БАЯНХОНГОР АЙМГИЙН 70 ЖИЛИЙН ОЙД
Та бүхнийхээ энэ өдрийн түмэн амгаланг айлтган мэндчилье.
Монголд анхны төрт улс байгуулагдсаны 2220 жил, Их Монгол Улсаа нэгтгэн байгуулсаны 805 жил, Эрх чөлөө тусгаар тогтнолын 100 жил, Ардын хувьсгалын 90 жил, Монгол Улс НҮБ-д элссэний 50 жилийн ойг тэмдэглэж буй он цаг мөчтэй танай аймаг байгуулагдсаны 70 жилийн ой давхцаж буй нь ихээхэн утга учир, бэлгэ дэмбэрэлтэй болж байна.
Ийнхүү өлзий учрал бүрдсэн түүхт ойнуудын баярын мэндчилгээг Хонгор нутгийн та бүхэндээ хүргэж инээд баяслаар дүүрэн байхын ерөөл дэвшүүлье.
Хонгор нутагт дэлхийн хамгийн эртний хүн амьдарч байсан гэрч Баянлигийн “Цагаан агуй”, Шинэжинстийн “Босго”, Баян-Өндөрийн “Чихний агуй”, Их монгол улсаа нэгтгэн байгуулахын төлөөх тэмцлийн эхэн үед Их эзэн Чингис хаан хоноглон байлдаж явсан түүхт Заг Байдрагийн “Хүрэн бэлчир”, “Биндэръяа хөх нуур”, Далайн түвшнээс дээш 4000 метр өргөгдсөн Говь-Алтайн нурууны ноён оргил “Их богд” хайрхан, Аливаа эмгэгийг анагаах увьдас төгс “Шаргалжуут”, “Өхөг”, “Халиут”-ын халуун хүйтэн рашаан, Хангайн нуруунаас эх авч “Орог”, Бөөнцагаан нуураа тэжээж тэтгэсэн эх оронч Түй, Байдрагийн түргэн урсгалт голууд зэрэг үзэсгэлэнт тэнүүн байгальтай газар зүйн 3 бүсийн онцлогийг өвч бүрнээ харуулсан Говь хангайн цэнхэр орон гэдгийг Ерөнхийлөгч миний бие сайтар мэдэх бөгөөд Хонгор нутгийнхандаа талархаж явдгаа энэхүү баярын өдөр хэлэхэд таатай байна.
Уужим талбиун нутагт мэндэлж, өсөж торнисон хүмүүсийн ухааны ур, хөдөлмөрийн үр арвин байдгийг тус аймгаас төрөн гарсан алдар суутнуудаар жишээлэн хэлж болно. Тухайлбал Монгол дуу, гүр дууны нотыг анх зохиогч Чин сүжигт номун хан Лувсанноровшарав, Монголын хэл шинжлэлийн 3 оргилын нэг Шадавын Лувсанвандан, Монголын орчин цагийн хөгжмийн нэрт зохиолч Сэмбийн Гончигсумлаа, Бирваа, Ардын уран зохиолч Тангадын Галсан, Монгол Улсын баатар Норпилийн Жамбаа, Алдарт хоньчин С.Бат-Очир, Б.Лхагва, Д.Жанар нарын 20 гаруй хөдөлмөрийн баатар, Эрдэмтэн, химич Б.Доржпалам, сэтгүүлч зохиолч Цэндийн Намсрай, “Хонгор миний нутаг” хэмээн омогшдог гавъяат, төрийн соёрхолт жүжигчин Догмидын Сосорбарам нарын 10 гаруй төрийн соёрхолтон Балжинням, Паль, Ишдорж, Пүрэвдорж, Болдбаатар нарын генералууд, зохиолч яруу найрагч Чойжилжавын Лхамсүрэн, Пүрэвжавын Пүрэвсүрэн, Хорлоогийн Цэвлээ нарын 100 шахам гавъяат цолтныг зүй ёсоор бахархан дуурсах учиртай.
Түүхт тэгш ойгоо арав арван жилээр өргөн дэлгэр тэмдэглэж байгаа нь хийж бүтээснээ дүгнэн цэгнэж хийх ажлаа төлөвлөж өөрөөр хэлбэл ард түмэндээ тайлангаа тавьж байгаагийн нэг хэлбэр билээ.
Баянхонгор аймаг нь үйлдвэрлэлийг хөгжүүлж ажлын байрыг нэмэгдүүлэх жилийн хүрээнд 14 тэрбум төгрөгийн хөрөнгө оруулалтаар 108 бүтээлч ажил хийж их ойгоо угтаж, ололт амжилтаа бататгаж, алс хэтийн зорилго, хөгжлийн хөтөлбөрөө баталж, Үндэсний хөгжлийн цогц бодлогод суурилсан, ирээдүйгээ харсан олон талт бодлого боловсруулан хэрэгжүүлж байгаад Монгол Улсын Ерөнхийлөгчийн хувьд талархаж байгаагаа илэрхийлье.
Та бүхэн хийж бүтээхийн үлгэр дууриаллыг үзүүлж аймгаараа Монгол Улсын Төрийн дээд шагнал “Алтан гадас” одон, “Хөдөлмөрийн гавъяаны улаан туг”-ийн одон авсан хөдөлмөрч ажилсаг, бүтээлч хамт олон билээ.
Хонгорчууд аа
Аймгийн эдийн засгийн үндэс болсон мал үргээ өсгөн үржүүлж, аймаг орноо хөгжүүлэх, иргэдийнхээ орлогыг нэмэгдүүлэхийн төлөө боломжит бүх нөхцлөө дайчлан ажиллацгаая.
Хариуцлагатай уул уурхай, ногоон эдийн засаг, аялал жуулчлал, хөдөө аж ахуй болон бусад үр ашигтай үйлдвэрлэлийн салбарыг нэмэгдүүлж ардчиллыг жинхэнэ утгаар нь амьдралд хэрэгжүүлж эрх тэгш, шудрага, ард түмнийхээ төлөө бүхнийг зориулсан нийгэм байгуулахын төлөө хамтдаа зүтгэцгээе.
Хотол түмнээрээ сайхан наадаарай.
Сайн үйлс дэлгэрэх болтугай.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 7 дугаар сарын 28
