МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖИЙН АНУ-Д ХИЙСЭН АЛБАН ЁСНЫ АЙЛЧЛАЛЫН ҮР ДҮНД СЭТГЭЛ ДҮҮРЭН БАЙНА
Ө.Рагчаасүрэн - Дархан-Уул аймгийн “ОРХОН” телевиз, радиогийн ерөнхий редактор, сэтгүүлч
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖИЙН АНУ-Д ХИЙСЭН АЛБАН ЁСНЫ АЙЛЧЛАЛЫН ҮР ДҮНД СЭТГЭЛ ДҮҮРЭН БАЙНА
Юуны өмнө Монгол Улсын Ерөнхийлөгч Ц.Элбэгдоржийн АНУ-д хийсэн албан ёсны айлчлалын тухай мэдээллийг вэб хуудсан дээрээ цаг алдалгүй шуурхай мэдээлсэнд Ерөнхийлөгчийн Тамгын Газарт талархал дэвшүүлье.
Ерөнхийлөгчийн айлчлалын тухай ингэж дэлгэрэнгүй мэдээлэх зайлшгүй шаардлагатай байсан юм. Олон нийтэд тэр тусмаа энэ айлчлалын үр дүнг олж хараагүй зарим хүмүүст бодит мэдээллийг ингэж тодорхой өгсөн нь цаг үеэ олжээ. Амин хувийн үзэл хандлагаар яаран өрөөсгөл дүгнэлт өгөхийг оролдсон хүмүүст та бүхний бэлдсэн энэ дэлгэрэнгүй мэдээлэл бүрэн хариулт өгөхөөр чамбай хийгдсэнд иргэн би сэтгэл хөдөлснөө илэрхийлэхгүй байж тэвчсэнгүй. Залуу ажилтнууд та бүхний цаашдын ажил үйлсэд урам хайрлая.
Айлчлалын тухай нэг их албан бус байдлаар аль болох ач холбогдолтой талаас нь энгийн ойлгомжтой мэдээлсэн нь уншигчдад их таалагдлаа. Товчхоноор хэлэхэд мэдээлэл их сонирхолтой маш сайн болжээ. Ерөнхийлөгчийн АНУ-д хийсэн айлчлалын талаар хэвлэл мэдээлэл дээр гарч байгаагаас илүү тодорхой сонирхолтой тайланг вэб хуудаснаас бид үзэж танилцлаа. Мэдээллийг олон нийтэд илүү өргөн түгээх үүднээс би дараах саналтай байна.
- Ардчилсан Ерөнхийлөгчийнхөө, ардчиллын өлгий оронд хийсэн айлчлалын бодит үр дүнг олон түмэн зүй ёсоор үнэлэх ёстой. Монгол, Америкийн харилцаанд шинэ хуудас нээсэн энэ айлчлалын ач холбогдолд, Монголын төр, олон нийт онц дүн тавих хэрэгтэй. Ингэхийн тулд тодорхой мэдээлэл авсан иргэд бид ч энэ орон нутагтаа ард иргэдэд нөлөөлөх болно гэдгээ дуулгая.
- Вэб сайт руу зарим иргэд, ялангуяа ахмад хүмүүс төдийлөн ордоггүй учраас энэ мэдээллийг олж үзээгүй хэсэгт нь зориулан аль болох зохимжтой сувгаар сонин хэвлэлүүд дээр сайн тавьж, зурагтаар цуврал болгон гаргах нь зүйтэй юм.
- Ерөнхийлөгч маань энэ айлчлалаас их олзтой иржээ. Маш шахуу хөтөлбөрөөр ямар их амжуулаа вэ? Манай ерөнхийлөгч нарын айлчлалд урьд нь байгаагүй олон шинэлэг санааг хэрэгжүүлжээ. Тэр бүхнийг энд тоочоод юу хийхэв. Ийм учраас олон түмэнд илүү тодорхой мэдээлэх хэрэгтэй. Энэ мэдээллийг ингэсхээд орхичхож боломгүй санагдана. Айлчлал үр ашигтай болсон учраас мэдээлэл нь огт хуучрахгүй.
- АНУ-д сурч ажиллаж буй иргэдтэйгээ уулзсан Ерөнхийлөгчийн уулзалт тэдэнд их сэтгэгдэл төрүүлсэн байна. Дүү маань энэ талаар имээл ирүүлсэн. Тийм учраас тэнд байгаа иргэдтэйгээ байнга холбоотой ажиллаж, эрдэм, чадварыг нь улс орондоо улам илүү татах хэрэгтэй байна.
- Сонгогч олон минь, Ардчилсан ерөнхийлөгчийнхөө амжилт ололтыг одоо бодитоор үнэлэх цаг болжээ! Төрөө дээдэлдэг эртний уламжлалаа сахицгаая, Монгол түмэн минь! Алийн болгон төрөө муу хэлэхэв. Төрийн тэргүүндээ урам өгч, дэмжиж хөгжицгөөе!
Дархан хот.
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖИЙН АНУ-Д ХИЙСЭН АЛБАН ЁСНЫ АЙЛЧЛАЛЫН ҮР ДҮНД СЭТГЭЛ ДҮҮРЭН БАЙНА
