Монгол Улсын Ерөнхийлөгч Цахиагийн Элбэгдорж 2011-2012 оны хичээлийн шинэ жилийн нээлтэд зориулан уламжлал ёсоор хоёрдугаар цагийн теле хичээлийг “Монголын сайхан орноор” сэдвээр заахаар болоод байна. Энэ жилийн теле хичээлийг 9 дүгээр сарын 1-ний 09 цаг 15 минутад МҮОНТ-ийн 600-гийн студиэс орон даяар шууд дамжуулан үзүүлэх юм.
Ерөнхийлөгч 2009 онд “Дэлхийн дулаарал ба Монгол”, 2010 онд “Монголын бахархал” зэрэг сэдвүүдээр хичээл заасан билээ. Харин энэ жилийн хичээл нь Монголын тулгар төрийн 2220 жилийн ой, Их Монгол Улсын 805 жилийн ой, Үндэсний эрх чөлөөний хувьсгалын 100 жилийн ой зэрэг түүхэн ойнууд тохиосон тэмдэглэлт энэ жил болж буйгаараа онцлогтой юм.
“Монголын сайхан орноор” теле хичээлээр Монгол орны үзэсгэлэнт байгаль, баатарлаг хүн зон, хосгүй гайхамшигт өв соёл, мянга мянганыг өртөөлөн ирсэн монгол ёс, зан заншлын талаар ярих юм.
Хоёрудгаар цагийн теле хичээлд манай орны сурагчид, оюутнуудыг өргөнөөр хамруулах талаар БСШУЯ-наас бүх сургуулиудад чиглэл өгч идэвхитэй ажиллаж байна.
9 дүгээр сарын 1-нд Ерөнхийлөгчийн хичээлийг зөвхөн оюутан сурагчид төдийгүй манай багш, сурган хүмүүжүүлэгчид нийт эцэг эхчүүд, иргэд хүсэн хүлээдэг болжээ.
