Монгол Улс Ардчилсан орнуудын дарга улсын хувиар 2011 оны 9 дүгээр сарын 23-нд НҮБ дэх Ардчилсан орнуудын бүлгийн сайд нарын түвшний албан бус уулзалтыг зохион байгуулав. Ардчиллын бүлгийн уулзалтыг Нью Йорк хотноо чуулдаг Нэгдсэн Үндэстний Байгууллагын чуулганы үеэр уламжлал болгон АОХН-ийн дарга улс зохион байгуулдаг бөгөөд энэ удаад Монгол Улс “Ардчиллын боловсрол” сэдвээр хэлэлцүүлэг өрнүүллээ.
Ардчиллын бүлгийн уулзалтыг нээж, Монгол Улсын Ерөнхийлөгч Ц.Элбэгдорж үг хэлэв. Тэрээр Монгол Улс АОХН-ийн дарга улсын хувьд ирэх 2 жилд тэргүүлэх ач холбогдол өгч ажиллах чиглэлүүд, түүний дотор ардчиллын боловсролыг дэмжих, хөгжүүлэхийн ач холбогдол болон засаглалыг цэвэр байлгах, энэ хүрээнд авилгыг үл тэвчих орчин бий болгохын төлөө ажиллахаа илэрхийлэв.
Мөн Бүгд Найрамдах Киргиз Улсын Ерөнхийлөгч хатагтай Роза Отунбаева оролцож, өөрийн улс орондоо болж буй ардчилсан өөрчлөлтийг дэмжиж буйд улс орнуудад талархлаа илэрхийлэв. Тэрээр ардчиллын үлгэр жишээ загвар орнуудтай, ялангуяа Монгол Улстай туршлага хуваалцахад бэлэн байгаагаа илэрхийлсэн юм.
Ардчиллын бүлгийн уулзалтад АОХН-ийн 140 орчим орныг урьсан бөгөөд үг хэлсэн төлөөлөгчид хуралдааны ирц өндөр байгааг цохон, энэ нь дэлхийн улс орнууд ардчилсан үйл явцыг сонирхож буйн илрэл гэж байлаа. Уулзалтад Литва, Унгар, Морокко, Тайландын Гадаад хэргийн сайд нар болон өндөр албаны 20 гаруй төлөөлөгч үг хэлэв.
АОХН-ийн Байнгын нарийн бичгийн дарга нарын газрын Гүйцэтгэх захирал профессор Бронислав Миштал, ЮНЕСКО-гийн Нью-Йорк дахь салбарын тэргүүн Филипе Криделка, НҮБ-ын Ардчиллын төлөөх сангийн гүйцэтгэх захирал Роланд Рич, НҮБ-ын ивээл дэх Соёл иргэншлийн холбооны дээд төлөөлөгч Жорж Сампай нар үг хэлж, Монгол Улсын тэргүүлэх чиглэлүүдийг дэмжин, хамтран ажиллахаа илэрхийлж байлаа.
Ийнхүү Монгол Улс АОХН-ийн дарга улс болсноос хойш тус нийгэмлэгийн Удирдах зөвлөлийг байгуулж, Ардчиллын бүлгийн уулзалтаа амжилттай зохион байгуулав. Удирдах зөвлөлд АНУ, БНСУ, Кабо- Верде, Канад, Итали, Литва, Мали, Мексик, Монгол, Нигери, Морокко, Өмнөд Африк, Румын, Унгар, Урагвай, Польш, Португал, Филиппин, Финланд, Чех, Чили, Швед, Эль Салвадор, Энэтхэг, Япон улс багтаж байна.
Манай улс тэргүүлэх чиглэлийнхээ хүрээнд Польштой хамтран ардчиллын боловсролын асуудлаарх Ажлын хэсгийн үйл ажиллагааг эхлүүлэхэд бэлэн болоод байна. Энэ чиглэлээр Энэтхэгтэй хамтран Азийн бүс нутгийн хурал, ЮНЕСКО-той хамтран олон улсын семинар байгуулахаар тохиролцов.
