршлын эринд тэдэнд мэдээллийн технологи, гадаад хэлний мэдлэг, тэрхүү мэдлэгээ ажил, амьдралдаа хэрэглэх ур чадвар, дадал чухалчлагдах болно.
Эдгээр мэдлэг, ур чадварыг нийт төгсөгчиддөө бүрэн эзэмшүүлэхийн тулд сургалтын чанарыг сайжруулах, багшлах бүрэлдэхүүнийг эрдэмжүүлэн чадваржуулах, сонсогч, магистрант, докторантуудын сурч хөгжих таатай орчин бүрдүүлэх, сургалт, судалгааны ажлыг амьдрал, практиктай нягт уялдуулах нь Академийн нийт хамт олны өмнө тулгарсан зорилт болж байгааг тэмдэглэж байна.
Манай орны төрийн байгууллагын чадавхийг бэхжүүлэх, тэдгээрийн үйл ажиллагааны үр нөлөө, үр ашгийг дээшлүүлэх, иргэдэд үзүүлэх үйлчилгээнийх нь хүртээмж, чанарыг сайжруулах нь өнөөгийн чухал зорилт болон тавигдаж байгаа бөгөөд энэхүү зорилтыг амжилттай хэрэгжүүлэхэд Академийн хамт олон дорвитой хувь нэмэр оруулна гэдэгт би итгэж байна.
Үндэсний удирдах ажилтан бэлтгэх уурхай болсон Удирдлагын Академийн ажил үйлс өөдрөг, амжилт бүтээл арвин, эрдэмтэн багш, сонсогч, магистрант, докторант Та бүхний мэдлэг, мэргэжлийн ур чадвар дэлхийн энтэй байх болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
