Монгол Улсын Ерөнхийлөгч Ц.Элбэгдорж: Энэ шагналын нэр төр, цар хүрээ нь монголын сэтгүүл зүйг хөгжлийн шинэ шатанд гаргах бодит урам зориг, чанар чансаа болно гэдэг би итгэлтэй байна.
2009 оны 9 дүгээр сарын 18-нд Монгол Улсын Ерөнхийлөгч Цахиагийн Элбэгдорж Орчин үеийн сэтгүүл зүйн нэрт төлөөлөгч Ц.Балдорж агсны нэрэмжит, сэтгүүл зүйн шилдгийг тодруулах “БАЛДОРЖ” шагналын ёслолын арга хэмжээнд оролцлоо.
Нэрт сэтгүүлч, Монголын шинэ үеийн сэтгүүл зүйд “Балдоржийн” гэх өнгө аясыг үндэслэгч, өөрийн дэг сургуулийг буй болгосон Ц.Балдорж агсны гэр бүл, анд нөхөд нь хамтран “Балдорж сан”-г үүсгэн байгуулжээ.
Тус сангаас жил бүр сэтгүүл зүйн шилдгийн шилдэг бүтээл шалгаруулж байхаар тогтон бүтэн жилийн туршид шалгаруулалтаа явуулж иржээ. Анх удаагийн шагнал гардуулах ёслолын ажиллагаанд 2008 оны 9 сараас 2009 оны 9 дүгээр сарын хооронд олны таашаалд хүрсэн хэдэн зуун бүтээл ирснээс “Шилдгийн шилдэг 40” бүтээлийг танилцуулав.
Ингээд нэр хүндтэй утга зохиол судлаач, шүүмжлэгчид, төр нийгмийн зүтгэлтнүүдээс бүрдсэн шүүгчдийн бүрэлдэхүүн дүнгээ гаргаж Монгол Улсын Ерөнхийлөгч Ц.Элбэгдорж шилдгийн шилдэг бүтээлийн эзнийг тодруулахад Үндэсний шуудан сонины сэтгүүлч Б.Ганчимэг энэ удаагийн “Балдорж” шагналын эзэн болов.
Тус арга хэмжээг зохион байгуулагчид энэ ёслолын ажиллагааг дэлхийд нэр хүндтэй “Пулитзерийн шагнал”-тай дүйх хэмжээний нэр төр, өргөн цар хүрээтэй ёслолын ажиллагаа болгож Монголын сэтгүүл зүйд шинэ түрлэг, шинэ шалгуур буй болгох зорилготой байгаагаа илэрхийлсэн юм.
Ёслолын ажиллагаанд Монгол Улсын анхны Ерөнхийлөгч П.Очирбат, хоёрдахь Ерөнхийлөгч Н.Багабнди, одоогийн Ерөнхийлөгч Ц.Элбэгдорж болон Монголын сэтгүүл зүйн салбарт үйл ажиллагаа явуулдаг байгууллагуудын төлөөлөгчид, зохиолч, яруу найрагчид, утга зохиол шүүмжлэгчид, олны танил хүмүүс оролцлоо.
Арга хэмжээний үеэр Монгол Улсын Ерөнхийлөгч Ц.Элбэгдорж хэлсэн үгэндээ: “Ц.Балдорж бол гарамгай сэтгүүлч, нийтлэлч, хамт олноо манлайлагч, бас шинийг санаачлагч, эх орноо гэсэн халуун сэтгэлтэй нэгэн байв.
Түүний байгаль дэлхийгээ хайрласан, эх орноо энэрсэн олон арван нийтлэлүүд болон кино, жүжгийн зохиолууд нь Монголын шинэ, хуучин нийгмийн өнгө ялгарсан тусгал болж хойч үеийнхэндээ сургамж өгсөөр ирсэн билээ.
Өдгөө энэхүү түүхэн хүний нэрэмжит “Балдорж” хэмээх Монголын сэтгүүл зүйн шилдгийн шилдэг, онцгой бүтээлд зориулсан шагналын анхны эзэн тодрох гэж байна. Энэ шагналын нэр төр, цар хүрээ нь монголын сэтгүүл зүйг хөгжлийн шинэ шатанд гаргах бодит урам зориг, чанар чансаа болно гэдэг би итгэлтэй байна.
Дэлхийд алдартай утга зохиол, сэтгүүл зүйн Пулитзерийн шагналын нэгэн адил Монголын шинэ үеийн сэтгүүл зүйн гэрэлт луужин болсон шинэ өнгө аяс, шинэ тэмүүллийн эхлэл “Балдорж” шагналын ёслолын ажиллагаанд амжилт хүсье.
Монголын сэтгүүл зүй улам өөдөө байж хүний эрх, эрх чөлөөний дээд үнэлэмж болсон ардчилсан ёсны мөнхийн харуул байх болтугай” хэмээн онцоллоо.
